Jobu 19 - Iaai Bible 1901 (New Caledonia)

¹ HABA Jobu ame thu me ha, ka habe,

² Ke ne o but kehö öbun e he ka ovecâ hnyekuk, Me thu omomonu nya ge je hofuc?

³ Öbun e hia but olibenyita but û nya kongu nya: Öbun e ca hmehma ge hnobun hna omonumonu nya.

⁴ Ke ame ne hnathu hnok hna monu, Awe, ame laba unyik anyik monu.

⁵ Ame ne hnathu öbun e bi gan könya, Me ha hwegiâ könya hna û nya hnyin:

⁶ Khanʼ öbun dö walang ang a hnen Khong hna ton huk, Me igigili nya ge anyin ert.

⁷ Wâ bi, oge me kukak ge ûokonguny ke adre me ca ling nya: Oge me hongot hnân ûhadruo, ke adre ca owisa bi.

⁸ E ame hia but hwo hak hnyi dek gethen, me me ca khanö nya bi he ka vheno. Me omenekhulumâ dek je gethen.

⁹ E ame uny jut gak anyik hmanenang, Me hom korona ûnyi hnyi hon bök.

¹⁰ E ame hia but kia igigili nya, me hiö nya but: Ke e ame hia but oc ut hnok hna geju helâ me ûö.

¹¹ E ame hia but öubâhlâ anyin hmonyin könya, Ke e ame ûnykûme könya helâ me iwahnaihmiony mē.

¹² Adre me tha o könya anyin je deo vat, ödrin e otilâ goranyai dedrin je gethen könya, Me hunuma igigilo umök uma mano.

¹³ E ame hia but öû sâkâûöâ mönya je liamekeiny mönya, Ke adre atkanyaua but gak je liamewaeny mönya.

¹⁴ A hia but gak aten anyik lap, Ke adre hnying nya tavat ae khenen könya ehac.

¹⁵ Tavat adre me laba hnyi umök uma, me je athnyabaik a je hlu ödrin e ûnykûme a iny atkanyua: Helâke iny aten ke hnyei hnyi hnyimaködrin.

¹⁶ Oge me hawâ athnyabaik, ke e ame ca ieû bi, Eja ke ne oge ne khöû kâu ge hnyimök.

¹⁷ E ke bongon bi ka öiök homenök Me hnok hna khöû ka laku bai.

¹⁸ Je wanakat ae ûhnyûkong ödrin e hûkötiö nya; Oge ne tot ödrin e fuc könya.

¹⁹ Haba je hing lahanök hia ödrin e hûkötiö nya; Ödrin e wia gak tavat waleji oge me betenge gadrin.

²⁰ Ame kece je jeiök ka hnyi unök, me vik, Ke oge ka möt thiju ge unen nyuk.

²¹ Betenge ju gak, betenge ju gak, öbun je lahanök; Anyin ame hia but kalö nya hnen hnyamen Khong.

²² Ieû gabun öbun e oveci nya helâji me Khong, Ke öbun e ca sekunâ hnyi vik?

²³ Ödra na he ju ka sihnalimen walang ang hok hofuc! Ödra na he ju ka set hnyi tusi!

²⁴ Ödra na he ju ka kave ge pen fao me led, Me khavi hnalimen hnyi kic nyiele balua!

²⁵ Ke oge me wâhmakhmetoâ ae möt at ame ûcû melik, Ke e ame he ka todrö hon kânâ nyiele:

²⁶ Ke hwaban dö hna ohia unök helâng Me oge me he bi nya ka wâ Khong hnyi vik:

²⁷ Oge me he ka wâ e hnok bi, Me ame he ka wâ ge li hing emakök, ke ca ke at bi. Âme aû but li jabalainuk eû hnyi hnyekuk.

²⁸ Öbun e ne ha, ka habe, ohmun e kâmâu he ka ovecâ e! Ke e bi eû hnyi hnyekuk iwâniny bongon e;

²⁹ Ot ju öbun ge hele vat; Anyin adre me bi hwaban hmonyin ge hele vat, Me me khanʼ öbun thö a ga hu hna owisa.