Jobu 42 - Iaai Bible 1901 (New Caledonia)

¹ ME haba Jobu ame thu kö Iehova me ha, ka habe,

² E khanö nya but ae khanö u he ka ânyâ ta je ûnyi hia. Ke haba hnâm hna ûnykûme me pason he ka thawâ.

³ Ie at ame ikhâlâ ûhnenamö me ba wâûnykûme? Anyin a wale oge hia but ha ûnyi oge me ca wâhmakhmeto, Je ûnyi ae beönua huk waleji ae ca khanö nya.

⁴ Ö u long ju, ke oge me he ka fuc; Oge me he ka hnei u, ke nö nya ju.

⁵ Oge hia but long gam ge li hnyikönyök; Ke walang ang ame ö u hnen li emakök,

⁶ Anyin a wale, oge me ikiki nya bi me ietra Hnyi sesâ me hnabadröu.

⁷ Ke hwaban hna ha je hofuc eling kö Jobu hnö Iehova, haba Iehova ame ha ko Elifaza at Temana, ka habe, Ame ubâhlâ thö anyik hmonyin köu me li lahânâm: anyin a öbun e ca hia but ha gak ûnyi ae wisa helâ me Jobu athnyabaik.

⁸ Ke walang ang hom dö hobi köbun bi je bolok a seven, me je mamoe baga a seven, ke he thö ko Jobu athnyabaik, me hudo hobi köbun hudiny leû; ke ame he Jobu athnyabaik ka hic hobi köbun; anyin a oge me he ka kap e, mʼ oge me ca he ka ânyâ köbun hoton anyibun monu; anyin a öbun e ca ha gak ûnyi ae wisa helâ me Jobu athnyabaik.

⁹ Me haba Elifaza at Temana, me Biledad at Sua, me Zofar at Naamathi ödrin e he me ânyâ helâ me hna hûna ga Iehova ködrin: me Iehova ame kop Jobu.

¹⁰ Ke Iehova ame ohmetu Jobu ûheny hnyi hna bâ, e ka hijö je lahanen: ke Iehova ame ibi olo ham kö Jobu ta je ûnyi waleji ae hu gan ehac a bân.

¹¹ Me ame o kân je liamekeiny mē hia, me je lahaniny hia, me je hnyat hia a je liamewaeny hia mē ehac, me ödrin e tha han mē eio hnyin umen uma; me ödrin e tenge kâu, me otu bwelâ e hnyi ta je ûnyi hia ae kong walej a oâ kâu Iehova: ke ödrin e ve ham minya kâu ke mone, ke ûsa khaca otru gol.

¹² Me Iehova ame gan hmâ oganö Jobu hnyi bongon je bong a biliny hon je bongon a bân: ke e hu gan ta je mamoe a fotin thauzan, ke siks thauzan je kamela, ke wan thauzan je ûcû lo bolok, ke wan thauzan je asina momo.

¹³ Ke e hu minya gan lakon baga a seven, ke kun ta lakon hlu.

¹⁴ Ke e ame hwenyi ien at a bân, me, Jemima; ke Kezia ien at a loiny, ke Keren-apuka ien at a kuniny.

¹⁵ Ke haba hnyi hnyei hia me ba je momo ae hmanenang ka wâ, helâju me ta hlu laku Jobu: ke haba kamödrin ame bi jekhöûdrin helâ me je lahanidrin.

¹⁶ Ke hwaban dö e, me möt bala bi Jobu hnyi wan haded ke fâte ta je huna, kʼ ame wâ lakon, me je laöbiny ke ne o but hnyi dö a vakiny.

¹⁷ Me ame mokcu Jobu, ke hingat ut, ke se hia bongon ta je bong.