Josua 3 - Iaai Bible 1901 (New Caledonia)

¹ KE Josua ame vesâkong, kʼ adre me he ûheny Sitima me he hnyi Joridano, a e me lakon Isaraela hia thithö; ke adre me mokut eling kʼ ödra tiga ca hanyâûâ.

² Ke hwaban kun ta bong haba ta je homakan ödrin e he hnyi wanben je hna hunuma;

³ ke ödrin e hûna ka tavat, ka habe, Öbun ka wâ tangen ûhihinyköu anyi Iehova Khongubun, kʼ ame vadren e tavat bihut, a at Levi, me öbun e he ka köûö ûheny hnyi hnobun, me hnu hoton.

⁴ Ke so ama hu hnyigöulöbun mē, haba tulut me helâ me lo li thauzan kubit: kʼ öbun e ca he ka hakekenyâ, mʼ öbun e he ka wâ gethen öbun e he ka vheno; anyin a öbun e tiga ca he hnyi gethen eling ehac.

⁵ Ke haba Josua ame ha ka tavat, ka habe, Okabi öbun dö, anyin a haba bong nyi me Iehova ame he ka ânyâ unyibun ta je ûnyi hnân lâiâ.

⁶ Ke Josua ame ha ka tavat bihut, ka habe, Vadren dö tangen ûhihinyköu, me hanyâûâ hnyi hnyimakan tavat. Me ödrin e hom tangen ûhihinyköu, me bodrin hnyi hnyimakan tavat.

⁷ Ke haba Iehova ame ha kö Josua, ka habe, Oge me he ka hwân hnyi bong ang ka oganö u hnyi hnyimakan at Isaraela hia thithö, me me khanʼ ödra a tha inya möu, helâji me tha inya me Mose.

⁸ Ke u me he ka hûna ka at bihut, tavat ödrin e vadren tangen ûhihinyköu, ka habe, Öbun ka o ka hnyi baten köien Joridano me öbun e he ka todru hnyi Joridano.

⁹ Ke Josua ame ha ka lakon Isaraela, ka habe, Ai öbun, me long je hofuc ho Iehova Khongubun.

¹⁰ Ke haingö Josua, ka habe, Walang haten mʼ öbun e he ka wâ a e bi unyibun Khong ae möt, kʼ ame he ka ti obâ hnyi hnyimaköbun at Kanana, me Heth, me Hivi, me Perizi, me Girigasa, me Amora, me Jebusi.

¹¹ Wâ bi ame bân ka hanyâûâ hnyi hnyimaköbun ka hnyi Joridano, tangen ûhihinyköu anyin Thaniny hmeledrany hia.

¹² Anyin a wale öbun e he ka ûca tavat a twelv ûnyi hnyi je tribu anyin at Isaraela, ûsa khaca ûnyi hnyi je tribu.

¹³ Ke e ka tot hnyi Joridano hnyeûcan je hnyat ödrin e vadren tang anyi Iehova, Thaniny hmeledrany hia, me ame he ka subâ luâ but köien Joridano, wale ûnyi hnyi köiö ame di ûheny hnyi hwadrö; ke ame he ka tot helâ me khölöki:

¹⁴ Ke e ka he but tavat ûheny hnyi umödrin je uma mano he ka hanyâûâ Joridano, ke ame vadren tangen ûhihinyköu hnen tavat bihut hnyi hnyimakan tavat;

¹⁵ ke ödrin ka o hnyi Joridano tavat ödrin e vadren tang, ke ka kâlâ baten köiö hnen li can tavat bihut, hnyat ödrin e vadren tang, (ke Joridano ame öliâ je baten hia hnyi ûen menu hia,)

¹⁶ me ame todru köiö ûheny hnyi hwadrö ame görany dö helâ me khölöki ûsâkâûö, hwân Adamu, wale taun cicö Zaretana: ke ame hme köiö ame di ka hnyi köien dok ae tha hon, wale Köiö ae Hiny, ame subâ but: me ame he hanyâûâ ge tavat cicö Jeriko.

¹⁷ Ke ame tot me ca bwebwet tavat bihut, hnyat ödrin e vadren tangen ûhihinyköu anyi Iehova, hnyi dok ae mada, wanben Joridano, ke adre me he hanyâûâ hnyi dok ae mada a at Isaraela hia thithö ke ne o but ame hanyâûâ Joridano haen tavat hia.