Jobu 29 - Iaai Bible 1901 (New Caledonia)

¹ KE Jobu ame fuc hmetu hnyi anyin ûhöûcû, me ha, ka habe,

² Ekölö ge je tehi ehac, Waleji je bong a tuö nya hnyin Khong;

³ Kʼ ame umumelam anyin lamepa hon bok, Ke oge me vheno menekholom hnyi anyin lany;

⁴ Helâji me je bong a iny hmai hnyin, Hnyi ûen ame tha e mönya Khong hnyi umök uma mano;

⁵ Waleji a tiga e unyik Ataekhanahia, Ke ame laba igigili nya je lakuk;

⁶ Hnyi ûen adre hneû hnok hna okca ge bata, Ke haba kic ame hingâlâ könya je wageweiny wakaco!

⁷ Haba hnyi ûen eji oge me he ka hnyi homagouleny taun, Ke penapena tabök tap hnyi hna cit gethen,

⁸ Me ame ö nya je hidröu me ödrin e lubaduöng, Me ame höhöi je hingat me tot;

⁹ A hnyibû but je than, Ke ödrin e kât je hnyimödrin.

¹⁰ Ame ca fuc hmetu tavat ae ûnyi hnathu, Ke ame kece je bohmödrin ka hnyi je ecngödidrin.

¹¹ Anyin a hnyi ûen ame ling nya hnyiköny, me e ame haisoi nya; Ke hnyi ûen ame ö nya hnen ecmak, me e ame ohnathu nya:

¹² Anyin a oge me omelö at a theduoc ame tenge, Me nakahme minya, waleji ae ba at ame hadruâ.

¹³ Ame o but könya hofuc hnahic ûnyi ge at ame he ka mokcu: Ke oge me osenyinâ hnyekon safac.

¹⁴ Oge me khavâ wisa hnân anyik ûkhaû: Ke haba hnok hna owisa, e ûcû me ûkhaû me hnabinybak.

¹⁵ Inya ji hing li emakan wadröu, Ke inya ji li can at ae mat can.

¹⁶ Inya ji kamen ka at ae theduoc: Ke haba ivinö ae ca khanö nya, oge me thang.

¹⁷ Ke oge me thu jeien wainy at ae kong, Me oc ut hnen hna hûgûnâ ûnyi hnyi je nyon.

¹⁸ Ke oge me ha, ka habe, Oge me he ka mok hnyi hnok hna thu hâû, Ke oge me he ka osehia bonguk je bong helâ me öny.

¹⁹ Ame iyâû anyik je wân ka hnyi köiö, Ke ame mokut dân hau hon vheik hnyi hnyinghet hia:

²⁰ E hât bi soik unyik. Ke hmâ bala bi anyik cafana hnyi hnyamok.

²¹ Tavat adre me ling nya, me halubahingen, Me laba hnyibû hobi kâu hnok hna ûne.

²² Hwaban ifucik me adre me ca fuc hmetu; E menyik hoc hofuc ködrin.

²³ Kʼ adre me halubahing nya helâ me we; Kʼ adre me memang helâke adre me halubahingen we a biliny.

²⁴ Oge ne hluma ködrin, me ödrin e ca kap e; Kʼ ödrin e ca hna degecâ hnyimakök ae hna menyik.

²⁵ Oge me ûca dedrin je gethen me laba unyidrin helâ me ban, Me laba helâ me than hnyi utbavat, Helâ me at ame otubwelâ tavat tenge thungaû.