Je tenge anyi Jeremi 3 - Iaai Bible 1901 (New Caledonia)

¹ INYA at a khana ûöveci ge osö a anyin hmonyin.

² E ame hia but su nya me hum nya ka he hnyi menekholom, ke ca bi hnyi lany.

³ E hnathu e ame labö ohmeto hnyamen me ûcûk hnyi je bong hia thibut

⁴ E ame hia but odelâ vik me uuök; e ame hia but thu je jeiok.

⁵ E ame up tap cici nya, me oigigili nya ge khöhlöng me vec.

⁶ E ame hia but olabö nya hnyi je dok ae menekholom helâ me tavat adre me kuedra ka mokcu.

⁷ E ame hia but theling nya, me ca khanö nya didrut; e ame ohmakâ anyik sa cen fao.

⁸ Eke, iny ka tenge me hongot goranyai, me e ame hlöng hwanuma ge hijik hic.

⁹ E ame hia but thelöng dek je gethen ge je veto adre tretrao, me ohwalö dek je gethen.

¹⁰ E helâke me bea könya, at ame mokut tuʼ önya, helâ me liona hnyi je dok ae iyong.

¹¹ E ame hia but osaûâ dek je gethen, me oloû kiö nya; e ame hia but oba wan gak.

¹² E ame hia but lau anyin cafana, me otilö nya hnân dâ ge fana.

¹³ E ame hia but odilâ je can anyin je fana ka hnyi li wagiök.

¹⁴ Iny taben ûhiö ka tavat hia; ke adre me khumöngi nya hnyi je bong.

¹⁵ E ame hia but öunöngöti nya ge ûnyi ae hiny me osekuni nya ge khökhö-long.

¹⁶ E ame hia but thu hmetro je nyuk ge je ove to, e ame konim nya ge dröu.

¹⁷ Ke u je hia but öûsâkâûö nya me hna hic; oge hnying ut senyin.

¹⁸ Ke haingök, ka habe, E hia but tang hwegiök, me hnok hna geju kâu ûnyi ga Iehova.

¹⁹ Ûnykûme ju anyik vec me hmak, wale ge det me khökhölong.

²⁰ Ame labö ûnykûme e, me ame nom ju hnyekuk eû hnyik.

²¹ Oge me ûnykûme hmetu e, anyin a wale oge me labageju.

²² Iehova ame betenge, waleling me ca hiʼ ota, anyin ame ca um bi anyin ibetengiö.

²³ Kʼ ame teb ûnyi hnyi je hnyomakatu; e gan hmâ ânyâm hnathu.

²⁴ Haingen hnyekuk, ka habe, Jekhöûk Iehova; anyin a wale, oge me he ka geju kâu.

²⁵ E so Iehova ka tavat adre me halubahingen, ke at ame elâm e.

²⁶ E so he ka gejon me halubahingen ûhömeli anyi Iehova.

²⁷ E so ka at he ha hijen hna ûhûkâlâköuâ ke tiga ûhnyûkong.

²⁸ Hamen he ka hake laba me laba hnyibû, anyin a e ame ip hon.

²⁹ Hamen he ka ciron hnyimen eû hnyikânâ; ame ne hu gejon.

³⁰ Hamen he ka hna wahicen ka at ame khaû, a unöngötö ge hna haikongoâ.

³¹ Anyin ame ca he bi Than ka degec nyiele balua.

³² Anyin a eja ke ne a ne ovecâ, e ame he hmetu ka betenge hoton ûganiny anyin betenge.

³³ Anyin a e ame ca ovecâ ûnyi ge hnyok, me otengiâ lakon tavat.

³⁴ Adre ne uto eû hnyikânâ aten uma ceat hia hnyi hmeledrany,

³⁵ Adre ne ohaûâ hna owisa at hnyi hnyi makan At ae Beönua,

³⁶ Adre ne omono at hnyi hna ivinöâ e bi, ame ca so bi ka Than.

³⁷ Ie at ame ha, me ame hwâdâ thö, ke ame ca hûna e Than?

³⁸ Hawa, ame ca o bi ûnyi ae kong me so hnyi hnyimen At ae Beönua?

³⁹ Anyin a ieû ûhaiö at ae möt, wale at, can hwaban anyin ta je hulo?

⁴⁰ Ate me he ka elâm me cubec deta je gethen, me hmetu kö Iehova.

⁴¹ Ate me he ka kap goranyai je hnyekuta me je hnyamöta ka Khong ethö hnyi drany.

⁴² Ohmun e hia but hanyâûâ me thu musi; ke u je ca hna.

⁴³ U je hia but khaûö u ge hmonyin me hnu ohmun; u je hia but hlingâ me ca betenge.

⁴⁴ U je hia but tubi u ge ûlâ, me me ca didro hijihmun hic.

⁴⁵ U je hia but wiʼ ohmun me tiren me i ûnyi baû wanben je hnyei.

⁴⁶ Adre hia but memang kohmun je iwahnaihmiöny hia möhmun.

⁴⁷ Ame o but kohmun ot, me thop, me ba at, me hna ohia.

⁴⁸ Ame hingâlâ je wagewe ûnyi hnyi li emakök, can hna ohia hluiny ik hnyei.

⁴⁹ Ame hingölö li emakök, me ca menâ bi, ke ba thö obiny,

⁵⁰ Ke ne o but Iehova ame bwele ju me wâ ûnyi ethö hnyi drany.

⁵¹ Li emakök ame ovecâ hnyekuk, can je: hluiny hia ik taun.

⁵² Adre hia but hnu nya helâ me meno ame ga, ödra je iwahnaihmiöny mönya ke ba can.

⁵³ Adre hia but subâ degecâ anyik möt hnyi thop, me khûö veto huk,

⁵⁴ Ame khutukhavâ bök köiö; ke haingök, Adre hia but subâ degeci nya.

⁵⁵ Iehova lö, oge me hawâ iâm ûnyi hnyi thop ae dit.

⁵⁶ U je long ifucik; ca ikhâlâ li hnyikönyâm ge anyik homenâ, ke anyik tenge.

⁵⁷ U je hakekenyâ hnyi bong oge me hao u hnyin: u je ha, ka habe, Ca ot bi,

⁵⁸ Than lö, u je hia but ivino hobi könya; u je hia but ûcû melik.

⁵⁹ Iehova lö, u je wâ hwali könya; owisa thö hobi könya.

⁶⁰ U je hia but wâ hia anyidra hmonyin me hnödra je hna ûnykûme hia gak.

⁶¹ Iehova lö, u je hia but long hnödra hna haikongoâ, me hnödra je hna ûnykûme hia gak;

⁶² Je esongodidra tavat adre me tot könya, me anyidra je bihihwakecin könya hnyi je bong.

⁶³ Bethe wâ ju ûlabaidra me utilödra; inya ang at adre me sit hwânân.

⁶⁴ Iehova lö, u me he ka bi hwaban kodra hoton huliwa anyin je hnyamödra.

⁶⁵ U me he ka ham kodra hnyok ae khot, ke hângʼ ödra but.

⁶⁶ U me he ka hnu ödra hnyi hmonyin, me ohiʼ ödra eang hmeledrany anyi Iehova.