Josua 7 - Iaai Bible 1901 (New Caledonia)

¹ KE kong hwakecin lakon Isaraela hnyi ûnyi adre nyiboâ: anyin a haba Akana nöku Karemi, nöku Zabedi, nöku Zera, ûnyi hnyi tribu Juda, ame hom ke je ûnyi adre nyiboâ; me ame ubâhlâ hmonyin anyi Iehova ka lakon Isaraela.

² Ke haba Josua ame kunâ ke je hnyat ûheny Jeriko Ai ai, wale ae hakekeny Beth-aven, hnyi ke keihen Beth-ela ke deiö, me ha ködra, ka habe, He thʼ öbun me ecmâkâ hnyei Me ame he je hnyat me ecmâkâ Ai.

³ Ke ödrin e hmetu kö Josua me ha kâu, ka habe, U ma ca kunâ tavat hia thithö he ka be, ke so ame ne lo li thauzan tavat, ame ne kun ta thauzan he ka kot Ai; ke ca he ka ohuliwan tavat hia thithö, anyin a ödrin wakhalet.

⁴ Waleling me ame he kâ e helâ me kun ta thauzan tavat: ke ödrin e kec ge at Ai.

⁵ Ke haba at Ai ödrin e kot thote siks ta hnyat gadrin: ke ödrin e hnu ödrin hwân hnyi homagöule ke ne o but ka hnyi Sebarima me kuc ödrin hnyi hna utut: me ame oköiö je hnyekon tavat me me helâ me köiö.

⁶ Ke haba Josua ame kia anyin je ûkhaû, me ta but hnyikânâi hnyi hnyimakan tang anyi Iehova ke ne o but sahac, a e me wahingatiny Isaraela; ke ödrin e ip dröu hon je bodrin.

⁷ Ke Josua ame ha, ka habe, Ekölö Than Iehova, ieû gam u je hom tavat eang he ka hanyâûâ Joridano, mʼ u me he ka hnʼ öhmun ka hnyi hnyamen at Amora, he ka ohiʼ öhmun? e na sekuhmun he ka laba hnyi ke kheihen Joridano e deiö!

⁸ Than lö oge me he ka ha ieû, anyin a hia but lakon Isaraela wia judrin ka ta je iwahnaihmiony mödrin!

⁹ Anyin ame he at Kanana ka long, me ödrin hia tavat adre me labā hnyei, mʼ adre me he ka igigili öhmun me subâ degecâ iöhmun ûnyi eang hmelen: ke ieû u me he ka ânyâ hobi kâu iâm ae gan?

¹⁰ Ke Iehova ame ba kö Josua, ka habe, Höhöi thö; ieû gam u me mokut hnyimâm hnyikânâi helâe?

¹¹ E kong hwakecin at Isaraela; anyin a ödrin e hia but hanyâûâ anyik ûhihinyköu waleji oge hûna ködrin: ke ödrin e hia but hom ûnyi adre nyiboâ me venöu me iyawö minya, me ödrin e hia but ip e me je omjehedrin.

¹² Anyin a wale e ca khana lakon Isaraela he ka tot hnyi hnyimakan je iwahnaihmiony mödrin, ödrin e wia je judrin ka je iwahnaihmiony mödrin, anyin a ödrin e hnaûhango but: ke oge me ca he hmetu ka tha e möbun, öbun e ne ca degec ûnyi adre hake ip unyibun.

¹³ Höhöi thö me okabâ thö tavat, me ha, ka habe, Okabi öbun dö hobi kâu nyi: anyin a walang ame ha Iehova Khongu Isaraela, ka habe, Isaraela lö, e hu ûnyi adre nyiboâ unyâm: ke ca kbanö u he ka tot hnyi hnyimakan je iwahnaihmiony mou, ke ne o but öbun e hom degecâ ûnyi adre hake ip unyibun.

¹⁴ Ke adre me he ka hum öbun nyi, hoton anyibun je tribu; ke haba tribu ame he Iehova ka kû ame he ka he jem hoton je lap; ke haba lap ame he Iehova ka kû, me ame he ka he jem hoton je uma, ke haba uma ame he Iehova ka kû me ame he ka he jem ke at me ke at.

¹⁵ Ke haba at adre me hom ke e unyin ûnyi adre hake ip, me adre me he ka thong degecâ e ge meic, e me anyin ta je ûnyi hia: anyin a e ame hia but hanyâûâ ûhihinyköu anyi Iehova, ke can e ame hwen monu hnyi Isaraela.

¹⁶ Ke haba Josua ame vesâ hnyi hnyomakatu, me hom hakekenyâ at Isaraela hoton anyidrin je tribu; me adre me kû tribu anyi Juda:

¹⁷ ke e ame hom lap anyi Juda; me e ame hom lap anyin at Zera; me e ame hom lap anyin at Zera ke at me ke at; ke adre me kû Zabedi;

¹⁸ ke e ame hom umen uma ke at me ke at; me ame kû Akana nöku Karemi, nöku Zabedi, nöku Zera, ûnyi hnyi tribu Juda.

¹⁹ Ke haba Josua ame ha kö Akana, ka habe, Nokuk lö, ö u na he ka oganö Iehova Khongon at Isaraela, me haimemenâ kâu; ke ha könya walang ang ûnyi u je hia but ânyâ; ca he ka ikhâlâ gak.

²⁰ Ke haba Akana ame thu kö Josua, ka habe, E hnathu e kong hwakecik hnyi hnyimakö Iehova Khongon at Isaraela, ke oge hia but ânyâ helâng me helâng:

²¹ haba hnyi ûen oge me wâ ûnyi hnyi je ûnyi adre hûgûnâ ke ûkhaûiny Sinara ae so, ke lo li haded je sekel sileva, ke ong gol a fifte je sekel, me oge me behnyekon me hom ta je ûnyi e; ke wâ bi adre ikhâlâ hnyi wanben umök uma mano hnyi kânâ, ke eû hmelen e je sileva.

²² Ke Josua ame kunâ tavat, ke ödrin e wadring ka hnyi uma mano; ke wâ bi adre hia but ikhâlâ hnyi umen uma mano, ke eû hnyi hmelen e je sileva.

²³ Ke ödrin e hom ta je anyi e ûnyi hnyi uma mano, me hom kö Josua, me lakon Isaraela hia; ke ödrin e ip hnyikânâi hnyi hnyimakö Iehova.

²⁴ Ke haba Josua me lakon Isaraela hia, adre me hum Akana, nöku Zera, me sileva, me ûkhaû, me ong gol, me lakon baga me hlu, me haleny je bolok, me haleny je mamoe, me umen uma mano, me anyin ta je ûnyi hia thithö, ke adre me hum ödrin ka hnyi hnyigöulen bucen Akora.

²⁵ Ke haba Josua ame ha, ka habe, Ieû gam u me oveci ohmun? ame he Iehova ka oveci u hnyi bong ang. Me haba at Isaraela hia adre me lûâ e ge veto; ke ödrin e thong degeci ödrin ge meic, me luʼ ödrin ge veto.

²⁶ Me adre me khon gânâ je veto ethö hon, a wale bi e ke ne o but hnyi bong ang; me haba Iehova ame hwiö ûnyi hnyi anyin hmönyin ae hwege. Anyin a wale adre me hwenyi ien dok eling, me, Hnyigöulen bucen Akora ke ne o but hnyi bong ang.