Joela 3 - Iaai Bible 1901 (New Caledonia)

¹ ANYIN a wâ bi, haba hnyi je bong eling ke ûen eling, iny ka he ka hom hmetu je bâ wale a at Juda me Jerusalema,

² me oge me he bi ka ûkhacaköuâ je hnyei hia, me hum ödra ka hnyi hnyigöulen bucen anyi Jehosafata; ke oge me he ka ûhnei mʼ ödra eling can lakeik me jekhöûk a Isaraela, wale adre oveseâ ka hnyi je hnyei, me khenâ ik hnyei.

³ Ke adre hia but ugleköbâ lakeik; kʼ adre ham da me hwaban momo hnyi gethen, kʼ adre ûcû waina me hwaban hlu, mʼ adre me he ka ic.

⁴ Eke, Turo me Sidona lö, me je ke keihen hia Filisiti, ieû gabun könya? hawa, Öbun e he ka ham könya hwaban? ke öbun e ne bi hwaban könya, me oge me he bi nya ka ie ohmeto hwaban eling ka hnyi hon je böbun.

⁵ Anyin a öbun e hia but hom anyik sileva me anyik gol, me sukhö-unâ je omjehek ae hmanenang ka hnyi je uma umen Khongubun:

⁶ ke Öbun e hia but ûco lakon Juda me Jerusalema ka at Heleni, mʼ öbun e he ka oûsâkâûʼ ödra ge idra:

⁷ wâ bi, oge me he ka höiʼ ödra ûnyi hnyi dok waleji öbun e ûcû ödra ka hnyin, me ohmeto hwaban ka hnyi hon je böbun;

⁸ ke oge me he ka ûco lakubun obaga me wahlu ka je lakon Juda, kʼ adre me he bi ödra ka ûcû ödra ka at Sheba, hnyei ae sâkâû: anyin a hia but ha Iehova.

⁹ Haimemenâ thö e ka ta je hnyei; penapena thö vat: bwebwelâ thö tavat hwege; e so e hakekeny me ölö thö tavat vat hia.

¹⁰ Kokot anyibun je ûnyi hnân wia kânâ, me me ta je hele vat bi, ke anyibun je hele subö vine, me me ta je ö bi: e so ame he at ae sënyin ka ha, ka habe, Iny hwege.

¹¹ Logot öbun, ai öbun je hnyei hia igigilo, ke ûkhacaköu thö: Iehova lö, oâ but kâe ânyâm tavat hwege.

¹² E so ame mweimwei je hnyei, me o ka hnyi hnyigöulen bucen anyi Jehosafata: anyin oge me he ka laba eling he ka owisa je hnyei igigilo.

¹³ Inâ but ûnyi hnân subö hwit, anyin a hmahmat ut widrany: ai öbun, ututo ju; anyin ae unöngöt dö hna hlic wan vine, ame bahihingölö je tangen; anyin ae gan hmâ hwakecidra ae kong.

¹⁴ Ödra se, ödra se hia hnyi hnyigöulen bucen hna owisa! anyin ae hakekeny jut bong bongu Iehova hnyi hnyigöulen bucen hna owisa.

¹⁵ A lit ut seûno me tehi, ke ame ca melam ta je okhû.

¹⁶ Ke ame he Iehova ka kuku hwege hnyi Ziona, me fuc ûnyi hnyi Jerusalema; ke ame he ka jijing drany me hmeledrany: ke haba Iehova e ame he ka hnân luabaduöng ka lakeiny, me hnabâ hobi kâu lakon Isaraela.

¹⁷ Me öbun e he ka wâ a inya Iehova Khongubun, at ame laba hnyi Ziona, anyik bucen ae kap: me ame he ka kap bi Jerusalema, ke ame ca he hmetu ta je atkanyua ka vheno e.

¹⁸ Ke haba hnyi ûen eling ame he ta je bucen ka khukhula ge waina ae hnebwia, ke ame he je hut ka di ge debai, ke ame he ka khukhutu köien je wagewe Juda; ke ame he pupua ka o ûnyi hnyi uma umo Iehova, me hû hnyigöulen bucen Sitima.

¹⁹ Ame he ka ba wan Aigupito, ke ame he Edoma ka hnyebuba ae ba wan, can hna ovecâ lakon Juda, anyin a adre hia but hingâlâ dra ae ba hnyikongon hnyi idrin hnyei.

²⁰ Ke ame he Juda ka laba hmâ, me Jerusalema, ke ne o but hnyi ta je dö.

²¹ Ke oge me he ka haisoâ drödra waleji oge me tiga ca haisoâ: anyin a Iehova ame laba hnyi Ziona.