Jobu 22 - Iaai Bible 1901 (New Caledonia)

¹ HABA Elifaza at Temana ame thu me ha, ka habe

² Hawa, e khana ke at he ka bi troban hobi kâu Khong? E hnathu, ame he at ae metâ ka bi troban hobi kâu e bi.

³ Hawa hnân osenyinâ Ataekhanahia a u at ae wisa hwakecâm? Ke ame he ka bi troban kâu a u je oba hnyikongon hwakecâm?

⁴ Hawa, e ame û u can hnâm hna outen, Me e ame tha he möu ka hnyi hna owisa?

⁵ Hawa, e ca gan ânyâm hulo? Ke e ca hu obiny ge ânyâm je monu.

⁶ Anyin a u je hia but hom je haten ûnyi ge liamekeiny möu, ke ba can, Me uny je ûkhaûen tavat ae theduoc.

⁷ U je ca habelen ge köiö at ae sënyin, Ke u je behânâ jeû ge at ae mekihnânem.

⁸ Ke haba at ae hwege, me waleji at ae tren kânâ; Ke haba at ae ûnyi hnathu, me waleji at ame labâ e.

⁹ U je hia but kunâ je safac me ba ke ûnyi, Ke adre hia but thu je benyin je nakahme.

¹⁰ Anyin a wale e but je hnewe igigili u, Kʼ ame ie hlohlo thö hnyekom ge ot,

¹¹ Kʼ ame ne menekholom, me u me ca wâ bi, Kʼ ame hûlûlûö u hnen je köiö ae gan hmâ.

¹² Hawa, ame ca laba Khong ethö hnyi göranyin drany? Ke wâ bi ûgöranyin je okhû, e ti gorany hmonyin!

¹³ Me haingâm, ka habe, Khong ame wâ ieû? Hawa, e khana he ka owisa ûnyi hnyi menekholom?

¹⁴ Kʼ ame oiyongâ e ge je ulâ ae haki, me me ca wâ bi; Ke e ame vheno wathelabainy drany.

¹⁵ Hawa, u me he bala ka laba hnyi gethen ehac Waleji a vheno hnen tavat ae kong?

¹⁶ Waleji adre hom huli ödrin hnyin, Kʼ adre me hingölö tab ödrin helâ me wagewe:

¹⁷ Wale hnyat adre me ha, ka habe, Ûsâkâûö but möhmun; Ke, Ieû ae khana Ataekhanahia he ka ânyâ hnân hobi kohmun?

¹⁸ Ke so bi e ame öunöngötâ umödrin je uma ge ta je ûnyi ae so; Ke haba je hna ûnykûme hnen tavat ae kong, me, ûsâkâû mönya.

¹⁹ A wâ e hnen tavat ae wisa, mʼ ödrin e senyin; Kʼ ame hlumʼ ödrin hnen tavat ae ba hnyikongudrin:

²⁰ Haingödrin, ka habe, E hnathu adre me subâ degecâ ta je iwahnaihmiony möhmun; Kʼ ame aû koluidrin ge meic.

²¹ Imetenyimwi thö me walang ang, mʼ u me hnahic ut: Me ame he ka o köu ûnyi ae so.

²² Ö u kap ju walang ang hnanyibu ûnyi hnyi hnyimen, Me ip hmâ ju hwan hofuc eû hnyi hnyekom.

²³ U je ne hmetu but ka Ataekhanahia, me adre me he bi ka up u goranyai; Ke u je ne degec ut hwakecin ae ca wisa ûnyi hnyi umâm je uma mano.

²⁴ Ke so u ma ip ju tang omjehem eû hnyi kânâ, Ke goliny Ofira hnyi je vetoiny je wagewe;

²⁵ Ke ame he ka hing tang omjehem Ataekhanahia, Me ânyâm sileva ae ûnyi hnathu.

²⁶ Ke u me he ka senyin ka Ataekhanahia, Me bwele goranyai ka Khong.

²⁷ U me he ka hic kâu, ke e ame he ka ling u; Ke u me he ka hwâdâ ânyâm je hna bi khöbi.

²⁸ U me he ka thamuâ ke ûnyi hnyi hnyekom, me ame he ka aat köu; Ke ame he lany ka omelamâ dem je gethen.

²⁹ Ödra ka ohnyikânâi u, u me he ka ha, ka habe, Todrö; Ke e ame he ka omelö at ae hnyikânâ.

³⁰ E ame he ka omelö at minya ae tren joniny: Eke, e ame he ka möt hnen li hnyamâm ae ba hnyikongon.