Jobu 39 - Iaai Bible 1901 (New Caledonia)

¹ E KHANÖ u ûen ame he je gotiny kic ka hnokoâ? Me wâ haten vec a hnyekon je aila?

² E khanö u he ka aû je tehiny erkin a ödra? Me wâ ûen adre me he ka hnokoâ?

³ Adre me tot hwali me hnokoâ je lakudra, Me ame hia but anyidra je vec.

⁴ Kʼ ame hwege lakudra, me gan tot hnyi hnyebuba;

⁵ Ia hna asinainy hnyot he ka he monu? Ke ia thang je wen asinainy hnyot?

⁶ Oge me ham hnyebuba hnân umen uma, Me hnyei baga hnân hnyaban.

⁷ E ame hluma medien taun, Ke e ame ca long hwahongot hwan at ame alin meno.

⁸ Haba hna wâ hon je bucen, wale an jeû, Ke e ame elâm je ûnyi hia ae hât.

⁹ Hawa, ame weny bolokiny hnyot he ka bi athnyabaem? Me mokulec uma umen halem kau?

¹⁰ E khanö u he ka ca bolokiny hnyot ge wen hnyi hna belök? Me ame he ka tha seû tilâ kânâ möu?

¹¹ U me he ka labageju kâu anyin ae gan hmâ hwegien? Ke u me he ka hna ânyâm huliwa kâu?

¹² U me he ka labageju kâu a e ame he ka hom ânyâm hwit, Me hlo hwit hobi kâu umâm uma hnân huje hwit?

¹³ Ame lau senyinâ labenyin renani; Ke hawa, ame hmanenang taben labeyin me je leûnen?

¹⁴ Anyin a e ame ip wakuny hnyi kânâ, Me omagei ödra hnyi sesâ,

¹⁵ Ke e ame hnying ut a ame ne he can ka uto hmoucai ödra, Me ke menoiny hnyot ka uto veseâ.

¹⁶ E khot hnyekon ka lakon, helâ ke ca lakon bi: Ame ne ûnyi baû anyin huliwa e ame ca hlohlo bi;

¹⁷ Anyin a Khong ame hia but behânâ e ge metâ, Ke e ame ca ham kâu wâhmakhmeto.

¹⁸ Hnyi je ûen e ame höhöi thö goranyai, E ame hluma hors me at ame tabâ e.

¹⁹ Hawa, u je ham tang hwege ka hors? Me khavâ nyin e ge leûnen ame jijing?

²⁰ U je kunâ e he ka gâ helâ me wahamon? Hnân outen hnen imenâiny ae hwege.

²¹ E ame khino ca hnyi thop me senyinâ tang hwege: E ame he me ûkhanö me vat.

²² E ame hlumâ ûnyi hnân outen, ke ca öbubuny bi; Ke e ame ca hwio hmetu ge hele vat.

²³ Ame kitenge gan tangen fana, Me ö ae hadröngöc me uthö.

²⁴ E ame utâ kânâ hnyi wathethot me anyin hmonyin; Ke ame ca ûnykûme a wale hwan trutru.

²⁵ Ame ne fuc dö trutru, me haingen, ka habe, Awe! Kʼ ame long bunen vat ke tiga sâkâû, A hwan thaniny je taben vat, me huo.

²⁶ Hawa, ame nap dring ge ânyâm metâ, Me lau li labenyin ka hnyi hwaiöu?

²⁷ Ame gâ goranyai aeto hnyi hnâm hna hûna, Me bi hâûen ethö gorany?

²⁸ E ame labâ kic, me bi hnyaban Hon ban kic, me je hnabâ.

²⁹ E ame selâdrâ eling haniny; Me wâ e hnyi dok ae sâkâû ge li emakan.

³⁰ Haba lakon me adre me ijem dra: Ke haba hnen je komok, me wale hnen bi minya.