Jona 1 - Iaai Bible 1901 (New Caledonia)

¹ AME o but hofuc ho Iehova kö Jona nöku Amitai ame ha, ka habe,

² Todrö he thö Nineve ai, wale taun ae gan, me fuc hwege ûcon; anyin a o but hnyi hnyimakök anyidra monu.

³ Me haba Jona ame tpdrö me kec Tasesa ai ge hnyimakö Iehova; ke e ame he Jopa ai, me wâ ke hu ame he Tasesa ai: ke e ame bi hwaban hna houden e, me dit hnyi hnyin hu, he ka tha kec mʼ ödrin Tasesa ai, ame kec ge hnyimakö Iehova.

⁴ Ke haba Iehova ame kunâ ang ae gan ka hnyi köiö, me ame o but weneû ae gan hmâ hnyi köiö, ke a ne hmouca thö hu.

⁵ Me ame ot aten hu, me ve tenge ka anyidrin je khong; ke ödrin e khûâ hnyiköiöai je omjeû ûnyi hnyi hu me me hâhâ thö. Ke haba Jona, me ame hia but utut ka hnyi hnyin hu; ke e ame mokut, me mokut hnying.

⁶ Me haba tuhan hu ame ölö but kâu me ha, ka habe, Ieû gam u at mokut hnying? todrö me tenge ka Khongom, ame ne he Khong ka ûnykûmi otin, me otin e ca mok.

⁷ Ke ödrin e ûhaköuâ, ka habe, Otin a ugleköp, me me manen kötin can ia ame o ûnyi eang ae kong kötin. Me ödrin e ugleköp me ame hwâdâ kö Jona leköp.

⁸ Me ödrin e ha kâu, ka habe, Ö u ha thö kohmun ûnyi ga ia ûnyi ang ae kong kötin; ieû hanymâm? ke ûhem ua? ewa em hnyei? ke u at ua?

⁹ Haingen ködrin, ka habe, Iny at Heberu; ke inya oge me outö Iehova, Khongon drany, at ame op köiö me hot.

¹⁰ Me ame ot gan hmâ tavat me ha kâu, ka habe, Ieû ke ûnyi ang u je hia but ânyâ? anyin ae khana but tavat a e ame kec ge hnyimakö Iehova, anyin a e ame hia but thumetu ödrin.

¹¹ Me haingödrin kâu, ka habe, Ieû ohmun e he ka ânyâ köu me me ta but hau hon köiö kohmun? anyin ame hwege tot je waköiöiny köiö.

¹² Ke haingen kodra, ka habe, Hum nya thö, me khûö nya but hnyiköiöai; me me he ka ta but hau hnyi köiö köbun: anyin ae khanö nya ame o but weneû ang ae gan hnyi köiö köbuo, cak thibi.

¹³ Ke so bi tavat ödrin e hwege galu, he ka he hmetu hot ai; ke ca khanʼ ödrin bi; anyin ame hwege tot köiö ködrin.

¹⁴ Anyin a wale ödrin e tenge kö Iehova, me ha, ka habe, Iehova lö, ohmun e khöû köu, öhmun e khöû köu, ohmun na ca he ju ka mok can at ang, ke ca he bi ka ip huhmun dra ae ba hnyikongon: anyin a u Iehova u je hia but ânyâ helâ me wem.

¹⁵ Me ödrin e hum Jona me khûâ hnyiköiöai: me ame ta but hau hnyi köiö hwaban hna ûkhutukhaû.

¹⁶ Haba tavat ödrin e ot gan hmâ ga Iehova, me bi hut kö Iehova, me bi khöbi.

¹⁷ Ke Iehova ame penapena wâ ae gan hmâ he ka uto Jona: ke Jona ame laba hnyi hnyekon wâ hnyi kun ta lany ke kun ta lit.