Josua 20 - Iaai Bible 1901 (New Caledonia)

¹ KE Iehova ame ha kö Josua, ka kabe,

² Ha thö ka lakon Isaraela, ka habe, Kû thö je taun hnân lubaduöng hnyin, waleji oge ha köbun a deny Mose:

³ me me kec ka hnyin at ame hlingâ at, wale a hlingâ at kʼ ame utöteta ke ca khana: ke haba je dok e me hnân lubaduöng hnyin hobi köbun ûnyi ge at ame bi hwaban komok.

⁴ Me e ame he ka kec ka hnyi ke taun eling, me tot hnyi homagouleny taun, me haimemenâ hwan hofuc ka wahingatiny taun eling; ke ödrin e he ka kap e ka hnyi taun eling unyidrin, kʼ ödrin e he ka ham kâu ke dok, ke e ame he ka tha laba mödrin.

⁵ Ke ame ne hnu hoton e ge at ame bi hwaban komok, me ödrin e ca he ka hna kâu at ame hlingâ at; anyin a e ame kot ke at ke ca khana bi, kʼ ame ca hûkötiâ ehac.

⁶ Ke e ame he ka laba hnyi taun eling ke ne o but e ame tot hnyi hnyimakan ûkhacaköu mʼ adre owisa, ke ne o but ame mokcu at bihut ae beönua hnyi ûen eling: me waleling ame he ka he hmetu at ame hlingâ at ka hnyi anyin taun me umen uma, wale taun e ame kec ûnyi hnyin ehac.

⁷ Me ödrin e kû Kadesi hnyi Galelaia hnyi bucen Nafatali, me Sekema hnyi hnyei ae hut hnyi Eferaima, me Kiriatha-areba (wale Heberona), hnyi hnyei ae hut hnyi Juda.

⁸ Ke hnyi hoton Joridano e Jeriko ke e deiö, me ödrin e kû Bezeri hnyi hnyebuba hnyi dok ae tha hon ûnyi hnyi tribu Reubena, me Ramotha hnyi Gileada ûnyi hnyi tribu Gada, me Golana hnyi Basana ûnyi hnyi tribu Manase.

⁹ Wale je taun adre kû hobi kâu je lakon Isaraela hia thithö, me je atkanyua adre me laba unyidrin, me me kec ka hnyin tavat hia adre me hlingâ at a utöteta, me me ca mok ge hnyamen at ame bi hwaban komok, ke ne o but e ame tot hnyi hnyimakan ûkhacaköu.