Jobu 5 - Iaai Bible 1901 (New Caledonia)

¹ BETHE hongot, hawa, e hu at ame he ka thu koû? Ke ewa at ae kap u me he ka hwiö kâu?

² Anyin a haba hmonyin ame hlingâ at ae monu, Ke haba ciâ ame hlingâ at ame hop.

³ Oge hia but wâ at ae monu kʼ ame bi hweciny: Ke oge me ie hangâ hnyaban.

⁴ E sâkâû but lakon ge khötkic Kʼ adre me ûhlic ödrin hnyi homagöule, Ke ba at he ka omeli ödrin.

⁵ Ke ame han hnödrin hna menu hnen at ae mekihnânem, E ame hûgûnâ e ûnyi hnyi je ûö ae ûdö, A memang ut hnewe hobi kâu anyidrin ta je ûnyi.

⁶ Anyin ame ca o but vec ûnyi hnyi sesâiny kânâ, Kʼ ame ca kû hlöuhlöu ûnyi eû hnyi kânâ;

⁷ Ke adre me hnokoâ at ka hnyi hlöuhlöu Helâ me je wahleûhleûiny meic ame gâ goranyai.

⁸ Ke oge me behe bi nya ka elâm Khong. Kʼ oge me behna but ka Khong hnok hna ûhnenamö:

⁹ Wale at ame ânyâ ta je ûnyi ae gan, ke ca hnân bi elâm; Ke ta je ûnyi hnân lâiâ, ke ca hnân bi aû:

¹⁰ Wale at ame ham we ka hnyi hmele drany, Me kunâ köiö ka hnyi hon ta je utkânâ:

¹¹ Haba e at ame ip tavat ae hnyikânâ ka hnyi dok ae gorany; Me ogöranyâ tavat adre me tenge mʼ adre me he ka laba khötkic.

¹² E ame odilâ je ûnykûmânen tavat bihihwakecin, Me me ba ûnyi adre me he ka ânyâ ge je hnyamödrin.

¹³ E ame ohnokâ tavat ae metâ hnyi anyi drin je bibihwakeoin: Me ologotâ ûhnenamö anyin tavat adre me bigan.

¹⁴ Adre me ûkhanö me menekholom hnyi lany, Me khaûteta hnyi jebigö helâke me hnyinghet.

¹⁵ Ke e ame omelo ûnyi ge hele vatiny hnyimödrin, Wale je at ae theduoc ûnyi ge hnyamen at ae hwege.

¹⁶ Me me bu gejon ge at ae theduoc, Ke hulo ame kât hnyi men bi.

¹⁷ Wâ bi, e hnahic at Khong ame nâ; Anyin a wale, u ma ca höciâ hna nâ hnen Ataekhanahia.

¹⁸ Anyin a e at ame ovecâ me lan minya; E at ame bi aat me ometo minya ge li hnyamen.

¹⁹ E ame he ka omeli u hnyi je vec a siks; Eke, ame ca he ka kalö u hnen hulo hnyi seveniny.

²⁰ E ame he ka omeli u hnyi hmiâ mʼ u me ca mok; Me hnyi vat, ûnyi ge maniny hele vat.

²¹ Adre me he ka ikhölö u ûnyi ge hinyin je bohmen; Ke u me ca he ka outen hnaûhango e ka o.

²² U me he ka hluma ûohiö me hmiâ; Ke u me ca be ka outen je menoiny hnyot.

²³ Ke ame he je vetoiny hnyei ka tha hien möu; Ke ame he ka ûsoköu möu ta je menoiny hnyot.

²⁴ Ke u me he ka wâ a gʼ ame hnahic ut umâm uma mano; Ke u me he ka wâ hmetu hnyabam, ke ba ke ûnyi ame he ka hia.

²⁵ Ke u me he ka wâ a gʼ ame he ka gan mâtrânâm; Ke ame he je sem ka helâ me ajilatiny hmeledrany.

²⁶ U me he ka o ka hnyi erkemok ke u hingat ut; Helâ me thi hwit adre me hom hnyi ûen.

²⁷ Wâ bi ûnyi e, wale hnöhmun hna elâm, ke e ke; Long ju e, me wâhmakhmetoâ hobi köu bi.