Josua 14 - Iaai Bible 1901 (New Caledonia)

¹ KE walang je hnyei ame hom hnen lakon Isaraela hnyi hnyei Kanana, wale ame khenâ Eleazara at bihut, me Josua nöku Nuna, me je ban a je kamen je tribuiny lakon Isaraela hnân idrin,

² adre khene idrin ge ugleköp, helâ me Iehova ame hûna deny Mose, hobi kâu je tribu a nain, me hafiny tribu.

³ Anyin a Mose ame hia but ham iny lo li tribu me hafiny tribu hnyi ke keihen e deiö Joridano: ke e ame ca khene iny at Levi unyidrin.

⁴ Anyin a haba lo li tribu, li laku Josefa, jia Manase me Eferaima; ke ödrin e ca ham ka at Levi ke keihen hnyei; ke so bi je taun hnân me labā, me utkânâ igigilö e hobi kâu haledrin je meno me anyidrin je anyi.

⁵ Ke haba lakon Isaraela ödrin e ânyâ helâ me Iehova ame hûna kö Mose, me ödrin e khenâ hnyei.

⁶ Ke ame he laku Juda kö Josua hnyi Gilegala; me ame ha kâu Kaleba nöku Jefune at Kenaza, ka habe, E khatö u ûnyi a ha Iehova kö Mose aten Khong gatu hnyi Kadesi-banea.

⁷ Fâte but je hunaik hnyi ûen ame kunö nya Mose athnyabai Iehova, ûheny Kadesi-banea he ka ecmâkâ hnyei; ke oge me hmetoâ je hofuc ae eû hnyi hnyekuk.

⁸ Ke so bi haba je liamekeiny mönya, adre tha he mönya, ödrin e oköiâ hnyekon tavat: ke oge me tha hnu hotu Iehova Khonguk.

⁹ Ke Mose ame khemanyin hnyi bong eling, me ha, ka habe, E hnathu hnân em me je mâtrânâm nyiele balua hnyei e u je uto, anyin a u je hia but tha hnu hotu Iehova Khonguk.

¹⁰ Ke walang ang, wâ bi, Iehova ame omeli nya tilö nya hnyi ta je huna eang a fâte faiv helâji me hnen hna ha, hwân hnyi ûen Iehova ame ha hofuc i eling kö Mose, kʼ ame tiga he Isaraela hnyi hnyebuba: ke walang ang, wâ bi, eite faiv je hunaik.

¹¹ Iny tiga hwege bala bi hnyi bong ang, helâji me bong a kunö nya hnyin Mose; haba tang hwegiök walang me helâji me tang hwegiök ehac, hnân vat, ke hnân didrut me didro.

¹² Anyin a wale ham könya bucen eang, wale Iehova ame ha gan hnyi bong eling; auyin a u je long hnyi bong eling a ka eling at Anaka, me je taun ae gan adre up haginy: me ame ne he la Iehova ka tha e mönya, me oge me he ka obʼ ödrin helâ me Iehova ame ha.

¹³ Ke haba Josua ame hahnahicâ e, me ham Heberona kö Kaleba nöku Jefune, me me iny.

¹⁴ Anyin a wale haba Heberona me i Kaleba nöku Jefune at Kenaza ke ne o but hnyi bong ang; anyin a e ame tha hnu hotu Iehova Khongon at Isaraela.

¹⁵ Ke haba ien Heberona ehac me Kiriath-areba; haba Areba eling me wale at ae beönua unyin at Anaka. Kʼ ame menâ hnyei ke ba vat.