Josua 1 - Iaai Bible 1901 (New Caledonia)

¹ HWABAN mok a Mose athnyabai Iehova, me haba Iehova ame ha ko Josua nöku Nuna, athnyabai Mose, ka habe,

² A mokcu Mose athnyabaik; ke walang: ang todrö, he thö ka hanyâûâ Joridano eang, a u, me tavat eang hia thithö, ka hnyi hnyei oge me ham ködra, wale ka lakon Isaraela.

³ Haba ta je dok hia thithö ame he ka uto ge li hnyeûcabun, me, wale oge me ham köbun, helâji me hnok hna ha ko Mose.

⁴ Hwân hnyi hnyebuba, me Lebanona eang, ke ne o but ka hnyi wagewe ae gan, a wagewe Euferate, a hnyei hia iny at Heth, ke ne o but hnyi köiö ae gan cicö hna dit hnen seûno, wale hnyegöulöbun.

⁵ E ba at ame he ka khana ka tot hnyi hnyimâkâm hnyi je bong bongon ânyâm möt; oge me he ka tha inya mou helâji me hnok hna tha e me Mose: ame ca he ka hiö nya unyâm me hna degeci u.

⁶ Hwege thö, ke hnyok baga but: anyin a hamâm he ka ohuâ hnyei ka tavat eang, waleji oge me khemanyin he ka ham ka lakamödra.

⁷ Ke so bi, hwege thö, me ti hnyok baga, mʼ u me he ka wâ wia me ânyâ hia hnanyibu a hûna köu Mose a athnyabaik: ca saû thö ûheny e ka hnyi ke keihen metâ, me me, mʼ u me he ka hu hnahic hnyi je dok hia u me he ka hnyin.

⁸ Haba tusiny hnanyibu eang, me ame ca he ka hia ûnyi hnyi hnyimâm, ke u me be ka ûnykûme e hnyi lany me lit, me tuö me ânyâ hia helâ me hna sihnalimen hnyin: mʼ u me he ka so hnyi dem je gethen, mʼ u me he ka hnahic.

⁹ Hawa, oge ca hûna köu? Hwege thö, ke hnyok baga but; ca ot, ke ca öbubuny bi, anyin a e bi unyâm Iehova Khongom hnyi je dok u me be ka hnyin.

¹⁰ Ke haba Josua ame hûna ka je homakan ge tavat, ka habe.

¹¹ He thʼ öbun ka hnyi wanben je hna hunuma, me ha ka tavat ka habe, Bi kamejibun ju; anyin a kun biju ta bong, me öbun e he ka hanyâûâ Joridano eang, me e jio be ka hom hnyei Iehova Khongubun ame ham köbun hnân ibun.

¹² Ke haba Josua ame ha ka at Reubena, me Gada, me hafiny tribu Manase, ka habe,

¹³ Ûnykûme thö hofuc waleji Mose athnyabai Iehova ame hûna köbun, ka; habe, ame he Iehova Khongubun ka omenʼ öbun, me ame he ka ham köbun hnyei ang.

¹⁴ Ame he je laöiöbun, me je lakubun ae ûhnyûkong, me halebun je meno, ka laba biju hnyi hnyei Mose ame ham köbun hoton Joridano; ke so bi, öban e ne ka he me ta je ûnyi hnân vat hnyi hnyimakan je liamekeiny möbun, je hnyat hia ae hwege he ka vat, me hadruʼ ödrin,

¹⁵ ke ne o but a hia but Iehova omenâ je liamekeiny möbun, helâ möbun, me ödrin e hia but hom hnyei Iehova Khongubun ame ham ködrin; ke hnyi ûen e, öbun e he ka hmetu ka hnyi ibun, me labā e, wale Mose athnyabai Iehova ame ham köbun hoton Joridano, ricö hna o hnen seûno.

¹⁶ Ke ödrin e thu kö Josua, ka habe, ohmun e ha ka tha ânyâ hia hnâm hna hûna kohmun, me he ka hnyi dok u me kunʼ ohmun kâu.

¹⁷ Öhmun e he ka ling u helâ me hnöhmun hna ling Mose hnyi ta je ûnyi hia thithö: ke e na tha e ju mou Iehova Khongom, helâ me hnen hna tha e me Mose.

¹⁸ Ke haba at ame he ka ûkhin fuc ge ânyâm hnanyibu, me ca long hwâm hofuc hnyi ta je ûnyi hia a me he ka hûna kâu, me adre me he ka hlingâ e: ke so bi hwege thö, me hnyok baga but.