Josua 2 - Iaai Bible 1901 (New Caledonia)

¹ KE haba Josua nöku Nuna ame kunâ duöngâ ûheny Sitima li at he ka ecmak, me ha, ka habe, He thö ka wâ hnyei, me Jeriko. Me ödru me he me o ka hnyi uma umen momo hnyi gethen, Rahaba ien, me mokut eling.

² Me adre me thumeto thaniny Jeriko, ka habe, Wâ bi, ame he jem li at eja hnyinghet ûheny unyin lakon Isaraela, he ka ecmâkâ hnyei.

³ Me haba thaniny Jeriko ame ûkhûnöng kö Rahaba, me ha, ka habe, Hom but jem li at a o köu, wale ödra dit ka hnyin umâm uma; anyin a ödre o he ka ecmâkâ hnyei.

⁴ Ke haba momo ame hom li at me ikhölʼ ödru; me haingen, ka habe, E hnathu a o könya li at, ke ca khanö nya dok ödre mwi hnyin:

⁵ ke haba hnyi ûen adre me he ka hlöng homagöule hnyi lit, me ame didrut li at, ke ca kbanö nya dok ödre me he ka hnyin: tiga wadring hotudra anyin a öbun e he ka kot ödru.

⁶ Ke a hia but momo hum ödru ka hnyi hon ban uma, me tubi ödru ge je thi lino wale e ame ip gaga ethö hnyi hon han uma.

⁷ Ke haba tavat ödrin e wadring hotudru hnyi gethen deny Joridano, ke ne o but hnyi je dok ae cöcö: ke adre me ie hlöng homagöule hwaban hna didrut tavat he ka hnu hotudru.

⁸ Ke ödru tiga ca mokut, me momo ame ölö thö ködru ka hnyi hon ban uma;

⁹ ke e ame ha ka li at, ka habe, E khanö nya a Iehova ame ham köbun hnyei, ke a o but kohmun ot gabun, kʼ ame aû but aten hnyei hia thithö hnyi hnyimaköbun.

¹⁰ Ke öhmun e hia but long a Iehova ame ohmö köien Köiö ae Dra i hobi köbun, hnyi ûen öbun e he jem ûheny Aigupito; ke hnöbun minya hna ânyâ ka li than Amora hnyi hoton Joridano, a Sihona, me Oga, waleji öbun e ohia.

¹¹ Ke öhmun e long e, me ame köiö but je hnyekuhmun, ke ba hmetu tang hwege eû hnyi hnyekon ke at, cabun: anyin a Iehova Khongubun me e thibi Khong ethö hnyi drany, me eang hmelen.

¹² Ke walang ang ö öbu khemanyin könya hnyi iö Iehova, a öbu me be ka betenge ge lap anyi cica helâ me oge me betenge gabu, ke ham könya haten ae hnathu:

¹³ ke omeli cica, me bai, me lahanik, me je liamekeiny mönya, me ta je ûnyi hia unyidrin, ke: omeli öhmun, mʼ öhmun e ca he bi ka mok.

¹⁴ Ke ame thu ka momo hnen li at, ka habe, Öhmu me he ka mok hwaböbun, öbun e ne ca he ka omanenâ ûhemnu eang; ke e ka āt bi a gʼ ame he Iehova ka ham kohmun hnyei; me öhmun e he ka ânyâ hwakecin ae betenge me hnathu köu.

¹⁵ Me e ame öû ödru ge tö ûheny hnyi mamalama: anyin a umen uma, me ethö hon haginy taun adre up, ke e ame laba hnyi hon hna up haginy.

¹⁶ Ke e ame ha ködru ka habe, Kec dʼ öbu ka hnyi bucen, wâ e nye ûkhanö möbu tavat ûhnûhnû; me öbu me lubaduöng eling hnyi kun ta bong, ke ne o but ame hmetu tavat ûhnûhnû: ke hwa ban e, mʼ öbu he thö.

¹⁷ Me ame ha kâu li at, ka habe, öhmu me he ka gufa hnyi hna khemanyin eang u me kunʼ öhmun hnyin.

¹⁸ Wâ bi, öhmun ka e hnyi hnyei eang, hamâm he ka hûkâlâ tö ae dra eang hnyi mamalama u je hnʼ ohmu hnyin: ke u me he ka ûkhacaköuâ unyâm e hnyi hnyabam eang kâmâm me hinyâm, me je liamekeiny mou, me lap hia anyin kâmâm.

¹⁹ Ke haba at ame he ka dit kâû ka hnyi gethen ûnyi hnyi hwanumen umâm uma, me ame he ka takoû ban ge dren bi, ke öhmu me he biju ka gufa: ke haba tavat a tha e möu hnyin uma, ame he ka takoû böhmu ge drödrin, e ka hu at ame he ka hinöbeny ködrin.

²⁰ Ke so bi, u je ne omanenâ ûhehmu eang; me öhmu me he ka gufa hnyi hna khemanyin u je kunʼ öhmu hnyin.

²¹ Me haingen, ka habe, Ame he ka helâ me hnöbu hna ha. Ke e ame kunʼ ödru, me ödru me he: me e ame hûkâlâ tö ae dra hnyi mamalama.

²² Ke ödru me he but me o ka hnyi bucen me laba eling hnyi kun ta bong, ke ne o but ame hmetu tavat ûhnûhnû: ke adre elöm ödru hnyi gethen hia ge tavat ûhnûhnû, me ödrin e ca wâ bi.

²³ Ke ame hmetu li at, me utut ûheny hon bucen, me hanyâûâ me o unyi Josua nöku Nuna; me ödru me thumeto e ge ta je ûnyi hia a o ködru,

²⁴ Ke ödru me ha ko Josua, ka habe, E hnathu a hia but Iehova hna kötin hnyei hia; he haba khaca ame köiö hnyekon tavat hia thithö a aten idra hnyei, ûnyi gata.