Jobu 32 - Iaai Bible 1901 (New Caledonia)1 KE ame ca thu hmetu bi kö Jobu hnen je hnyat eling a kun, anyin a ka wisa e hnyi hnyimakan bi. 2 Ke ame ubâhlâ thö hmonyin anyi Elihu nöku Barakhela at Buza, hanen lap anyi Ram: ame ubâhlâ thö anyin hmonyin kö Jobu, anyin a e ame haiwisa e bi me ca haiwisa bi Khong. 3 Ke ame ubâhlâ thö anyin hmonyin minya ka je lahanen a kun, anyin a ödrin e ca wâ ûnyi hnân thu, ke so bi ödrin e hia but haikongu Jobu. 4 Ke haba Elihu ame hia but halubahing Jobu ge hofuc, anyin a ödrin dö a bân, ke e bi a biliny. 5 Ke a wâ but Elihu ae ba hofuc hnân thu hnyi je hnyimen ta hnyat a kun, me ame ubâhlâ anyin hmonyin. 6 Me haba Elihu nöku Barakhela at Bun ame thu me ha, ka habe, E wakhalet thibi je hunaik, ke öbun je hingat hnathu but; Anyin a wale iny hlohlo, me ot he ka omanenâ ûnykûmenök köbun. 7 Haingök, Hamen at ae se hia bongon ka fuc, Me hamen je huna ae se hia he ka ûnö metâ. 8 Ke e hu hanu eû hnyin at, Ke haba homenân Ataekhanahia ame ham ködrin wâ ûnykûme. 9 Ca e unyin at ae beönua thibi metâ, Me he ka wâhmakhmetoâ hna owisa, unyin wahingat. 10 Anyin a wale, haingök, Ling nya ju; Oge me he ka omanenâ minya hnok hna ûnykûme. 11 Wâ bi, oge me halubahingen hobun je hofuc, Oge me tevehlöng hnobun hna ha can, Öbun ka tiga elâm he ka ha. 12 Ke oge me tevehlöng köbun, Me wâ bi, e ba at gabun a ngö Jobu, Ke ba at unyibun ame thu hwan je hofuc. 13 Wâ eâu, wâ Öbun nye ha, ka habe, Ohmun e wâ but metâ; E khana Khong he ka hwege hon, ke ca at bi: 14 Anyin a e ame ca penapena ifuciny hobi könya; Ke oge me ca he bi nya ka ha hobun hofuc iny ka thu kâu. 15 Ödrin e lâiâ, kʼ ödrin e ca thu hmetu bi: E ba but hodrin hofuc. 16 Hawa, oge me he ka halubahingen anyin a ödrin e ca fuc bi, Anyin a ödrin e tot me ca fuc hmetu? 17 Oge me he bi nya ka thu hnyi hanymök, Kʼ oge me he ka omanenâ hnok hna ûnykûme. 18 Anyin a iny unöngötö ge je hofuc; Kʼ ame musi nya hnen hanu eû hnyi hnyekuk. 19 Wâ bi, e ûcû hnyekuk me waina adre ca oc hlinginy; Kʼ ame he but ka hmouca helâ me je tang ae teb ûnyi. 20 Oge me he ka fuc mʼ inye menâ ju; Oge me he ka khong li esongodik me thu. 21 Iny na ca he ju ka wâhmakhmetoâ at; Kʼ oge me ca he bi nya ka ham baûâ ien ae gan hnân ogânâ at. 22 Anyin ae ca khanö nya he ka ogânâ at ge je ien baû; Wâ e nye he At a Up nya he ka logot hum nya. |
maintained by the British and Foreign Bible Society
Bible Society of the South Pacific