Josua 4 - Iaai Bible 1901 (New Caledonia)

¹ KE adre hia but hanyâûâ Joridano hnen tavat hia thithö, haba Iehova ame ha kö Josua, ka habe,

² U me he ka ûca ûnyi hnyi tavat je hnyat a twelv, ûsa khaca ûnyi hnyi je tribu,

³ ke hûna thö ködrin, ka habe, Öbun e he ka hom ûnyi hnyi wanben Joridano, ûnyi hnyi dok ame tot hnyin ke ca bwebwet li can hnyat bihut, je veto a twelv, kʼ öbun e he ka tha hom möbun jio, me ip hnyi dok öbun e he ka mokut hnyin eâu hnyinghet.

⁴ Ke Josua ame hawâ je hnyat a twelv, wale a penapena ûnyi hnyi lakon Isaraela, ûsa khaca ûnyi hnyi je tribu:

⁵ ke Josua ame ha ködrin, ka habe, Hanyâûâ thö hnyi hnyimakan tang anyi Iehova Khongubun, ka hnyi wanben Joridano, me hom dö ûsa khaca veto hon je bajebenyibun, hoton ûseiny je tribuiny lakon Isaraela:

⁶ me me hnân haten eling unyibuny, e ka he lakubun ka hnö nyiele, ka habe, Hnân eû je veto ang?

⁷ Me öbun e he ka thu ködra, ka habe, Anyin adre subâ luâ köien Joridano hnyi hnyimakan tangen ûhihinyköu anyi Iehova: haba hnyi ûen e ame hanyâûâ Joridano, me adre subâ luâ köien Joridano: ke haba je veto ang me hnân oûnykûmeâ lakon Isaraela nyiele balua.

⁸ Ke haba lakon Isaraela adre me ânyâ helâ me Josua ame hûna, me ödrin e hom je veto a twelv ûnyi hnyi wanben Joridano, helâ me Iehova ame ha ko Josua, ke hoton ûseiny je tribuiny lakon Isaraela: ke ödrin e tha hom je veto ka hnyi dok adre me he ka mokut hnyin, me ip eling.

⁹ Ke haba Josua ame hwa je veto a twelv eû hnyi wanben Joridano, hnyi dok ame tot hnyin li can hnyat bihut, hnyat ödrin e vadren tangen ûhihinyköu: ke ka eling ke ne o but hnyi bong ang.

¹⁰ Anyin a haba hnyat bihut, wale hnyat vadren tang, me ödrin e tot hnyi wanben Joridano, ke ne o but adre umo hia waleji a hûna Iehova kö Josua he ka ha ka tavat, helâ me Mose ame hûna kö Josua: ke haba tavat adre me mweimwei me hanyâûâ.

¹¹ Ke a hia but tavat hia hanyâûâ, me ame hanyâûâ tang anyi Iehova, me tavat bihut minya unyin tavat.

¹² Ke ame tha he me je omjehen vat hnyi hnyimakan lakon Isaraela laku Reubena, me laku Gada, me hafiny tribu anyi Manase, helâji me Mose ame ha ködra:

¹³ Ame ne fâte thauzan adre hia but penapena hnân vat adre me hanyââû hnyi hnyimakö Iehova, he ka vat, ka hnyi je dok ae tha hon hnyi Jeriko.

¹⁴ Ke haba hnyi bong eling Iehova ame oganö Josua hnyi hnyimakan at Isaraela hia thithö; mʼ adre me outen e helâ me hnödrin hna outö Mose hnyi ta je bonginy hia anyin möt.

¹⁵ Ke Iehova ame ha kö Josua, ka habe,

¹⁶ Hunâ thö ka tavat bihut, hnyat ödrin e vadren tangen ohnatho, he ka ölö thö ûheny Joridano.

¹⁷ Anyin a wale Josua ame hûna ka tavat bihut, ka habe, ölö thö ûheny hnyi Joridano.

¹⁸ Ke e ka ölö thö tavat bihut hnyat ödrin e vadren tangen ûhihinyköu anyi Iehova ûnyi hnyi wanben Joridano, ke ame uto dok ae mada hnen hnyeûcan hnyat bihut, me ame khutu hmetu but köien Joridano ka hnyi hnen, me öliâ je baten helâ me et.

¹⁹ Ke ame ölö tavat ûheny hnyi Joridano hnyi bong a teniny tehi a bân, me hunuma hnyi Gilegala hnyi ke keihen e deiöiny Jeriko.

²⁰ Ke haba je veto a twelv wale ödrin e hom ûnyi hnyi Joridano, Josua ame khon hnyi Gilegala.

²¹ Ke e ame ha ka lakon Isaraela, ka habe, E ka he lakubun ka hnö je lakamödrin nyiele, ka habe, Hnân eû je veto ang?

²² me öbun e he ka omanenâ ka lakubun, ka habe, Adre hanyâûâ jem Joridano eang hnen at Isaraela hnyi kânâ ae mada.

²³ Anyin a Iehova Khongubun ame ohmö köien Joridano hnyi hnyimakö-bun, ke ne e but öbun e hia but hanyâûâ, helâ me Iehova Khongubun ame ânyâ ka hnyi Köiö ae Dra, waleji e ame ohmö hnyi hnyimakötin ke ne o but otin e hia but he hanyâûâ;

²⁴ me me khana hnen tavat hia thithö eang hmelen ge hnyamö Iehova, ae hwege; mʼ adre, me he ka outö Iehova Khongubun nyiele balua.