Josua 11 - Iaai Bible 1901 (New Caledonia)

¹ KE a long ut Jabin thaniny Hazora, me e ame ukhûnöng kö Jobab thaniny Madon, me thaniny Simerona, me thaniny Akesafa,

² me ka je thaniny hnyi hwadrö, wale hnyei ae hut, me dok ae tha hon hnyi Kinereth ke e hwaiöu, me hnyi hnyei ae ca hut, me je dok ae göranyiny Dora e jio,

³ me tavat Kanana e deiö me jio, me at Amora, me Heth, me Perizi, me at Jebusi hnyi je bucen, me at Hivi hmelen Heremona hnyi hnyei Mizepa.

⁴ Me adre me he but, ödra me anyidrin je utbavat hia thithö, e se hia tavat, helâ me önyin hobat köiö ûseiny, me je hos, me je kariota ae se hia.

⁵ Ke ame ûkhacaköu je than hia thithö eling, me adre me he but me tha hunuma cicö an Meroma, he ka vat me at Isaraela.

⁶ Ke Iehova ame ha kö Josua, ka habe, Ca he ka oût ödra; anyin a nyi hnyi ûen a helâng, oge me he ka hnʼ ödra hia thithö adre hlingʼ ödra, hnyi hnyimakan at Isaraela: u me he ka sö can haledrin je hos, me le anyidrin je kariota ge meic.

⁷ Ke haba Josua me tavat hia thithö adre me tha o outhmoki ödra hnyi an Meroma, me utut ködra.

⁸ Ke Iehova ame hnʼ ödra ka at Isaraela, me adre me kuc ödra, me hnu ödra ke ne o but Zidona ae gan, ke ne o but Miserefo-maim, me hnyigöulen bucen Mizepa e deiö; me adre me kuc ödra ke ne o but ame ba but kolon.

⁹ Ke Josua ame ânyâ ködra helâ me Iehova ame ha kâu: e ame sö can haledrin je hos, me le anyidrin je kariota ge meic.

¹⁰ Ke haba Josua ame hmetu hnyi ûen eling me hûgûnâ Hazora, me hlingâ thaniny ge hele vat: anyin a Hazora me wale ban je dökhu eling hia thithö ehac.

¹¹ Ke adre me kot tavat hia thithö hnyin ge hele vat, adre me tha ohiʼ ödra: ke ba kolon ame menâ: ke e ame le degecâ Hazora ge meic,

¹² Ke haba Josua ame hûgûnâ je tauniny je than eling hia thithö, me je thaniny hia, me hling ödrin ge hele vat, me ti ohiʼ ödra; helâji me Mose athnyabai Iehova ame hûna.

¹³ Ke haba je taun ame tot ethö hon anyidra je utkânâ ae görany, me at Isaraela adre me ca thong degecâ; ke Hazora thibi; Josua ame thong degecâ e.

¹⁴ Ke haba ta je omjeû hia hnyi je taun eling me omeno, me lakon Isaraela adre me hom hobi ködrin bi; ke so bi adre me hlingâ tavat hia thithö ge hele vat ke ne o but ame hiʼ ödra, ke ba but kolon ame menâ.

¹⁵ Helâji me Iehova ame hûna kö Mose a athnyabainy, ke helâe Mose ame hûna kö. Josua: me Josua ame ânyâ helâe: e ame ca i degec ke ûnyi hnyi ta je ûnyi hia a hûna Iehova kö Mose.

¹⁶ Ke Josua ame hom hnyei hia eling, a je hnyei ae hut, me je ke keihen ka hnyi hwaiöu hia, me hnyei Gosena hia, me hnyei ae ca hut, me dok ae tha hon, me hnyei ae hut hnyi Isaraela, me ke keihen e ae ca, hut;

¹⁷ hwân hnyi bucen Halaka gethen ûheny Seira ke ne o but Baala-gada hnyi hnyigöulen bucen e Lebanona, wale hmelen bucen Heremona: ke e ame hom je than hia me kuc ödrin, me hlingʼ ödrin.

¹⁸ Ke Josua ame vat me je than eling hnyi je bong ae se.

¹⁹ E ba ke taun ame ûsoköu me lakon Isaraela, ke at Hivi thibi adre labā Gibeona: adre me hûgûnâ hia hnyi vat.

²⁰ Anyin a ûnyi ga Iehova he ka okhötâ je hnyekudra, mʼ adre me he ka vat me at Isaraela, me e ame he ka ti ohiʼ ödra, mʼ adre me ca he ka betenge gadra, ke ao bi mʼ adre me he ka ohiʼ ödra, helâji me Iehova ame ha kö Mose.

²¹ Ke ame o Josua hnyi ûen eling, me subâ degecâ at Anaka walʼ ödrin hnyi hnyei ae hut, hwân Heberona, me Debira, me Anabi, me hnyei ae hut hia hnyi Juda, me hnyei minya ae hut hia hnyi Isaraela: haba Josua ame ti ohiʼ ödra me anyidrin je taun.

²² E ba but je at Anaka hnyi hnyei iny lakon Isaraela: ke hake hu kolon thiju bi hnyi Gaza, me Gatha, me Asedoda.

²³ Ke helâe Josua ame hom hnyei hia thithö helâ me je hofuc hia thithö a ha Iehova kö Mose; ke Josua ame ham e ka at Isaraela me idrin, hoton hna khenâ ködrin hnyi anyidrin je tribu. Me ame menâ ju tavat ûhedrin hnyi hna vat.