Jobu 2 - Iaai Bible 1901 (New Caledonia)

¹ KE ame o but hmetu ke bong ame o hnyin lakon Khong he ka tot hnyi hnyimakö Iehova, me ame tha o mödrin Satana he ka tot hnyi hnyimakö Iehova.

² Haba Iehova ame ha kö Satana, ka habe, Ûhem ua? Me Satana ame thu ko Iehova, ka habe, ûhek hnyi hna ngeno hmeledrany me vheno e.

³ Haba Iehova ame ha kö Satana, ka habe, Hawa u me wâ ûnykûme athnyabaik a Jobu? anyin ae ba ke at ae ûcû mē eang hmeledrany, at ae ti so hwakecin, ke wisa, ke e at ame outen Khong, me ûsâkâuö me hulo: ke e hwege bala bi hnyi anyin wisa, ke u me cubic nya he ka ohia e, ke ba can.

⁴ Haba Satana ame thu kö Iehova, ka habe, Unen, hwaban unen, eke, haba ta je ûnyi hia hnen at hna hu, me e ame he ka ham hwaban anyin möt.

⁵ Ke so bi hai thö walang ang hnyamâm, me kot je jeien me viny, me e ame he ka haikongu u hnyi hnyimâkâm.

⁶ Haba Iehova ame ha ko Satana, ka habe, Wâ bi, e but e hnyi hnyamâm, ke wâ thibi anyin möt.

⁷ Haba Satana ame he but ûheny hnyi hnyimakö Iehova, me kuc Jobu ge je ohuc ae kong, hwân hnyi li hnyeûcan ke ne o but hnyi wanben ban.

⁸ Ke e ame hom ke watagi kaia me khudreû unyin; ke e ame laba hnyi hnabadröu.

⁹ Haba âiân ame ha kâu, ka habe, Hawa, u me he bala ka hwege hnyi ânyâm wisa? haikongoâ thö Khong, ke mokcu.

¹⁰ Me haingen ka momo, ka habe, E ûcû ifucâm me ifucin ke momo ae monu. Hawa? ate me he ka kap so ûnyi ge Khong, ke ate me ca he minya bi he ka kap ûnyi ae kong? Haba hnyi ta je ûnyi hia thithö eling a ca monu bi Jobu hnen li esongodiny.

¹¹ Ke a long ut je lahanö Jobu a kun ba ûnyi eling ae kong ame o but kâu, me ödrin e ve o ûnyi hnyi je idrin; wale Elifaza at Temana, me Biledad at Sua, me Zofar at Naamathi: me ödrin e tha thu ûen he ka he me tha tenge mē me otubwelâ e.

¹² Ke tiga sâkâû me ödrin e wâ, ke ödrin e ca wâhmakhmeto e bi, me ödrin e tenge hwege goranyai; ke ödrin e ve kia anyidrin je ûkhaû, me iâ kânâ ka hnyi hon je bodrin.

¹³ Me ödrin e tha laba mē hnyi kânâ seven je lany ke seven je lit, ke ödrin e ca fuc kâu: anyin a ödrin e wâ ae ti gan anyin vec.