Josua 23 - Iaai Bible 1901 (New Caledonia)

¹ KE hwaban je bong ae se, ke Iehova ame hia but omenâ at Isaraela ûnyi ge je iwahnaihmiony mödra igigilö, ke hingat ut Josua ke se hia hunainy;

² me haba Josua ame hawâ at Isaraela hia thithö, me wahingatidra, me anyidra je ban, me tavat owisa ködra, me je homakan gadra, me ha ködra, ka habe, Iny hingat ut, ke se hia je hunaik:

³ öbun e hia but wâ ta je ûnyi a ânyâ Iehova Khongubun ka je hnyei hia eang cabun: anyin a Iehova Khongubun, me wale at ame vat hobi köbun.

⁴ Wâ bi, oge hia but khenâ köbun je kolon je hnyei ang, me hwajekhon anyibun je tribu, hwân hnyi Joridano, me je hnyei oge hia but ohia, ke ne o but ka hnyi köiö ae gan cicö hna dit hnen seûno.

⁵ Ke ame be Iehova Khongubun ka obʼ ödrin hnyi hnyimaköbun, me ohiʼ ödrin unyibun; ke ame he bi ka hwajekhöubun idrin hnyei helâji me Iehova Khongubun ame ha köbun.

⁶ Anyin a wale hwege thʼ öbun he ka tuö me ânyâ ta je ûnyi hia adre sihnalimen hnyi tusi hnanyibu anyi Mose, me ca saû bi ka hnyi ke keihen metâ me me;

⁷ mʼ öbun e ca he bi ka laba unyin je hnyei eling, wale je kolon unyibun, me ca ha ien anyidrin je khong, me khemanyinâ, me huliwa ködrin, me khudrung ködrin:

⁸ ke so bi öbun e he ka kece kö Iehova Khongubun, helâ me hnobun hna ânyâ ke ne o but hnyi bong ang.

⁹ Anyin a hia but Iehova obâ hnyi hnyimaköbun je hnyei ae gan me hwege: ke haba öbun, me ba at ame tot hnyi hnyimaköbun ke ne o but hnyi bong ang.

¹⁰ Ame he at a khaca gabun ka hnu thauzan: anyin a Iehova Khongubun ame vat hobi köbun, helâ me hnen hna ha köbun.

¹¹ Anyin a wale wâ wia bi öbun he ka hnyok kö Iehova Khongubun.

¹² Ke öbun e ne hmetu ju, me kece ka je kolon je hnyei eling, wale je kolon unyibun, me faipoipo mödrin, me he ködrin, ke ödrin, ödrin e he köbun:

¹³ awe, wâhmakhmeto ju öbun a gʼ ame ca he hmetu bi Iehova Khongubun ka obâ je hnyei eling hnyi hnyimaköbun; ke ödrin e he ka hnân je hnewe me je ofific köbun, me je osö hnyi je vhaköbun, me ûdö hnyi je li emaköbun, ke ne o but ame hiʼ öbun ûnyi hnyi hnyei ae so a ham köbun Iehova Khongubun.

¹⁴ Ke wâ bi, oge me he ka vheno hnyi bong ang gethen deny aten hmeledrany hia: ke e khanʼ öbun dut hnyi ta je hnyok me je hanubun, ae ca haû ke ûnyi hnyi ta je ûnyi hia ae so a ha Iehova Khongubun gabun; e hwâdâ hia köbun, he ca haû bi ke ûnyi a khaca.

¹⁵ Ke e hwâdâ köbun ta je ûnyi hia ae so a ha köbun Iehova Khongubun, awe, helâe ame he Iehova ka oātâ köbun ta je ûnyi hia ae kong, ke ne o but e ame hiʼ öbun hia but ûnyi hnyi hnyei eang ae so a ham köbun Iehova Khongubun.

¹⁶ Öbun ka he ka hanyâûâ ûhihinyköu anyi Iehova Khongubun, wale e ame hûna köbun, me he ka bi athnyaba ke je khong bi me khudrung ködrin: awe, ame he ka ubâhlâ hmönyin anyi Iehova köbun, ke ame he ka logot hiʼ öbun ûmyi hnyi hnyei ae so wale e ame hia but ham köbun.