Jobu 23 - Iaai Bible 1901 (New Caledonia)

¹ KE haba Jobu ame thu me ha, ka habe,

² Haba hnyi bong ang me hiny hnok hna tenge: E hmak hna kuc nya hon imângik.

³ E na khanö nya ju dok oge me he ka wâ e hnyin, Me inye he ka he ka hnyi taben tap!

⁴ Oge me he ka penapena hok hofuc hnyi hnyimakan, Me ounöngötâ hnyimök ge je hofuc hnân ohnatho.

⁵ Ame he ka khanö nya hofuc e ame he ka thu könya, Me wâ ûnykûme a e ame he ka fuc könya.

⁶ Hawa, e ame he ka ivinö mönya ge man ae gan? Ohe; e ame he ka ling nya.

⁷ E khana at ae wisa ka ivinö mē eling; Me oge me he balua ka möt ûnyi ge at ame owisa könya.

⁸ Wâ bi, inya oge me he deiö, ke hia e eling; Me jio, ke oge me ca wâ e:

⁹ Me ka hnyi hwadro waleji e ame huliwa, ke oge me ca wâ e: E ame oiyongâ e hnyi hwaiöu, me oge me ca wâ e.

¹⁰ Ke so bi e ame wâ dek gethen; E ka hia but cubic nya me oge me he ka o helâ me gol.

¹¹ E hwege cak ka hnyi hnen je hna okca; Oge me hia but tuö deny gethen, ke oge me ca saû bi.

¹² Oge ca hia but saûâ degecâ hnanyibu ûnyi hnyi li esongodiny; Oge hia but oûnyihnatho hofuc a hwan, hon ök jeû.

¹³ Ke khaca thibi ûnykûmânen, ke ewa at ame he bi ka wia e? Ke e ame ânyâ ûnyi e ame hnyok kâu.

¹⁴ Anyin a e ame ohwâdâ ûnyi adre ip hobi könya: Ke se hia je ûnyi a helâe unyin.

¹⁵ Anyin a wale iny hlohlo but hnyi hnyimakan; Iny ka ûnykûme, me oge me outen e.

¹⁶ Ke a hia but Khong osenyinâ hnyekuk, Ke a hia but Ataekhanahia ohlohloinya:

¹⁷ Anyin adre me ca subâ degeci nya ke tiga ca o bi menekholom, Me oiyongâ hnyimakök ge menekholom ae khot.