Josua 10 - Iaai Bible 1901 (New Caledonia)

¹ KE Adoni-zedeka thaniny Jerusalema ame long a ga hia but Josua hûgûnâ Ai, ke ohia e; ke ame ânyâ ka Ai me thaniny helâji me hnen hna ânyâ ka Jeriko me thaniny; ke a hia but tavat aten Gibeona ûsoköu me at Isaraela mʼ ödrin e tha laba unyidra;

² me ödrin e ot gan hmâ, anyin a haba Gibeona me wale taun ae gan hmâ, helâ me ke taun ame labā than, ke beönua e hon Ai, ke e hwege obagainy hia thithö.

³ Anyin a wale Adoni-zedeka than Jerusalema ame ûkhûnöng kö Hoham thaniny Heberona, mo Pirama thaniny Jamuth, me Jafia thaniny Lakisa, me Debira thaniny Egelona, he ka ha, ka habe,

⁴ Ai öbun könya, me hadruo nya, me otin e he ka kot Gibeona: anyin a e ame hia but ûsoköu me Josua me lakon Isaraela.

⁵ Anyin a wale ame ûkhacaköu thö je thaniny Amora a faiv, wale thaniny Jerusalema, me thaniny Heberona, me thaniny Jamuth, me thaniny Lakisa, me thaniny Egelona, me he thö, ödra me anyidra je utbavat hia thithö, me hunuma cicö Gibeona, me vat mē.

⁶ Ke haba at Gibeona ödrin e ûkhûnöng kö Josua hnyi hna hunuma Gilegala, me ha, ka habe, Ca he ka hnʼ ohmun lathnyabaem; ie he thö jem kohmun, me omeli ohmun, me hadruʼ ohmun: anyin a hia but ûkhacaköu kohmun je thaniny hia thithö at Amora, tavat ödrin e laba hnyi je bucen.

⁷ Me Josua ame he ûheny Gilegala, e me je aten vat hia thithö, me je taben tavat ae hwege hia.

⁸ Ke haba Iehova ame ha kö Josua, ka habe, Ca ot gadra: anyin oge hia but hnʼ ödra ka hnyi li hnyamâm; ke ame ca he ke at gadra ka tot hnyi hnyimâkâm.

⁹ Anyin a wale, Josua ame o outhmoki ödra; e ame he ûheny Gilegala hnyi lit ae bekhöt.

¹⁰ Ke haba Iehova ame ohmakiʼ ödra hnyi hnyimakan at Isaraela, me kuc ödra, ke gan hmâ hna kuc ödra hnyi Gibeona, me hnu ödra tilʼ ödra hnyi gethen ame ölö Bethe-horona ai, me kuc ödra ke ne o but Azeka, me Makeda.

¹¹ Ke adre ödrin me kec ge at Isaraela ke adre me tiga he hnyi hna utut Bethe-horona, me Iehova ame khûâ hudrin je veto ae gan ûnyi hnyi drany ke ne o but Azeka, me adre me mokcu: ke se hia tavat a mokcu ge je veto, wale we ae wahma, ke wakhalet thibi haniny lakon Isaraela ge hele vat.

¹² Ke Josua ame ha hofuc kö Iehova hnyi bong Iehova ame hna at Amora hnyi hnyimakan lakon Isaraela; ke e ame ha hnyi hnyimakan at Isaraela, ka habe, Seûno lö, todru u hon Gibeona; Me u Tehi hnyi hnyigöulen bucen Aijalona.

¹³ Me ame todru seûno, ke ame todru tehi, Ke ne o but hnyei ame bi hwaban ka ta je iwahnaihmiony. Hawa, adre ca sihnalimen e hnyi tusi Jasera? Haba seûno ame tot hnyi wanben drany, kʼ ame ca logot bi he ka dit helâke bong ae bekhöt.

¹⁴ Ke ba ke bong helâe ehac ke hwaban e, wale Iehova ame löng ifucin at: anyin a Iehova ame vat hobi kâu at Isaraela.

¹⁵ Ke haba Josua me at Isaraela hia adre me tha hmetu ka hnyi hna hunuma Gilegala.

¹⁶ Ke ame kec je than eling a thabûng me lubaduöng hnyi op e Makeda.

¹⁷ Ke adre me thumetu Josua, ka habe, Adre wâ je than a thabûng ödrin e lubaduöng hnyi op e Makeda.

¹⁸ Ke Josua ame ha, ka habe, Tetebulo but je veto ae gan ka hnyi hnyimen op, ke kunâ tavat he ka tuʼ ödrin:

¹⁹ ke ca bec öbun; hnu je iwahnaihmiony möbun, me kot tavat wale a bilidra; ca hnʼ ödra bi he ka dit ka hnyi anyidra je taun: anyin a Iehova Khongubun ame hnʼ ödra köbun.

²⁰ Ke a um dö kuc ödra Josua me lakon Isaraela, ke gan hmâ hna kuc ödra ke ne o but ame ba but, ke haba kolon ödrin e dit ka hnyi je taun adre up haginy,

²¹ me ame hmetu tavat hia ka hnyi hna hunuma kö Josua hnyi Makeda, hnyi hnahic: ke ame ca bwebwet bohmen ke at ka lakon Isaraela.

²² Ke Josua ame ha, ka habe, Khong uthnyimen op, ke hom jem könya je than eling a thabûng ûnyi hnyi op.

²³ Me adre me ânyâ helâe me hom kâu je than eling a thabûng, ûnyi hnyi op, a than Jerusalema, me than Heberona, me than Jamuth, me than Lakisa, me than Egelona.

²⁴ Ke ödrin e hia but hom kö Josua je than eling a thabûng, me haba Josua ame hawâ at Isaraela hia thithö, me ha ka je taben vat a tha he mē, ka habe, Ai öbun jem me uto ju nyin je than eang. Me ödrin e he me uto je nyidrin.

²⁵ Ke haingö Josua ködra, ka habe, Ca ot bi, ke ca öbubuny; hwege thö me hnyok baga but öbun; anyin ame he Iehova ka ânyâ helâe ka je iwahnaihmiöny hia thithö möbun tavat öbun e vat mödrin.

²⁶ Ke hwaban e Josua ame kuc ödrin me hlingʼ ödrin, me uhni ödrin hon je ûö a thabûng: me ödrin e uhni hon je ûö ke ne o but sahac.

²⁷ Ke ame he bi seûno ka dit, me haba Josua ame hûna, mʼ adre me hum ödrin hnyikânâi ûnyi hnyi je ûö, me khûʼ ödrin ka hnyi op, wale ödrin e lubaduöng hnyin, me ip je veto ae gan ka hnyi hnyimen op ke ne o but hnyi bong ang.

²⁸ Ke Josua ame hûgûnâ Makeda hnyi bong eling, me kot e ge hele vat, me thaniny e; e ame ti ohiʼ ödrin me tavat hia thithö hnyin, e ame ca hna bi ke kolon a khaca: ke e ame ânyâ ka thaniny Makeda helâ me hnen hna ânyâ ka thaniny Jeriko.

²⁹ Ke Josua ame tha he me at Isaraela! hia thithö, ûheny Makeda, Libena ai, me vat me at Libena:

³⁰ ke Iehova ame hna minya e me thaniny e ka hnyi hnyamen at Isaraela; ke e ame kot e ge hele vat, me tavat hia thithö hnyin; me ba kolon biju; ke e ame ânyâ ka thaniny e, helâ me hnen hna ânyâ ka thaniny Jeriko.

³¹ Ke Josua ame tha he me at Isaraela hia thithö ûheny Libena, Lakisa ai, me hunuma cicö e, me vat mē:

³² ke Iehova ame hna Lakisa ka hnyi hnyamen at Isaraela, me e ame hûgûnâ e hnyi bong a loiny, me kot e ge hele vat, me tavat hia thithö hnyin, helâ me hnen hna ânyâ ka Libena.

³³ Me ame he but Horema thaniny Gezera he ka hadruâ at Lakisa; ke haba Josua ame kot e me lakeiny ke ne o but ame ba but kolon.

³⁴ Ke Josua ame tha he me at Isaraela hia ûheny Lakisa, Egelona ai; me hunuma cicö e, me vat mē:

³⁵ ke ödrin e hûgûnâ e hnyi bong eling, me kot e ge hele vat, ke e ame ohia tavat hia thithö hnyin hnyi bong eling helâji me hnen hna ânyâ hia ka Lakisa.

³⁶ Ke Josua ame tha he me at Isaraela hia thithö ûheny Egelona, Heberona ai, me vat mē:

³⁷ ke ödrin e hûgûnâ e, me kot ge hele vat, me thaniny, me je tauniny hia, me tavat hia hnyin; e ame ca hna but kolon, helâji me hnen hna ânyâ hia ka Egelona: ke e ame ti ohia e me tavat hia thithö hnyin.

³⁸ Ke haba Josua ame tha hmetu me at Isaraela hia Debira ai; me vat mē:

³⁹ ke e ame hûgûnâ e, me thaniny, me je tauniny hia thithö; ke adre me kuc ödrin ge hele vat, me ti ohia tavat hia thithö hnyin; e ame ca hna but ke kolon: helâji me hnen hna ânyâ ka Heberona, helâe minya e ame ânyâ ka Debira me thaniny; ke helâji me hnen hna ânyâ ka Libena me thaniny.

⁴⁰ Me haba Josua ame kot hnyei hia ae hu buceniny, me hnyi Hwaiöu, me hnyei ae ca hut, me je hwatapkolu, me je thaniny hia thithö; e ba kolon e ame hna: ke e ame ohia ta je ûnyi hia ae hu homenâ, helâji me Iehova Khongon at Isaraela ame hûna.

⁴¹ Ke haba Josua ame kuc ödra hwân Kadesi-banea ke ne o but Gaza, me hnyei hia hnyi Gosena ke ne o Gibeona.

⁴² Ke haba Josua ame hûgûnâ je than eling hia me idrin je hnyei hnyi khaca thibi ûen, anyin a Iehova Khongon Isaraela ame vat hobi kâu at Isaraela.

⁴³ Ke haba Josua ame tha hmetu me at Isaraela hia, ka hnyi hna hunuma e Gilegala.