Jeremia 8 - Iaai Bible 1901 (New Caledonia)

¹ HNYI ûen eling, haingö Iehova, adre me he ka hom je jeien je than Juda, me je jeien je taben, me je jeien tavat bi hut, me je jeien ta je perofeta, me je jeien aten Jerusalema ûnyi hnyi ta je erkemok:

² ke adre me he ka ve ip ödra hnyi hnyimakan seûno me tehi, me je dö hia hnyi drany, waleji adre me hnyok kâu, me bi athnyaba kâu, me hnu hoton, me elâm, me khudrung kâu: adre me ca he ka ûkhacaköu me konim ödra; adre me he ka hnân tatet hnyi kânâ.

³ Ke adre me he ka bemok hon bemöt hnen ta je kolon hia anyin lap ang ae kong, waleji adre me tiga laba bi ju hnyi ta je dok oge obʼ ödra ka hnyin, haingö Iehova tuhan sabaoth.

⁴ Ke u me he ka ha kodra, ka habe, Walang hna ha hnö Iehova, ka habe, Hawa, ame he tavat ka ta, me ca tot hmetu? hawa, ame he at ka saû, ke ame ca he ka hmetuhmetu?

⁵ Anyin a ieû ame hmetuhmetu tavat ang wale Jerusalema ke ame labö kolu balua? adre me kât hmâ thoi ödra, höcö he ka hmetu.

⁶ Oge me tevehlöng me long, ke adre me ca fuc wisa: e ba at ame ietra anyin hulo me ha, ka habe, Ieû hnok hna ânyâ? ödra hia thithö adre me ve hmetu ka hnyi dedra je gethen, helâ me hors ame ie wadring ka hnyi vat.

⁷ Eke, e khana but kasidainy drany ûen e: ke a wâhmakhmeto but meköta, me wahalep, me aguru, ûen adre me oʼ hnyin; ke ca khana bi lakeik hna otilâ hnö Iehova.

⁸ Ieû gabun öbun e ha, ka habe, ohmun tavat ae metâ, ke e unyihmun hnanyibu anyi Iehova? Ke wâ bi, a hia but huliwa iyawo pen ae thoi anyin tavat sihnalimen.

⁹ A hmehma but tavat metâ, adre me monumonu but, me hnok dö: wâ bi, adre hia but hna degecâ hofuc ho Iehova; ke ieû bongon metâ unyidra?

¹⁰ Anyin a wale oge me he ka ham je laöiödra ka keihen, me je idra ka keihen he ka labā: anyin a hwân ge tavat ae ûhnyûkong, ke ne o but ka tavat ae gan ödra hia thithö adre me behnyekudra omjeû, hwân ge tavat perofeta, ke ne o but ka tavat bihut, ödra hia thithö adre me huliwa iyawo.

¹¹ Ke adre hia but ometo ûhnyûkongo aat hnân hlu a lakeik me ha, ka habe, Hnahic ut, hnahic ut; ke ba bi hnahic.

¹² Hawa, adre me hmehma hwaban hnödra hna ânyâ ûnyi ae ikiki? e ba, ödra ca hmehma bi, ke ca khanʼ ödra bi he ka hmehma: anyin a wale adre me he ka tha ta me tavat adre me ta: hnyi ûen adre me senʼ ödra, adre me he ka haû, haingö Iehova.

¹³ Oge me he ka ti ohiʼ ödra, haingö Iehova: ame he ka ba wan hnyi je ivine, ke ame he ka ba wan meta, ke ame he ka meleca je lan; ke ame he ka hia gadra ta je ûnyi o ge hia but ham kodra.

¹⁴ Ke ieû ate me he ka laba monu gan? Ûkhacaköu thö, me ate me he ka dit hnyi je taun adre up haginy, me laba hnyibû eling: anyin a Iehova Khonguta ame öbnyibû öta, me habelita ge köiö adre me mekiny, anyin ate me hia but ânyâ hwakecin ae kong kö Iehova.

¹⁵ Ate me halubahingen hnahic, ke ba bi so, ke ate me halubahingen ûen metu, ke wâ bi, hlohlo bi!

¹⁶ Ame o but ûheny Dana hwan hna menâ hwege hnen haleny je hors: ame tha öbubuny hnyei hnyi ûkukuiny anyin tavat hwege, ke adre me o me an hnyei me ta je ûnyi hia hnyin: taun me tavat adre me labā e.

¹⁷ Ke wâ bi, oge me he ka kunâ köbun ta je on, me je vaipa a ca hnân ohnamâ; mʼ adre me he ka ûlû öbun, haingö Iehova.

¹⁸ E na khanönya ju he ka otubweli nya hnyi hlöuhlöu! e sënyin dut hnyekuk eû hnyik.

¹⁹ Wâ bi, ûtengien hluiny ik hnyei ûnyi hnyi hnyei ae sâkâû: hawa, ca e bi Iehova hnyi Ziona? ke ca e bi ling thaniny? anyin a ieû adre hia but ohmönyini nya ge anyidra je hnatheat, me anyidra ta je ûnyi baû a je atkanyua.

²⁰ A um dö ûen menu: obiny ju ang honivakeny, ke adre ca omeli öta bi.

²¹ Oge aat dö, anyin a aat dö hluiny ik hnyei: iny hlit ut ame o but könya uthmâhmâ.

²² Hawa, e ba basama hnyi Gileada? e ba at eling ae tren bubuny? anyin a ieû adre me ca omelo hluiny ik hnyei.