Josua 9 - Iaai Bible 1901 (New Caledonia)

¹ KE haba je than hia ödrin e long, walʼ ödrin hnyi ke keihen Joridano e jio hnyi je bucen me hnyei ae ca hut, me hnyi hobat köien köiö ae gan hia cicö Lebanona, wale at Heth, me Amora, me Kanana, me Perizi, me Hivi, me Jebusi;

² me ödrin e ûkhacaköu he ka tot metâ kö Josua me at Isaraela hnyi hnyok a khaca.

³ Ke a long at Gibeona ûnyi a ânyâ Josua ka Jeriko me Ai,

⁴ me ödrin e huliwa iyawö, kʼ ödrin e ûcûcûbongoâ hnyat metâ, me hom je tang ae bobot hon haledrin je asina, me je tangen waina ae bobot ut, ke khekhe, ke adre ca;

⁵ ke bobot ut me hna tibet hmetu je tangen hnyeûcadrin, kʼ ödrin e khavâ je ûkhaû ae bobot ut; ke meleca but me om but jeûiny kamejidrin hia.

⁶ Me ödrin e he kö Josua hnyi hna hunuma e Gilegala, kʼ ödrin e ha kâu, me at Isaraela, ha habe, Ûhehmun hnyi hnyei ae sâkâû: ke walang ang e so öbun e ânyâ ûhihinyköu möhmun.

⁷ Ke haba at Isaraela adre me ha ka at Hivi, ka habe, Hawa la, öbun e ne tha laba unyihmun, ke öhmun e he ka kâmâu ka ûhihinyköu möbun?

⁸ Me ödrin e ha kö Josua, ka habe, Öhmun lathnyabaem. Ke haingö Josua ködrin, ka habe, Öbun ie je hnyat? kʼ öbun je hnyat ua?

⁹ Me ödrin e ha kâu, ka habe, Ûhehmun hnyi hnyei ae ti sâkâû lathnyabaem can iö Iehova Khongom: anyin a öhmun e hia but long ûlunginy, me hnen hna ânyâ hia hnyi Aigupito,

¹⁰ me je ûnyi hia e ame ânyâ ka li thaniny at Amora, wale hoton Joridano, kö Sihona than Hesebona, me Oga than Basana hnyi Aseterotha.

¹¹ Ke ame ha kohmun wahingatihmun, mödrin hia aten ihmun, ka habe, Bi kamejibun hobi kâu he, me he thö me ûkhanö mödra, me ha ködra, ka habe, Öhmun lathnyabaibun: ke walang ang e so öbun e ânyâ ûhi-hinyköu möhmun.

¹² Waleû kamejihmun öhmun e hom ke tiga kahwa ûnyi hnyi umöhmun je uma hnyi bong öhmun e to-drö hnyin he ka he köbun; ke walang ang, wâ bi, e meleca thö me om but:

¹³ me je tangen waina eang a teb ûnyi öhmun e ounöngötâ; ke wâ bi, e khekhe but: ke bobot ut je khaûhmun eang me je tangen hnyeûcahmun ûnyi hnyi gethen ae sâkâû.

¹⁴ Me ame kop ödrin hnen tavat ge je kamejidrin, ke ödrin e ca hnö unyi Iehova.

¹⁵ Ke haba Josua ame ânyâ ûsoköu mödrin, me ûhihinyköu mödrin, me ödrin e möt: me ame khemanyin ködrin hnen je taben ûkhacaköu.

¹⁶ Ke hnyi kun ta bong hwaban hna ûhihinyköu mödrin, ödrin e long a tavat ae hakekeny ködrin, me tavat adre me laba unyidrin.

¹⁷ Ke haba lakon Isaraela ödrin e he me o hnyi anyidrin je taun hnyi bong a kuniny. Ke waleû anyidrin je taun, me Gibeona, me Kefira, me Berotha, me Kiriatha-jarim.

¹⁸ Ke a ca kuc ödrin hnen lakon Isaraela, anyin a hia but khemanyin ködrin hnen je taben ûkhacaköu, me haiö Iehova Khongu Isaraela. Ke ame ulidro je taben hnen ûkhacaköu hia.

¹⁹ Ke ame ha hnen je taben hia ka ûkhacaköu hia, ka habe, Öhmun e hia but khemanyin ködrin me haiö Iehova Khongu Isaraela: anyin a wale, e ca khanʼ öhmun he ka kalʼ ödrin.

²⁰ Walang ûnyi otin e he ka ânyâ ködrin, me omeli ödrin; wâ e nye takû ota ge hmönyin, can hnöta hna khemanyin ködrin.

²¹ Me ame ha ködra je taben, ka habe, Hnʼ ödrin ju he ka möt, mʼ ödrin e bi hnyat höcö me hnyat soû köiö hobi kâu ûkhacaköu hia, helâ me je taben ame ha ködrin.

²² Me Josua ame hawʼ ödrin, me ha ködrin, ka habe, Ieû gabun öbun e iyawʼ öhmun, ke ha, ka habe, Öhmun ûsâkâûö hmönyin möbun; ke öbun e tha laba bi möhmun?

²³ Ke walang ang e hu gabun ûhangö, ke ba ke at gabun adre me ca he ka thaluâ he ka höcö, me soû köiö hobi kâu uma umen Khonguk.

²⁴ Ke ödrin e thu kö Josua, ka habe, Adre me ha hnathoâ ka lathnyabaem a Iehova Khongom ame hûna kö Mose a athnyabainy he ka ham köbun hnyei hia thithö, me he ka ohia aten hnyei hnyi hnyimaköbun, anyin a wale öhmun e ot gan hmâ me bemöt gabun, waleling mʼ öhmun e ânyâ ûnyi e.

²⁵ Ke haba walang ang wâ bi öhmun ang hnyi hnyamâm: ânyâ thö kohmun helâ me u je ûnykûme so me wisa he ka ânyâ.

²⁶ Me e ame ânyâ helâe ködrin, me omeli ödrin ûnyi hnyi hnyamen lakon Isaraela, mʼ adre me ca hlingʼ ödrin.

²⁷ Ke haba Josua ame wiʼ ödrin hnyi bong eling mödrin e he ka tavat höcö me seköiö hobi kâu ûkhacaköu, me hobi kâu taben hut kö Iehova, ke ne o but hnyi bong ang, hnyi dok e ame ke ka ûca.