Jobu 9 - Iaai Bible 1901 (New Caledonia)

¹ ME haba Jobu ame thu me ha, ka habe,

² E hnathu e khanö nya wia e: Kʼ ame he ka kâmâu at ka wisa unyin Khong?

³ Ame ne weny he ka ivinö mē, E ca khana he ka thu ka ke ûnyi a khaca hnyi wan thauzan.

⁴ E at ae metâ hnyekon, ke gan hmâ man: Ewa at ae hwege hnyimakan kâu, me me ton?

⁵ E thibi at ame oc je bucen, ke ca khanʼ ödrin, Hnyi ûen e ame wiʼ ödrin hnyi anyin hmonyin.

⁶ E ame bwebwelâ hmeledrany ûnyi hnyi hnen, Me ame öbubuny je hmolominy.

⁷ E ame hûna ka seûno, me me ca he ka o; Ke e ame okeceâ khötâ je okhû.

⁸ Hake e ke thibi at ame lau drany, Me uto hon je waköiöiny köiö

⁹ E thibi at ame ânyâ Uresa me Oriona me Kukuûnyi Me je hnyeule ka hnyi hwaiöu.

¹⁰ At ame ânyâ ta je ûnyi ae gan ke ca hnân wâhmakhmeto; Eke, ta je ûnyi hnân lâiâ ke ca hnân aû.

¹¹ Wâ bi, e ame he batök, ke oge me ca wâ e: E ame he bala, ke ca khanö nya e.

¹² Wâ bi, e ame hûgûnâ, ke hamö ia he ka thawâ? Ia ame he ka ha kâu, ka habe, Ieû e u me ânyâ?

¹³ Khong ame ca he ka ohmeto anyin hmonyin; Ame he ta je hnyok bi gan hia ka khudrung kâu.

¹⁴ Ke haba inya me ti ûhnyûkong hnok hna khana he ka thu kâu. Ke ca ûca hok je hofuc he ka ivinöâ mē.

¹⁵ Oge ne wisa, me oge me ca he ka thu kâu; Ke oge me he ka khöû ka at ame owisö nya.

¹⁶ Oge ne hia but hongot, ke e ame thu könya; Me oge me ca he ka ûnykûme a e ame long hok.

¹⁷ Anyin a e ame ohmetru nya ge weneû, Me osehia hnok je aat, ke ba can.

¹⁸ E ame ca he ka hnö nya he ka menâ, E ame ounöngöti nya ge je ûnyi ae hiny.

¹⁹ Adre ne ha ge maniny tavat ae hwege, wâ bi, e bi e! Ke adre me ne ha ge hna owisa, ie ame he ka thu ûen könya?

²⁰ Oge ne he ka haiwisai nya, ame he hnyimök ka haikongu nya: Oge ne ha, ka habe, iny wisa, e ame he ka haihwali nya.

²¹ Oge ne wisa; me oge me ca wâhmakhmetu nya bi; iny höciâ anyik möt.

²² E khaca thibi bongon; anyin a wale hnok hna ha, ka habe, E ame ohia at ae wisa, me at ae kong;

²³ Adre me ne ie hlingâ ge osö, Me ame he ka hluma hna cubec at ae ba hnyikongon.

²⁴ Adre me hna hmeledrany ka hnyi hnyamen at ae kong: E ame tube je hnyimakan tavat owisa e; Kʼ ame ne ca at eling, awe, ia bi?

²⁵ E logot bonguk je bong hon at ae hâhâ li can: Kʼ ame kec ut, kʼ ame ca wâ so.

²⁶ Ame hia but, helâ me hu ae logot kec: Ke helâ me aeto ame gâ ka hnyi haniny.

²⁷ Oge ne ba, ka habe, Oge me he ka hnying anyik tenge, Kʼ oge me he ka wia hnyimakök ae hmak me me menyik bi:

²⁸ Me oge me outen anyik je vec hia, Ke khanö nya a u me ca he ka ha ae ba kongik.

²⁹ Adre me he ka haikongu nya; Ke hnân eû me oge me he ka huliwa baû?

³⁰ Oge ne he ka ösûö nya ge köien kiona, Ke hinyem ge oiöâ;

³¹ Me u me he bi ka odili nya eû hnyi thop ae hmudra, Me me he ka ikiki nya hnen hing ûkhaûk.

³² Anyin a e ca at helâ mönya, me inye he ka thu kâu, Mʼ ohmu me he ka ûhnyimaköhmuköu hnyi hna owisa.

³³ Ke ba at he ka owisa köhmu, Me ip li hnyamen huhmu.

³⁴ E so e ame he ka hom anyin osö ûnyi gak, Ke ca oti nya ge anyin ta je ûnyi hnân outen:

³⁵ Me oge me he bi nya ka fuc me ca outen; Anyin e ca hwakecik be ka helâe.