Josua 18 - Iaai Bible 1901 (New Caledonia)

¹ KE ame ûkhacaköu tavat a lakon Isaraela hia hnyi Silo, ke adre me otilâ eling uma mano a uma ûkhacaköu: ke ame ngâ but hnyei hnyi hnyimaködrin.

² Ke seven biju je tribuiny lakon Isaraela a ödrin tiga ca khenâ jekhöûdrin.

³ Ke Josua ame ha ka lakon Isaraela, ka habe, Ieû gabun öbun e bec he ka he me hûgûnâ hnyei wale a ham köbun Iehova Khongon lakamöbun?

⁴ Uca thö unyibun ke je hnyat ûsa kun hobi kâu je tribu: me oge me he ka kunʼ ödrin, ke ödrin e he ka todrö me vheno hnyei, me omanenâ e hoton je jekhöûdrin; me ödrin e he ka he jem könya.

⁵ Ke ödrin e he ka kia sevenâ: ame he Juda ka laba hnyi hnyigöulen ka hnyi hwaiöu, ke ame he lap anyi Josefa ka laba hnyi hnyigöulödrin ka hnyi hwadrö.

⁶ Ke öbun e he ka omanenâ hnyei me me seven, me hom jem könya hna omanenâ eling: me oge me he ka ugleköbâ hobi köbun eang hnyi hnyimakö Iehova Khongutin.

⁷ Anyin ae ba iny at Levi unyibun; anyin a haba hanymen tavat bihut kö Iehova, wale jekhöûdrin: ke haba Gada, me Reubena, me hafiny tribu Manase, ödrin e hia but kap jekhöûdrin hnyi ke keihen e deiö Joridano, wale a ham ködrin Mose athnyabai Iehova.

⁸ Me ame todrö tavat me he: ke Josua ame hûna ködrin wale hnyat ödrin e he he ka omanenâ hnyei, ka habe, he thö, me vheno hnyei, me omanenâ e, ke hmetu ju könya, me oge me he ka ugleköbâ eang hobi köbun hnyi hnyimakö Iehova hnyi Silo.

⁹ Me ame he tavat me vheno hnyei, me omanenâ e hnyi tusi hoton je taun me me seven, me ödrin e o kö Josua hnyi hna hunuma hnyi Silo.

¹⁰ Ke Josua ame ugleköbâ hobi ködrin hnyi Silo hnyi hnyimakö Iehova: ke Josua ame khenâ eling hnyei ka lakon Isaraela hoton je jekhöûdrin.

¹¹ Ke ame āt dö ge leköp tribu anyin laku Beniamina hoton anyidrin je lap: ke ame hnyigöulen jekhöûdrin hnyi wanben laku Juda, me laku Josefa.

¹² Ke haba hnyigöulödrin ka hnyi hwadrö, hwân hnyi Joridano; ke ame he hnyigöulen ka hnyi ke keihen hwadröiny Jeriko, me he ka hnyi hnyei ae hut e jio; kʼ ame umo hnyi hnyebuba Beth-aven.

¹³ Ke ame he bala hnyigöulen ûheny e Luza ai, ka hnyi ke keihen Luza (wale Beth-ela) ka hnyi hwaiöu; ke ame he bala hnyigöulen Ateroth-adara ai ka hnyi bucen hnyi hwaiöu hnyi Bethe-horona eû.

¹⁴ Ke adre me tuluto hnyigot me khenyi hnyi ke keihen e jio ka hnyi hwaiöu, hwân hnyi bucen cicö Bethe-horona hnyi hwaiöu; ke adre me umo e hnyi Kiriatha-baala (wale Kiriatha-jarim), ke tauniny laku Juda: wale ke keihen e jio.

¹⁵ Ke haba ke keihen ka hnyi hwaiöu ame hwân hnyi obiny Kiriatha-jarim, ke ame he hnyigöulen e jio, me umo hnyi je an ame pupua e Nefetoa:

¹⁶ ke ame o hnyigot ka hnyi obiny bucen cicö hnyigöulen bucen anyi nöku Hinom, wale hnyi hnyigöulen bucen anyin tavat ae beû ka hnyi hwadrö; ke ame he ka hnyi hnyigöulen bucen anyi Hinom ka hnyi ke keihen at Jebusi ka hnyi hwaiöu, me he Eni-rogel ai;

¹⁷ ke adre me tuluto hnyi hwadrö me umo hnyi Eni-semes, me he Geliloth ai, wale cicö gethen ame ölö Adumim ai; kʼ ame he ka hnyi veto anyi Bohan nöku Reubena;

¹⁸ ke ame he bala ka hnyi ke keihen cicö Araba hnyi hwadrö me he Araba ai:

¹⁹ ke ame he bala bi hnyigot ka hnyi ke keihen Beth-ogela hnyi hwadrö: ke adre me umo hnyigot hnyi bweduainy Köiö ae Hiny ka hnyi hwadrö, hnyi obiny Joridano ka hnyi hwaiöu: wale hnyigöulen ka hnyi hwaiöu.

²⁰ Ke haba hnyigöulen e hnyi ke keihen e deiö, me, Joridano. Wale jekhon laku Beniamina hoton je hnyigöulödrin igigilö; hoton anyidrin je lap.

²¹ Ke walang je taun anyin je tribuiny laku Beniamina hoton anyidrin je lap, Jeriko, me Beth-ogela, me Emeka-Keziz;

²² me Beth-araba, me Zemari, me Beth-ela;

²³ me Avi, me Para, me Ofera;

²⁴ me Kefara-hamonai, me Ofeni, me Geba; a twelv ta je taun me je tauniny ae ûhnyûkong;

²⁵ Gibeona, me Rama, me Berotha;

²⁶ me Mizepa, me Kefira, me Moza;

²⁷ me Rekem, me Irepel, me Tarala;

²⁸ me Zela, me Elef, me Jebusi (wale Jerusalema), me Gibea, me Kiriatha; fortin je taun me je tauniny ae ûhnyûkong. Wale jekhon je laku Beniamina hoton anyidrin je lap.