Josua 8 - Iaai Bible 1901 (New Caledonia)

¹ KE haba Iehova ame ha kö Josua, ka habe, Ca ot bi me öbubuny: ke tha hom dö tavat vat hia thithö mou, ke höhöi thö me he Ai ai: wâ bi oge hia but ham ka hnyi hnyamâm thaniny Ai, me lakeiny, me anyin taun, me iny hnyei:

² ke u me he ka ânyâ ka Ai me thaniny, helâ me hnâm hna ânyâ ka Jeriko me thaniny: ke so je omjeûiny me je menoiny öbun e he ka hom hobi köbun bi: u me he ka ip mokut ke je aten vat hoton e.

³ Me ame höhöi thö Josua me tavat vat hia thithö, he ka he Ai ai: ke Josua ame ûca thote thauzan tavat, je hnyat ae hwege vat, me kunʼ ödrin hnyi hnyinghet.

⁴ Ke e ame hûna ködrin, ka habe, Wâ bi, öbun e he ka khöu mokut hnyi taun, wale hoton taun: ca ûsâkâûö me taun, ke öbun e he hia thithö ka laba penapena:

⁵ ke haba inya, me tavat hia thithö unyik ame he ka he hakekenyâ taun: ke ödrin ka he ka didrut kohmun he ka vat helâ me a bân, ohmun e he ka kâcâ anyidrin vat:

⁶ ke ödrin e he ka hnu hotuhmun ke ne o but ohmun e hia but lili ödrin ûheny hnyi taun; anyin ödrin e he ka ha, ka habe, Ödrin e kec gatin, helâ me vat a bân; me ohmun e he ka kec hnyi hnyimaködrin:

⁷ ke öbun e he ka utut ûnyi hnyi hna khöu mokut, me hûgûnâ taun: anyin ame he Iehova Khongubun ka hna e ka hnyi hnyamöbun.

⁸ Ke Öbun ka hia but hûgûnâ taun, öbun e he ka thong degecâ e ge meic; öbun e he ka ânyâ hoton hofuc ho Iehova: wâ bi, oge hia but hûna köbun.

⁹ Ke Josua ame kunʼ ödrin: ke ödrin e he ka hnyi dok hnân khöu mokut hnyin, me laba wanben Bethela me Ai, hnyi ke keihen e jio Ai: ke Josua ame mokut hnyi lit eling unyin tavat.

¹⁰ Ke Josua ame vesâ hnyi hnyomakatu, me ûkhacaköuâ tavat, me he hnyi hnyimakan tavat Ai ai e me je hingatiny at Isaraela.

¹¹ Ke ame he tavat hia thithö wale vat unyin ka hakekenyâ, me o hnyi hnyimakan taun, me hunuma hnyi ke keihen Ai ka hnyi hwadrö: ke e hu hnyigöulen bucen hnyi wanbödrin me Ai.

¹² Ke e ame hom helâ me faiv thauzan tavat me ip duöngi ödrin hnyi wanben Bethela me Ai, hnyi ke keihen taun ke e jio.

¹³ Waleling, adre me ip tavat, a utbavat hia hnyi ke keihen taun ka hnyi hwadrö, ke haba tavat adre me ip duöngâ me ödrin e laba hnyi ke keihen taun ke e jio: ke haba Josua ame he hnyi hnyigöulen bucen hnyi lit eling.

¹⁴ Ke a wâ e than Ai, me ödrin e mweimwei me vesâ, ke ame utut aten taun ka at Isaraela he ka vat, a e me lakeiny hia, hnyi ûen adre thu, ka hnyi ke dok cicö hnyebuba; ke ca khana a gʼ ame hu tavat adre me mokut duöng kâu hnyi hoton taun.

¹⁵ Ke haba Josua me at Isaraela hia thithö me adre me kec iyawö hnyi hnyimaködrin, ke adre me kec hnyi gethen ûheny hnyi hnyebuba.

¹⁶ Ke adre me hawâ tavat hia thithö hnyi taun he ka hnu ödra; ke adre me hnu Josua, me adre me ok ut ûheny hnyi taun.

¹⁷ Ke ba at biju hnyi Ai me Bethela a ca hnyi he hoton at Isaraela; ke adre me hna taun adre khong, me hnu at Isaraela.

¹⁸ Ko Iehova ame ha kö Josua, ka habe, Inâ but ö hnyi hnyamâm hon Ai; anyin a oge me he ka ham e köu. Me Josua ame inâ ö hnyi hnyamen hon taun.

¹⁹ Me ame ie köûö mokut ûnyi hnyi hnödrin hnyi ûen e ame inâ hnyamen, kʼ ödrin e wadring me dit ka hnyi taun, me hûgûnâ; ke ödrin e logot he ka thong taun ge meic.

²⁰ Ke ame hwio at Ai me wâ, kʼ adre me bwele, me wâ bi, ame sâ hnyi drany ai hainy taun, ke ba man gadra he ka kec ka hnyi ke keihen e me ke keihen ang: kʼ ame hmetu tavat kec hnyebuba ai ka tavat ûhnûhnû.

²¹ Ke haba hnyi ûen Josua ame wâ me at Isaraela hia a gʼ ame hia but hûgûnâ taun hnen mokut, ke ame sâ goranyai hainy taun, me adre me hmetu me kot at Ai.

²² Ke haba ke keihen tavat ödrin e didrut ködrin ûheny hnyi taun; me ödrin bi hnyi wanben at Isaraela, keihen hnyi ke keihen, ke keihen hnyi ke keihen: ke ödrin e kuc ödrin me ame ba but thelidrin me at ame kec möt.

²³ Ke ödrin e hom melö thaniny Ai, me hom e kö Josua.

²⁴ Ke a hia but at Isaraela kot at Ai huyi hnyei, hnyi hnyebuba wale adre me hnu ödra hnyin, ke adre me ta hia ge hele vat, me ohiʼ ödra, me ame hmetu Ai ai at Isaraela hia thithö, me kot e ge hele vat.

²⁵ Ke ödra, twelv thauzan tavat hia obaga me omomo adre ta hnyi bong eling, wale aten Ai hia thithö.

²⁶ Anyin a Josua ame ca thu benyin ge hna inâ ö, ke ne o but adre hia but ohia at Ai hia thithö.

²⁷ Ke so bi haba at Isaraela adre me hom hobi ködra bi je meno me tang omjeûiny hnyei eling, helâ me hofuc ho Iehova e ame hûna kö Josua.

²⁸ Me Josua ame thong degecâ Ai, me wia e hnân ve ta ûnyi nyiele balua; me obâ wan ke ne o but hnyi bong ang.

²⁹ Ke e ame uhno thaniny Ai hon ûö ke ne o but hnyi sahac: ke hnyi ûen ame didrut seûno Josua ame ûkhûnöng he ka hom but hnyikânâi unyin ûnyi hnyi ûö, me khûâ e hnyi homagouleny taun, me khon veten hon e ae gan hmâ, ke ne o but hnyi bong ang.

³⁰ Ke haba Josua ame otilâ taben hut kö Iehova, Khongon at Isaraela, hnyi bucen Ebala,

³¹ helâji me Mose athnyabai Iehova ame hûna ka at Isaraela, helâ me hna sihnalimen hnyi tusiny hnanyibu anyi Mose, ka habe, Taben hut je veto ae bekhöt, adre ca inâ goranyai utfao hon: ke ödrin e hudo hon e je hudiny leû ko Iehova, me hudo je hudiny ûsoköu.

³² Ke e ame sihnalimen hon je veto eling hna oc hnanyibu anyi Mose, waleji e ame sihnalimen hnyi hnyimakan lakon Isaraela.

³³ Ke haba at Isaraela hia, me wahingatidrin, me anyidrin je taben, me anyidrin je hnyat owisa, ödrin e ûtitilen hnyi li baten tang hnyi hnyimakan hnyat bihut a at Levi, wale hnyat ödrin e vadren tangen ûhihinyköu anyi Iehova, a je atkanyua tha ödrin me tavat adre hnokoâ hnyi hnyei; haba ke keihen a hafiny adre me tot cicö bucen Gerizim, ke ke hafiny cicö bucen Ebala; helâji me Mose a athnyabai Iehova ame hûna, mʼ adre me he ka bödrin ka ha hnahicâ hnyei Isaraela.

³⁴ Ke hwaban e me e ame aû hofuciny hnanyibu hia, wale hnahic me hnaûhango, helâ ma hna sihnalimen hia hnyi tusiny hnanyibu.

³⁵ E ba ke ong hofuc a hûna Mose a ga ca aû bi Josua hnyi hnyimakan ûkhacaköu anyin at Isaraela hia thithö, a tha ödra me omomo, me tavat ae ûhnyûkong, me je atkanyua hnyat adre imetenyimwi mödra.