Josua 6 - Iaai Bible 1901 (New Caledonia)

¹ (KE ame ti thelöng hwegiâ Jeriko can lakon Isaraela: e ba at ame didrut, ke ba at ame didrö.)

² Ke Iehova ame ha kö Josua, ka habe, Wâ bi, oge hia but ham ka hnyi hnyamâm Jeriko, me thaniny, me je taben tavat ae hwege.

³ Ke öbun e he, tavat a hnyi vat hia, ka igigilö taun, me okhaca he igigilö taun. U me he ka ânyâ helâe hnyi je bong a siks.

⁴ Ke ame he tavat bihut a seven ka hom tilâ je trutruiny jubeli hnyi hnyimakan tang: ke haba hnyi bong a seveniny, hamöbun he ka oseven he igigilö taun, ke ame he tavat bihut ka tûâ tilâ je trutru.

⁵ Ke e ka beû but hna tûâ trutruiny jubeli, ke öbun ka long ut ifuciny trutru me ame he tavat ka kuku hwege: me ame he ka ū but haginy taun adre up veten, me me ve ölö thö tavat hia thithö hnyi hnyimaködra.

⁶ Ke haba Josua nöku Nuna ame hawâ tavat bihut, me ha ködra, ka habe, Hom dö tangen ûhihinyköu, ke hamen hnyat bihut a seven ka hom tilâ je trutruiny jubeli a seven hnyi hnyimakan tang anyi Iehova.

⁷ Ke e ame ha ka tavat, ka habe, He thʼ öbun me igigilö taun, ke bân hnyat adre hom omjehen vat, hnyi hnyimakan tang anyi Iehova.

⁸ Ke a hia but Josua ha ka tavat, me ame he hnyat bihut a seven ke ödrin e hom tilâ je trutruiny jubeli a seven hnyi hnyimakö Iehova, me tûö trutru tot: kʼ ame he hotudrin tangen ûhihinyköu anyi Iehova.

⁹ Ke ame bân tavat adre me hom omjehen vat hnyi hnyimakan hnyat bihut ödrin e tûâ je trutru, ke ame he hoton tang obiny bunyen, ke adre me tûö trutru tot.

¹⁰ Ke Josua ame ha ka tavat, ka habe, Ca he öbun ka hongot, kʼ adre me ca he ka long ifucibun, ke so ame ca o ke ong hofuc ûnyi hnyi hnyimöbun, ke ne o but bong oge me he ka kunʼ öbun ka kuku: me waleling öbun e he ka kuku.

¹¹ Me e ame kunâ he ka igigilö taun ge tang anyi Iehova, kʼ adre me okhaca igigilö; me adre me hmetu ka hnyi hna hunuma, me mokut eling.

¹² Ke Josua ame vesâ hnyi hnyomakatu, ke hnyat bihut ödrin e hom tang anyi Iehova.

¹³ Ke haba hnyat bihut a seven, me ödrin e hom tilâ je trutruiny jubeli a seven hnyi hnyimakan tang anyi Iehova, ödrin e he bala me tûö trutru tot, kʼ ame bân tavat adre hom omjehen vat; kʼ ame he hoton tang anyi Jehova obiny bunyen, me tûö trutru tot.

¹⁴ Ke hnyi bong a loiny ödrin e okaca he igigilö taun, me hmetu ka hnyi hna hunuma: ke adre me ânyâ helâe hnyi je bong a siks.

¹⁵ Ke haba hnyi bong a seveniny me adre me vesâ hnyi okubelit me he igigilö taun helâ me hwakecin ûhedra, ke ne o but oseveniny: ke haba hnyi bong thibi eling me adre me oseven he igigilö taun.

¹⁶ Ke haba hnyi ûen a seveniny, kʼ ame tûö trutru hnyat bihut, me haba Josua ame ha ka hnyat bihut, ka habe, Kuku thö; anyin a hia but Iehova ham köbun taun.

¹⁷ Kʼ adre me he ka ke ip taun, me ta je ûnyi hia eû hnyin hobi kö Iehova: ke Rahaba thiju momo hnyi gethen a gʼ ame he ka möt, e me hnyat hia thithö unyin hnyi uma, anyin a e ame ikhâlâ li metâ otin e kunâ.

¹⁸ Ke öbun e he ka tuʼ öbun bi ge ta je omjeû ae kap; wâ öbun nye hia but ke ip, me hom ûnyi adre ke ip; me ham hnaûhango ka lap anyin, at Isaraela hia, me okongoâ e.

¹⁹ Ke haba je sileva hia me gol, me je kaia bras me fao, adre me okabâ kö Iehova: adre me he ka oâ ka hnyi tang omjehe Iehova.

²⁰ Ke ame kuku tavat, me adre tûâ je trutru: ke ame long hnen tavat ifucin trutru, me ame kuku hwege tavat goranyai, me ame ū but hna up veto, me ame ve ölö thö tavat ka hnyi taun cici ödrin, me ödrin e hûgûnâ taun.

²¹ Me ödrin e ti ohia ta je ûnyi hia hnyi taun, je baga me momo, me wanakat, me hingat, me bolok, me mamoe, me asina, ge hele vat.

²² Ke Josua ame ha ka li at ödre ecmâkâ hnyei, ka habe, He thʼ öbu ka hnyi uma umen momo hnyi gethen, me hom but momo mödrin hia thithö a tha ödrin mē, helâ me hnöbu hna khemanyin kâu.

²³ Me ame didro li hidröu li at ecmak, me hum Rahaba kâû, me kamen me hinyen, me je liamekeiny mē, mödrin hia a tha ödrin mē, ke ödru me hom kâû anyin lap hia; me hnʼ ödrin ka hnyi hoton hna hunuma anyin at Isaraela.

²⁴ Ke ödrin e thong taun ge meic, me ta je ûnyi hia eû hnyin: ke haba sileva me gol, me bras, me fao, ödrin e ip hnyi tang omjeû hnyi uma umö Iehova.

²⁵ Ke Josua ame omeli Rahaba momo hnyi gethen, me lap anyin kamen, mödrin hia a tha ödrin mē; ke e ame laba hnyi Isaraela ke ne o but hnyi bong ang; anyin a e ame ikhâlâ li metâ waleji Josua ame kunâ he ka ecmâkâ Jeriko.

²⁶ Ke haba Josua ame ha hwegiâ ködra hnyi ûen eling, ka habe, Hnaûhango hnyi hnyimakö Iehova at ame he ka tot me op hmeto taun eang Jeriko: e ame he ka bi taben e ge imekeiny nokon a atö, me otilâ je homagouleny ge imekeiny nokon a wakeiat hmönyin.

²⁷ Ke tha Iehova me Josua, me ame lung hnyi hnyei hia.