Jobu 7 - Iaai Bible 1901 (New Caledonia)

¹ HAWA, e ca hamen at he ka vat eang hmeledrany? Ke, ca ûcû anyin ta je bong me je bong bongon at ame hok hwaban?

² Helâ me athnyaba ame weny hmonyin â hmenu, Ke helâ me at ame hok hwaban ame halubahingen hwaban anyin huliwa:

³ Helâe adre kunö nya he ka hu gak je tehi ae ûnyi baû, Ke adre me ham könya je litiny vec.

⁴ Oge ne he ka mokut haingök, ka habe, Ieû ûen oge me he ka höhöi hnyin? ke e beû hmâ lit; Ke oge me labö seset ke ne o but haolany.

⁵ Adre me khavâ unyik ge je wahnyöng me je tap kânâ; Ame metu but unen unyik, kʼ ame han hmetu but.

⁶ E logot bonguk je bong hon jebû anyin at ame hwâwâ mano, Adre me he but, ke ba gejon.

⁷ Öbun na ûnykûme ju a haba melik me helâ me ang: Kʼ ame ca he hmetu emakök ka wâ so.

⁸ Haba emakan at ame ō nya, me ame ca he hmetu ka ō nya: Ame he ka e but huk li emâkâm, kʼ ame hiö nya but.

⁹ Helâke ûlâ ame aû, kʼ ame hia but, Me helâe at ame dit ka hnyi erkemok, e ame ca he hmetu ka ölö goranyai.

¹⁰ E ame ca he ka hmetu ka hnyi hnyaban, Kʼ ame ca he hnen bi ka wâhmakhmeto hmetu e.

¹¹ Anyin a wale oge me ca he ka kât hnyimök Oge me he ka fuc ûnyi hnyi vecin hanuk; Kʼ oge me he ka tenge hnyi hlöuhlöuiny hnyekuk.

¹² Hawa, iny köiö ae gan, ame ne tanimo, Mʼ u me otilâ at he ka tuö nya?

¹³ Oge ne ha, ka habe, Ame he hnok hna mokut ka otubweli nya, Kʼ ame he hnok hna mokut ka ohâhâ anyik tenge;

¹⁴ Awe, u je oti nya ge je bwi, Me öbubunyi nya ge je hna omanenâ:

¹⁵ Waleling mʼ oge me wek bi he ka hnok, Me he ka mokcu, ke kong bi vecin je jeiök ang.

¹⁶ Oge me ikikiâ anyik möt; ca wek bi he ka he bala ka möt: Hnö nya but, anyin ae ûnyi baû but bonguk je bong.

¹⁷ E hö at, mʼ u me he ka ogânâ e, Mʼ u me hnyok kâu,

¹⁸ Me u me he ka wâ e hnyi je hnyomakatu, Me labö cubec e hnyi je ong ûen hia?

¹⁹ U ma ca he ka hwiö ûnyi gak ke ne o but kebö, Me hnö nya but hnyi ong ûen oge me utâ hangöjik hnyin?

²⁰ Oge ne hia but monu, ieû hnok hna ânyâ köu, a at tuö tavat? Anyin a ieû u je otilö nya hnân ânyâm aat, Me inye hmak gak bi?

²¹ Ke ieû u je ca hna degecâ gan anyik hulo, me hom degecâ anyik monu? Anyin a walang ang oge me he ka mokut eû hnyi kânâ; Ke u me he ka elöm nya wia, ke hiö nya bi.