Jobu 28 - Iaai Bible 1901 (New Caledonia)

¹ E hu thopiny sileva, Me hnen gol adre me ânyâwia.

² Adre hom fao ûnyi eû hnyi kânâ, Ke adre me okoiâ bras ûnyi hnyi veto.

³ Ame bi obiny menekholom hnen at, Me elâm wia hnyi je hnyegöulen ae ti sâkâû Je veto, hnyi menekholom, me hmenon mok,

⁴ E ame hiny dilâ thop ae ûsâkâûö me je hnyaba; Adre me hnying e hnen can at ame ngenu; Ödrin e him hnyihnyikä, ke ûsâkâûö me tavat.

⁵ Ame kû jeû ûnyi hnyi kânâ; Ke adre me seû tilâ e eû hmelen helâ me hnen meic.

⁶ Haba je veten e, wale hnen je safairo, Ke eling kânâ gol.

⁷ Haba gethen e ae ca khana hnen meno ame gâ, Ke ame ca wâ e hnen emakan dring:

⁸ Ame ca uto e hnen je meno ae hiny, Ke ame ca vheno e hnen je liona ae ûkûc.

⁹ E ame hai hnyamen ka hnyi je veto oût, E ame oamamâ je bucen ûnyi hnyi hwecin.

¹⁰ E ame si deny köiö hnyi kic; Ke a wâ hut emakan je ûnyi hnathu hia.

¹¹ E ame thelöng je ong wagewe me me ca khulu bi; Me oâ ka hnyi lany ûnyi ae iyong.

¹² Ke adre me he ka wâ metâ ua? Ke ewa hnen wâ ûnykûme?

¹³ E ca khana hwaban e ge tavat; Ke adre me ca wâ e hnyi hnyei iny tavat ae möt.

¹⁴ Haingen dok ae dit, Ame ca laba unyik; Ke haingen köiö ae gan, E ba minya bi gak.

¹⁵ Ca hnân ûco ge gol, Ke adre me ca he ka tuluto sileva hnân i hwaban e.

¹⁶ E ca hnân ûco bi e goliny Ofira, Me soama ae ûnyi hnathu, me safairo

¹⁷ Haba gol ke uselat me ca so helâe: Kʼ adre me ca he ka bihwaban e ge je hmanenanginy gol.

¹⁸ Adre me ca he ka ha ramothe, me gibisi: Eke, e beönua metâ hon je penina.

¹⁹ E ca ûcû mē topazioiny Aithiope, Kʼ adre me ca he ka ûco e hwaban gol ae so.

²⁰ Awe, ame o ûheny ua metâ? Ke ewa hnen wâ ûnykûme?

²¹ Ame iyong e ge li emakan tavat hia ae möt, Kʼ adre me ikhâlâ e me me iyong ka omeno ame gâ ethö.

²² Haingen hnaûhangö me mok, ka habe, Öhme long ut uthumetu gan ge je hnyikönyöhmu.

²³ Khong ame wâ ûnykûme deny e, Ke e khana hnen bi.

²⁴ Anyin a e ame wâ je can hmeledrany, E ame bwele eû hnyi hmelen hia drany;

²⁵ He ka ânyâ tulut hnân ihmakiny ang; Eke, e ame tuluto je köiö ge tulut.

²⁶ Hnyi ûen e ame ânyâ hnanyibu hobi kâu we, Me bi deny hucuceiny hwan than:

²⁷ Me e ame wâ e, me omanenâ e; E ame otilâ e, eke, e ame elâm e.

²⁸ Ke e ame ha ka at, ka habe, Wâ bi, haba hna outen Than, me wale metâ; Ke adre me ne degec hulo, me wale wâ ûnykûme.