Jobu 34 - Iaai Bible 1901 (New Caledonia)

¹ HABA Elihu bala ame thu, me ha, ka habe,

² Öbun tavat ae metâ long ju hok je hofuc; Ke öbun tavat wâ ûnykûme, tevehling nya ju.

³ Anyin a hanymen hnyiköny he ka lönghmakhmeto hofuc, Helâ me hnyem ame drem cubecâ jeû.

⁴ E so otin e he ka ûca wisa hobi kötin; E so otin e tha wâhmakhmeto so.

⁵ Anyin a hia but Jobu ha, ka habe, Iny wisa but, Ke a hia but Khong hûgûnâ anyik wisa:

⁶ Eja ke ne a ne hu gak wisa, me iny at thoi köbun; Ca hnân so hnok aat, eja ke ne a ne ba hnok hna hanyâûâ.

⁷ Ie at ae ûcû me Jobu, Wale ame ijem ûhiö helâ me köiö?

⁸ At ame tha he me tavat adre me ânyâ hulo, Me tha vheno me tavat ae kong.

⁹ Anyin a haingen, ka habe, E ba troban ka at, E ka he ka senyin ka Khong.

¹⁰ Anyin a wale, ling nya ju, öbun tavat wâhmakhmeto: E so e ûsâkâûö hulo me Khong; Ke hwakecin ae kong me Ataekhanahia.

¹¹ Anyin a e ame he ka bi hwaban huliwa anyin at, Me ve oâ ka tavat hoton hwakecidrin.

¹² E hnathu ame ca he Khong ka ânyâ hulo, Ke ame ca he Ataekhanahia ka owhalö hna owisa.

¹³ Ie at a ham kâu musi hon hmeledrany? Ke ia ip gan hmeledrany hia?

¹⁴ Ame ne he ka hnyok ka at, Ame ne he ka ohmeto kâu bi hanon me homenân;

¹⁵ Ame he ka tha mok tavat hia, Ke ame he at ka hmetu ka hnyi kânâ.

¹⁶ U je ne wâûnykûme, long ju ang: Tevehlöng ju ifucik.

¹⁷ Hawa, ame he at ame höciâ wisa ka musi? Ke u me he ka haikongoâ e wale ae wisa me gan?

¹⁸ Hawa, e ûcû he ka ha ka than, ka habe, U at ae ikiki? Ke ka je taben, Öbun tavat ae kong?

¹⁹ Awe, hawa ge at ame ca wâhmakhmetoâ je than, Me ca oûnyihnatho at ae tren omjeû hon at ae theduoc; Anyin a huliwa anyin li hnyamen ödra hia.

²⁰ Ödra logot mokcu, wale hnyi wanbenset; Adre me obwebwelâ tavat me ame hiʼ ödra but, Ke adre me hom tavat hwege a ca hnen hnyam.

²¹ Anyin a li emakan ame wâ je gethen deny at, Ke e ame wâ wia hnen hna okca.

²² E ba menekholom, ke ba hmenon mok, Me me lubaduöng hnyin tavat adre me ânyâ hulo.

²³ Anyin ae ca ûnyi hnathu kâu he ka olo ûnykûme ka at, Me me he hnyi hnyimakan Khong he ka ûhnei.

²⁴ E ame kot omomono tavat hwege hnyi je deny a ca hnân elâm, Me otilâ keihen me hwabödrin.

²⁵ Anyin a wale e ame wâhmakhmetoâ anyidrin je huliwa; Kʼ ame wiʼ ödra hnyikânâi hnyi hnyinghet, me ohiʼ ödra but,

²⁶ E ame kuc ödra helâ me tavat ae kong Hnyi hnyimakan tavat adre me wâ;

²⁷ Anyin a ödrin e degec hmeto e, Me ca ûnykûme bi deny je gethen:

²⁸ Mʼ ödrin e oâ kâu hwa tenge anyin tavat ae theduoc, Ke e ame long tenge anyin tavat adre me ovecâ.

²⁹ E ka omenâ, me ie ame he ka haikongoâ? Ke e ka ikhâlâ hnyimakan, me ie ame he ka wâ e? Adre me ne ânyâ ka hnyei, kʼ adre me ne ânyâ ka at, me, khaca thibi:

³⁰ Me me ca he bi at ame ca ot ka musi, Me me ca he ka hu at he ka omonoâ tavat

³¹ Hawa, ame hia but ha ke at ka Khong, ka habe, Oge hia but kap vec, kʼ oge me ca he hmetu ka monu:

³² Ke haba ûnyi oge me ca wâ, me u me he ka nö nya: Oge ne ânyâ hulo, awe, oge me ca he hmetu ka ânyâ?

³³ Hawa, adre me he ka bi hwaban e hoton hnâm hna ûnykûme, me u me he ku höciâ? Anyin a hamâm he ka ûca, ke ca hamök bi: Anyin a wale, ha thö hnâm hna khana.

³⁴ Ame he ka he tavat wâhmakhmeto ka ha könya, Me tavat ae metâ hia ödrin e long könya, ka habe,

³⁵ Haba Jobu ame fuc ke ba wâhmakhmeto, Ke ba metâ hnyi hwan hofuc.

³⁶ Ödra na he ka cubic Jobu ke ne o but obiny, Anyin e ame thu helâ me tavat ae kong.

³⁷ Anyin a e ame bi hanen bi gan ka anyin hulo, E ame khaû li hnyamen unyihmun, Me osehia hwan je hofuc ka Khong.