Jobu 41 - Iaai Bible 1901 (New Caledonia)

¹ E KHANÖ u he ka lelö leviathana ge wage? Me ca bohmen ge tö?

² E khanö u he ka hûkâlâ tö hnyi hnyingöiny? Me koû wainy ge fao?

³ E ame he ka osehia khöû köu? Kʼ ame he ka ha je hofuc ae menyik köu?

⁴ Hawa, ame he ka ânyâ ûhihinyköu möu, Mʼ u ma hom me athnyabaem bala bi?

⁵ U me he ka walak mē helâ me meno ame gâ? Me noc e me me haleny ânyâm je hlu?

⁶ Ame he tavat thud ka ûco e? Me kave ka tavat ûcû?

⁷ E khanö u he ka öunöngötâ unen ge je ö a telat, Ke ban ge ta je ûde?

⁸ Ip ju hnyamâm hon; Ûnykûme ju vat, ke ca ânyâ hmetu bala.

⁹ Wâ bi e ûnyi baû bi labageju he ka hom e: Hawa, ame ca he at ka ta but e ka wâ e?

¹⁰ E ba at ae hwege hnyekon me me bwebwelâ e: Awe, ewa at ae khana tot hnyi hnyi makök?

¹¹ Ke, ewa at ame bân ka ham könya, mʼ inye he ka bi hwaban? Anyin a anyik ta je ûnyi hia eang hmeledrany.

¹² Oge me ca he ka laba hnyibû ge je ong outhunyin, Me tang hwegien, me manenanginy unyin.

¹³ Ie at ae khana he ka uny anyin ûkhaû? Ie at ame he ka dit ka hnyi wanben li ganyon?

¹⁴ Ie at ae khana he ka khong li hlingen hnyimakan? E hu ûnyi hnân outen igigilo je nyon.

¹⁵ E ame senyinâ anyin je unö, Kʼ adre ûohmâkouâ helâ me ûnyi hnân okeceâ.

¹⁶ Adre me oûkeceâ ke at me ke at, Me me ca khana ang he ka delec.

¹⁷ Adre me oûkeceâköuâ khaca me khaca, Adre ûkhötköu, me me ca hnân ûsâkâûö bi.

¹⁸ Hnyi hnen hna cihngö ame gâ thö lany, Ke tha ûcû li emakan me li emakan hnyomakatu.

¹⁹ Ame o ûnyi hnyi hnyimen je thi okûnû, Ke je wahleûhleûiny meic ame gâ.

²⁰ Ame o ûnyi hnyi li hnyingöiny hai, Helâke ûnyi hnyi öt me bö adre thong.

²¹ Adre omelö je walep ge homenâiny, Ke bâhlân ame o ûnyi hnyi hnyimen.

²² E bi hnyi nyin tang hwegien, Ke öbubuny ame biâ hnyi hnyimakan.

²³ Adre oûkeceâköuâ je ke keihen viny: Ke e hwege e, ca hnân bwebwelâ.

²⁴ E hwege oûnykûminy helâ me veto; Eke, e hwege helâ veto eû hmelen ûnyi hnân omomono.

²⁵ E ka todrö, me haba tavat hwege adre me ot: Ame gâudrin ge hnödra hna öbubuny.

²⁶ A ne he ke at ka kot e ge hele vat, me ûnyi baû; Helâe minya ge ö, me ûde, me fana.

²⁷ E ame ûnykûme fao helâ me thatûnyin hwit, Me bras helâ me uto bobot.

²⁸ E ame ca he ka kec ge fana: Ke e ame wia je veten koloû me me thatûnyin hwit.

²⁹ E ame ûnykûme e ûcû je utöhmu me je thatûnyin hwit: E ame hluma ûgâiny ö.

³⁰ Eû hnyi hmelen helâ me je ec watagi ae so homakan: E ame lau helâ me ûnyi hnân kokot hwit hnyi hon hmudra.

³¹ E ame ocitröuâ köiö ae gan helâ me öt: E ame wia köiö me me helâ me wakaco.

³² E ame ohauâ hwaban deny gethen; Me me he at ka ûnykûme ae hûen dut köiö ae gan.

³³ E ba at ae ûcû mē eang hmeledrany, Adre op he ka ca ot.

³⁴ E ame wâ ta je ûnyi hia ae gorany: E thibi than hon je lakon bi gan.