Jobu 27 - Iaai Bible 1901 (New Caledonia)

¹ KE Jobu ame fuc hmetu hnyi anyin uhöûcû me ha, ka habe,

² Kia inya Khong, at ame hom degecâ anyik wisa; Me Ataekhanahia, waleji ame ovecâ hnyekuk;

³ (Anyin ae bala bi hanuk unyik, Me homenâ anyin Khong hnyi li hnyi-ngöik;)

⁴ E hnathu ame ca he li esongodik ka ha ûnyi ae kong, Ke ame ca he bohmök ka ha iyawö.

⁵ Kia inya Khong, oge me ca he ka haiwisai öbun: Oge me ca he ka degec ha hwakecik ae ba hnyikongon ke ne o but oge me mokcu.

⁶ Inya oge me kât hmâ hwakecik ae wisa, ke oge me ca he ka hna but: Ame ca he hnyekuk ka haikongu nya iny ka tiga möt.

⁷ E so he ka ûcû iwahnaihmiony mönya me at ae kong, Ke at ame tot könya, me helâ me at ae ca wisa bi.

⁸ Eja ke ne a ne hom troban ge at ame ca ot, me ewa gejon bi E ka he Khong ka hom hanon?

⁹ Hawa, ame he Khong ka long hwakhöû E ka o kâu vec.

¹⁰ Hawa, e ame he ka senyin ka Ataekhanahia, Me hongot ka Khong hnyi je ûen hia?

¹¹ Oge me he ka nʼ öbun ge hwakecin hnyamen Khong; Oge me ca he bi nya ka ikhâlâ je bongon Ataekhanahia.

¹² Wâ bi, öbun hia öbun e hia but wâ e; Ke ieû gabun a öbun e tha hop bi?

¹³ Walang jekhon at ae kong ûnyi ge Khong, Me hwajekhon tavat seda, ödrin e he ka kap ûnyi ge Ataekliana hia.

¹⁴ Adre me ne osehia lakon, me walödrin hobi kâu hele vat; Ke ame ca he je mâtrâniny ka sekudrin ge jeû.

¹⁵ Ke haba kolon gan me adre me he ka konâm hnyi mok, Ke ame ca he je safac gan ka tenge thungaû.

¹⁶ Eja ke ne a ne ûkhöûnâ sileva helâ me kânâ, Me penapena je ûkhaû helâ me kânâ ae kece;

¹⁷ Awe e ame penapena, kʼ ame he at ae wisa ka khavâ, Kʼ ame he hnyat ae ba hnyikongon ka khenâ sileva.

¹⁸ E ame op umen uma helâ me walelaba, Helâ me uma menâ a ânyâ at tue.

¹⁹ E ame mokut ke tren omjeû, ke so bi adre me ca he ka konâm e, E ame bwele ge li emakan, me ame hia but.

²⁰ Ame o but kâu je Öbubuny helâ me köiö; Ke höu ame venâu e hnyi hnyinghet.

²¹ Haba ang hwei ame tûâ degecâ, me ame hia ju; Kʼ ame aba degecâ e ûnyi hnyi hnen.

²² Ke ame he Khong ka lûâ e me ca betenge: Kʼ ame bekec ut ûnyi hnyi hnyamen.

²³ Ame he tavat ka khöûkhöû hnyamâ, Me bwec degecâ e ûnyi hnyi hnen.