Josua 5 - Iaai Bible 1901 (New Caledonia)

¹ KE haba je tuhan hia at Amora a ödrin hoton Joridano ke e jio, me je tuhan hia at Kanana hnyi hobat köiö, me ödrin e long a Iehova ame hia but ohmö köien Joridano hnyi hnyimakan lakon Isaraela ke ne o but ate me hanyâûâ, me ame gâ udrin, ke ba hmetu hwege eû hnyi je hnyekudrin ge lakon Isaraela.

² Ke Iehova ame ha kö Josua hnyi ûen eling, ka habe, Ânyâ thö je watagi oût mʼ adre me he ka olo peritomonâ lakon Isaraela.

³ Ke Josua ame ânyâ je watagi oût me peritomonâ lakon Isaraela hnyi Gibea-aralota.

⁴ Ke walang can Josua ame peritomonâ: Haba tavat hia adre me o ûheny Aigupito, a obaga hia adre me hnyi vat, me adre me mokcu hnyi hnyebuba eû hnyi gethen, hnyi ûhedra Aigupito.

⁵ Anyin adre peritomonâ tavat hia ûhedra Aigupito: ke so bi adre tiga ca peritomonâ tavat hia waleji adre hnokoâ hnyi hnyebuba eû hnyi gethen hnyi ûhedra Aigupito.

⁶ Anyin a haba lakon Isaraela adre me vheno hnyebuba fâte je huna, ke ne o but ame hia tavat adre hnyi vat ûhedra Aigupito, anyin adre me ca long hoton hofuc ho Iehova: me Iehova ame khemanyin ködra a gʼ ame ca he ka omanenâ ködra hnyei, waleji a khemanyin Iehova ka lakamödra he ka ham köta, wale hnyei ame di ge debai me hani.

⁷ Ke haba Josua ame peritomonâ lakudra wale tavat adre hnokoâ me hwabödra: anyin adre tiga ca hia but peritomoni ödra, anyin adre ca peritomoni ödra eû hnyi gethen.

⁸ Ke a hia but peritomonâ tavat hia thithö, me adre me laba hnyi je hnödra hnyi je hna hunuma ke ne o but ame metu but.

⁹ Ke haba Iehova ame ha kö Josua, ka habe, Oge hia but ohia hnyi bong ang ûnyi hnân ohmehma unyibun ûheny Aigupito. Anyin a wale adre me hwenyi ien dok eling Gilegala ke ne o but hnyi bong ang.

¹⁰ Ke ame hunuma hnyi Gilegala, lakon Isaraela; ke ödrin e ânyâ paseka hnyi bong a fortininy tehi hnyi sahac, hnyi dok ae tha hon hnyi Jeriko.

¹¹ Ke haba nyi ödrin e han jeûiny kânâ hwaban paseka, je ong areto adre ca levenâ bi, me hwit adre le, hnyi bong a ka e.

¹² Ke nyi, e ba hmetu mana hwaban hnödrin hna han jeûiny hnyei; ke ba hmetu bi mana ka lakon Isaraela; ke ödrin e han wan hnyei Kanana hnyi huna eling.

¹³ Ke e Josua hnyi Jeriko, me e ame bwele me wâ, ke wâ bi, ame tot cicö e at ame tot me hele vat adre oc hnyi hnyamen: ke haba Josua ame he kâu me ha kâu, ka habe, U me tha hiâm möhmun, hawa, me je iwahnaihmiony möhmun?

¹⁴ Ke e ame thu, ka habe, E ba, anyin a oge o hnân taben je utbavat anyi Iehova. Ke Josua ame ta ju hnyikânâi, me nom ju, me ha kâu, ka habe, Ieû hofuc hwan tuhok ka athnyabainy?

¹⁵ Ke haba taben je utbavat anyi Iehova, ame ha kö Josua, ka habe, Uny jut tangen hnyeûcam ûnyi hnyi li cam, anyin ae kap utkânâ e u me tot hnyin. Ke Josua ame ânyâ helâe.