Jobu 16 - Iaai Bible 1901 (New Caledonia)

¹ HABA Jobu ame thu me ha, ka habe,

² E se hia je ûnyi a helâe, oge hia but long: Öbun hia tavat ûötubweli ae monu.

³ Hawa, ame he ka hu obiny ta je hofuc baû? Ke ie ûnyi ame ûjengi u he ka thu?

⁴ E khanö nya minya he ka fuc helâ möbun; A ne laba hanubun hnyi hnen hanuk, E khanö nya he ka ûhûjâköuâ je hofuc köbun, Me nyinyikâ bök köbun.

⁵ Ke so bi oge me he ka ha hwegi öbun ge hnyimök, Me otubweli öbun ge hofuc betenge anyin li esongodik.

⁶ Oge ne fuc, ame ca he bi ka katebu anyik vec: Ke oge ne laba hnyibû ame he ka kâmâu ka hia anyik vec?

⁷ Ke walang ang e ame hia but osenyini nya; U je hia but oba aten anyik bunyen.

⁸ U je hia but kât hmö nya, wale ûnyi hnân haikongu nya: Ke haba unyik ae delâ ame tot könya me bi fuci nya hnyi hnyimakök.

⁹ E ame kiö nya hnyi anyin hmonyin, me sedö nya; E ame hoc hnyu könya: Ke iwahnaihmiony mönya ame wâ hmö nya.

¹⁰ Ödrin e hia but memang könya ge hnyimödrin; Ödrin e hia but khaû wahicök me haikongu nya: Ödrin e tha sihnök.

¹¹ Haba Khong ame hia but hnö nya ka at ae hwali hwakecin, Kʼ ame digic nya ka hnyi hnyamen tavat ae kong.

¹² Oge me laba sot me e ame thu hweti nya; Eke, e ame hia but kât nyik me sa omomonu nya: E ame otilö nya hnân anyin ûnyi adre me vakha.

¹³ Haba anyin tavat hlic fana, ödrin e igigili nya, E ame dâ li jebalainuk me ca betenge bi; E ame hingâlâ waadaik hnyikânâi.

¹⁴ E ame kiö nya me osehia ohmoucö nya; E ame gâ thö huk helâ me at hwege.

¹⁵ Oge hia but tibet hon unyik mano ae gan nân, Ke oge hia but ip anyik faoiny meno eû hnyi kânâ.

¹⁶ Ame kong ut hnyimakök ge tenge, Ke e hon li bademakök hmenon mok;

¹⁷ Ke so bi e ba ûkonguny hnyi li hnyamok, Ke ba hnyikongon hijic hic.

¹⁸ Kânâ lö, ca ikhâlâ bi drök, E na ca he ju anyik khöû ka laba.

¹⁹ Ke walang ang, wâ bi, e hnyi drany at ame ohnathu nya, Ke e hnyi dok ae gorany at ame haiwisö nya.

²⁰ Haba lahanök ödrin e hlumö nya, Ame khukhula deköien li emakök ka Khong;

²¹ Me me he ka otilâ wisainy at hnyi hnyimakan Khong, Ke nokon at hnyi hnyimakan hanen!

²² Anyin a hwaban ke je huna ae wakhalet, Me oge me be ka vheno gethen, wale oge me ca he bi ka hmetu.