Jobu 33 - Iaai Bible 1901 (New Caledonia)

¹ AWE, Jobu lö, u na he ju ka long hok hofuc, Me tevehlöng ju hnok je hna ha hia.

² Wâ bi, walang ang oge hia but khong hnyimök, Ame fuc bohmök hnyi hnyimök.

³ Ame he ka o hok hofuc ûheny eû hnyi hnyekuk ae wisa: Kʼ ame he li esongodik ka ha hnyi hnathu hnok hna wâ.

⁴ Haba hanon Khong ame up nya, Ke a omeli nya homenân Ataekhanahia.

⁵ Âme ne khanö u, thu thö könya; Ip gaga hwâm je hofuc hnyi hnyimakök, todrö.

⁶ Wâ bi, oge me hnyimakök ka Khong helâ me u: Adre up nya minya ûnyi hnyi kânâ ae kece.

⁷ Wâ bi, adre me ca he ka ooti u ge ûnyi hnân ootâ gak, Kʼ ame ca he hnyamok ka hmak hom.

⁸ E hnathu u je hia but fuc hnyi hnyi-könyök, Ke oge hia but long ifucâm, ka habe,

⁹ Iny kalaöt, anyin ae ba hnok hna hanyâûâ; E ba hnyikonguk, ke ba hulö eû hnyi hnyekuk:

¹⁰ Wâ bi, e ame heleû je can könya, E ame öû nya me iwahnaihmiony mē.

¹¹ E ame ohmâ bi cak hnyi uto, E ame bi haten dek je gethen hia.

¹² Wâ bi, oge me he ka thu köu, a u je ca wisa hnyi ûnyi e; Anyin ae gan hmâ Khong hon at.

¹³ Ieû gam u me ivinö mē? Anyin a e ame ca ha bi bongon anyin ta je ûnyi.

¹⁴ E okhaca fuc Khong, Me olo, ke a ca long bi at.

¹⁵ Hnyi bwi, me hna omanenâ hnyi hnyinghet, Hnyi ûen ame mokut hnying tavat, Me leleû hon hna mokut;

¹⁶ Hnyi ûen eling e ame olöngâ je hnyikonyen tavat, Me okeceâ hmâ hna ûne ködrin.

¹⁷ Me me he ka lelö at ûnyi ge hnen hna weny, Me ikhâlâ bi gan ge at.

¹⁸ E ame behânâ hanon ge thop, Me anyin möt wâ e nye hia ge hele vat.

¹⁹ Adre me siwhegiâ e minya hnen vec hon hnen hna mokut, Me ivinö bala eû hnyi je jeien:

²⁰ Me me höcö jeû ge anyin möt, Me jeû ae hnebwia ge hanon.

²¹ A aû but viny me me ca manen bi; Ke manen dut je jeien adre me ca wâ ehac.

²² Eke, ame hakekeny hanon ka hnyi erkemok, Ke anyin möt ka tavat ohia,

²³ Ame ne tha he mē ke angela, At omanenâ bongon, a e beönua hon tavat a wan thauzan, He ka omanenâ ka at hanymen ae wisa;

²⁴ Awe, e ame he ka betenge gan me ha, ka habe, Omelö e me me ca ut kâû ka hnyi thop, Anyin a oge me wâ but hwaban möt.

²⁵ Kʼ ame he ka habubut unyin hon unyin wanakat; E ame he hmetu ka je bongon anyin hidröu:

²⁶ E ame hic ka Khong me e ame betenge gan; Me e ame wâ hnyimakan me senyin: Ke ame ohmeto ka at hwakecin ae wisa.

²⁷ E ame khumöng hnyi hnyimakan tavat, ka habe, Oge hia but ânyâ hulö, me hanyâûâ ûnyi ae wisa, Ke ba troban könya:

²⁸ E ame hia but omelö hanuk me me ca ut ka hnyi thop, Kʼ ame he anyik möt ka wâ melam.

²⁹ Wâ bi, Khong ame huliwan ta je ûnyi eling, A ibi olo, ke ibi okun, ka at,

³⁰ He ka hom hmetu banon ûnyi hnyi thop, Mʼ adre me omelamâ e ge melaminy tavat ae möt.

³¹ Jobu lö, tevehlöng ju, ling nya ju: Laba hnyibû ju, me oge me he ka fuc.

³² Ame ne hu hofuc gam thu thö könya: Fuc dö, anyin ae wek he ka haiwisai u.

³³ Ame ne ba, ling nya ju: Laba hnyibu, me oge me he ka nö u ge metâ.