Joela 1 - Iaai Bible 1901 (New Caledonia)

¹ WALANG hofuc ho Iehova waleji ame a kö Joela nöku Pethuela.

² Öbun wahingat lö, long ju hofuc ang, ke tevehlöng ju öbun tavat aten hnyei. Hawa, e hu ûnyi helâng hnyi bongubun je bong, ame ne hnyi bong bongon lakamöbun?

³ Thumeto thö lakubun ge ûnyi eling, ke ame he lakubun ka thumeto lakudra bi, ke hamen lakudra ka thumeto dö a biliny.

⁴ Haba kolon ame hna ge lakon wahamon, me ame han e hnen wahamon veto, ke haba ju hna hna hnen wahamon veto, me ame han hnen oböu, ke haba hna hna hnen oböu, me ame han hnen walewi.

⁵ Hmak dʼ öbun tavat öbun e ic monu, ke tenge; ke haba öbun tavat hia öbun e ic waina, kuku tenge thö, ge waina ae hnebwia; anyin adre me subâ degecâ e ûnyi hnyi je hnyimöbun.

⁶ Anyin ame o but ke hnyei ka hnyi ik hnyei, a tavat hwege, ke ca hnân aû; haba je nyudra, me helâ me nyon liona, ke haba je ohûlûsinaidra, me helâ me ohûlûsinainy liona.

⁷ Ke e ame oba wan anyik vine, me thu anyik imeta: kʼ ame okalaötâ e, me degec; ke hau but je vheiny.

⁸ Tenge thö, helâ me hlu ame weikâ ecmano ae gan nân can âiân hlu a e.

⁹ Adre me subâ degecâ hudiny ban me hudiny ic ûnyi hnyi uma umo Iehova; kʼ ame tenge tavat bihut a lathnyabai Iehova.

¹⁰ E ba but wan ta hnyei, ame tenge kânâ; anyin ae ba but hwit, a hme thö waina ae teb ûnyi, ke ba wakaco.

¹¹ Hmehma ju öbun tavat belök, tenge thʼ öbun tavat huliwan vine, can hwit me bali; anyin ae kong ut hwit hnyi ta hnyei.

¹² E meleca thö vine, ke ba but meta; a mok dö rimona, me pama, me tapua, wale je ûöiny hia hnyei: anyin ame aû but senyin unyin tavat.

¹³ Tavat bihut lö, oweikʼ öbun ju, ke tenge; tavat huliwan taben hut lö, kuku tenge thö; lathnyabainy Khonguk lö, ai öbun, mokut hnyi lit hia hnyi mano ae gan nân: anyin ae ba hmetu hudiny han me hudiny ic hnyi uma umen Khongubun.

¹⁴ Thu bongon ju he ka ca han, hawâ thö ûkhacaköu ae ûnyi hnathu; ûkhacaköu â thö wahingat me aten hnyei hia ka hnyi uma umo Iehova Khongubun, ke tenge thʼ öbun kö Iehova.

¹⁵ Ekölö ge bong! anyin ame he jem bong bongi Iehova, ke e ame he ka o helâ me hnaûhango ûnyi ge Ataekhanahia.

¹⁶ Hawa, ame ca ba jeû gata eke, me senyin me hobâ hnyi uma umen Khonguta?

¹⁷ A bobot ut je hatong eû hnyi kânâ; e ba but onyen je uma jeû, e amam but je omhani; anyin ae meleca thö hwit.

¹⁸ Ekölö ge ûtengien je meno! ame hlohlo je hnahat kau anyin ae ba but ö ʼdra; eke adre oba wan je hnahat mamoe.

¹⁹ Iehova lö, inya oge me tenge köu: anyin a hia but meic thong jeû an je meno hnyi hnyebuba, ke haba bâhlân ame hia but an je ûöiny hnyot hia.

²⁰ Eke, je menoiny hnyot adre me momokhon unyâm: anyin e hme but je deny köiö, ke a hia but meic! thong jeû an je meno hnyi hnyebuba.