Je tenge anyi Jeremi 1 - Iaai Bible 1901 (New Caledonia)

¹ NAKAINY taun ame hake laba, waleji ae unöngöt ge at! Ke helâ me momo a safac ut walang ang! Waleji ae gan unyin ta je hnyei, ke momo than unyin je ke keihen hnyei, Kʼ ame bi fat walang ang!

² E ame tenge gan hmâ hnyi hnyinghet, ke e hnyi li wahicen deköien; E ba at hnyi je lawaeny hia he ka otubwelâ e: Kʼ ame iyawâ e je liamewaeny më, Kʼ adre me bi iwahnaihmiony më.

³ A bâ but Juda can ûöveci me huliwa ae hmak; E ame laba unyin je ethen, kʼ ame ca wâ bi hna menâ: Haba tavat hia adre me ovecâ e, me adre me khaû e hnyi dok ae hnek.

⁴ Ame tenge je getheniny Ziona, anyin ame ca o tavat ka hnyi ûkhacaköu ae ûnyi hnathu; E ba but at hnyi je homagouleny hia, kʼ ame mâng anyin tavat bihut: Ame hlöuhlöu wahlu unyin, ke haba e, me momo ame vec dö.

⁵ E beönua tavat adre me okongoâ e, kʼ ame sot bi je iwahnaihmiony më; Anyin a Iehova ame hia but ovecâ e, can hnen je hna hanyâûâ ae se hia: Adre me hom bâ lakon ae ûhnyûkong hnyi hnyimakan je iwahnaihmiöny.

⁶ Kʼ ame hia hia but bongon than unyin hlu lakon Ziona: Haba anyin je taben, me ödra tha ûcû me je aila adre me ca wâ bi ûnyi hnân han. Ke adre me kec ke ba bi tang hwege hnyi hnyimakan at ame ûhnûnû.

⁷ Hnyi bonginy vec me hmak, Jerusalema ame ûnykûme Ta je ûnyi gan ae kese hwân hnyi je bong kâû ehac: Hnyi ûen ame ta anyin tavat ka hnyi hnyamen iwahnaihmiöny, ke ba at ame hadruâ e, Ame wâ e hnen je iwahnaihmiöny, adre me hlumâ ta je hna okongoâ e.

⁸ Jerusalema ame hia but hulo gan hmâ; anyin a wale e ame helâ me ûnyi ae ikiki: Haba tavat, adre me ogânâ e adre me hûkotiâ e, anyin adre hia but wâ a e ame he thu: Eke, e ame mâng, me hwio.

⁹ E hnyi obiny anyin ûkhaû anyin ikiki; e ame ca ûnykûme obiny kâu; Anyin a wale hnân lâiâ hna oûhnyûkongoâ e; e ba at ame otubwelâ e: Iehova lö, wâ bi anyik vec; anyin ame bi gan iwahnaihmiöny.

¹⁰ Haba iwahnaihmiöny ame inâ hnyamen ka hnyi anyin ta je ûnyi hia ae kese: Anyin e ame hia but wâ je wanaithila a gʼ adre me hia but dit ka hnyi anyin dok ae kap, Waleji u je ha a gʼ adre me ca he ka dit ka hnyi ânyâm ûkhacaköu.

¹¹ Adre me mâng ta je aten hia, adre me heleû jeû; Adre hia but ham anyidra ta je ûnyi ae kese hnân ûcû jeû, mʼ adre me ohâtâ melidra: Iehova lö, bwele ju, ke wâ ju; anyin oge kong ut.

¹² Hawa, e ûnyi baû köbun tavat hia adre me vheno gethen? Bwele thö, me wâ, ame ne hu hlöuhlöu helâ me anyik hlöuhlöu, wale adre ânyâ könya. Waleji hnö Iehova hna oveci nya hnyi bonginy anyin hmonyin ae hwege.

¹³ E ame hia but kunâ ûheny dö meic ka hnyi je jeiok, kʼ ame ton bi: E ame hia but thong ert hobi kâu li cak, e ame hia but ohmetu nya; E ame hia but hake ip nya, me ohlohloi nya hnyi je bong.

¹⁴ Ame ca ge hnyamen ûhûkâlaköuâ hnok je hna hanyâûâ; Kʼ adre ûcaköuâ, kʼ adre me ip hon nyik; e ame oaûâ tang hwegiök; Haba Than ame hia but hnö nya ka hnyi je hnyamödra, ke ca khanö nya he ka tot kodra.

¹⁵ Haba Than ame hia but hûkotiâ anyik tavat hwege hia unyik; E ame hia but hawâ ûcûk ûkhacaköu ae ûnyi hnathu he ka oamamâ je wahidröu unyik: Than ame hia but ututo hlu, wale hluiny Juda hnyi hna hlec wan vine.

¹⁶ Can ta je ûnyi eling, me oge me tenge; ke haba emakök, me ame hingölö köiö ûnyi hnyi li emakök; Anyin ae ûsâkâûö but mönya at ûötubweli, at a hamen he ka okahwa hnyekuk: E ba but thatûnyi anyin je lakuk, anyin ame ton iwahnaihmiony.

¹⁷ Ziona ame lau li hnyamen; e ba at he ka otubwelâ; Iehova ame hia but ha ga Jekob, a gʼ adre me he ka iwahnaihmiony më tavat igigilo e: E ikiki Jerusalema unyidra.

¹⁸ E wisa Iehova; ke oge hia but thu anyin je hnanyibu: Je hnyei hia lö, öbun na long ju, me wâ anyik hlöuhlöu: Adre hom hwenbâ anyik je wahlu me wahidröu.

¹⁹ Oge me hawâ je la wek, kʼ adre me iyawo nya: A mokcu anyik tavat bihut me wahingat hnyi taun, Hnyi ûen adre me heleû ö ʼdra, mʼ adre me mot hmetu.

²⁰ Iehova lö, wâ ju; anyin a inya oge me vec; ame bwebwet hnyekuk; Ame hwio hynekuk eû hnyik; anyin oge hia but ûkhin fuc hwege: Haba hele vat ame oba lakon e hele, ke eiö hnyin uma e hu mok.

²¹ Adre long ut a inya oge mâng; ke ba at ame otubweli nya; A long ut je iwahnaihmiony mönya hia hna okongu nya; adre me senyin a u je hia but ânyâ: U me he ka oâ bong waleji u je thu, mʼ adre me he ka ûcû mönya.

²² E na o ju ta je hwakecidra hia ae kong hnyi hnyimâkâm; Ke ânyâ thö kodra helâji me hnâm hna ânyâ könya can hnok je hna hanyâûâ: Anyin a iny osehia but mâng, ke sēnyin dut hnyekuk.