Jeremia 7 - Iaai Bible 1901 (New Caledonia)

¹ WALANG hofuc ame o kö Jeremia ûnyi ga Iehova, ka habe,

² Todrö hnyi hnyigöulen uma umö Iehova, ke haimemenâ thö eling hofuc ang me ha, ka habe, Long ju hofuc ho Iehova öbun hia thithö at Juda öbun e dit hnyi je homagöule ang he ka khudrung kö Iehova.

³ Walang hna ha hnö Iehova tuhan sabaoth Khongu Isaraela, ka habe, Ânyâwia wia thö debun je gethen, me je hwakecibun; me oge me he ka olabʼ öbun hnyi dok ang.

⁴ Ca he öbun ka labageju ka ta je hofuc thoi me ha, ka habe, Umo Iehova, umö Iehova, ödrin hia eang.

⁵ Anyin a öbun e ne ti ânyâwia debun je gethen, me je hwakecibun; öbun e ne ti owisa ka ke at me ke at;

⁶ öbun e ne ca ovecâ atkanyua, me at a mok kamen, me safac, me ca hingâlâ bi dra ae ba hnyikongon hnyi dok ang, me ca hnu hoton ke je khong, mʼ adre me okongu öbun:

⁷ awe, oge me he ka olabʼ öbun hnyi dok ang hnyi hnyei waleji oge ham ka lakamöbun, ke ne o but nyiele balua.

⁸ Wâ bi, öbun e labageju ka ta je hofuc ae thoi, ae ba troban.

⁹ Hawa, öbun e he ka venöu, me ûhlingö, me bi ûnyi monu me khemanyin thoi, me leû utö ae bo so kö Baala, me hnu hoton ke je khong, wale ae ca khanʼ öbun,

¹⁰ me o me tot hnyi hnyimakök hnyi uma eang, waleji adre ip hon e iök me ha, ka habe, Adre hnʼ ohmun; mʼ öbun e he ka anyi ta je ûnyi hia eling ae ikiki?

¹¹ Hawa, op umen tavat venöu hnyi hnyimaköbun uma eang wale adre ip hon e iök? Wâ bi inya oge wâ but, haingö Iehova.

¹² Ke he thö walang ang ka hnyi hnok ehac hnyi Silo waleji oge bök ka ip iök hnyin, ke wâ thö hnok hna ânyâ kâu can hulo anyin lakeik a at Isaraela.

¹³ Ke walang can hnobun hna ânyâ ta je huliwa hia eling, haingö Iehova, ke oge me he ka fuc! köbun, oge me vesâ hnyi hnyomakatu me fuc, ke öbun e ca long bi öbun; ke oge me hawʼ öbun ke öbun e ca ieû bi:

¹⁴ anyin a wale oge me he ka ânyâ ka uma wale adre ip hon iök waleji öbun e labageju kâu, me ka hnyi dok waleji oge ham köbun me lakamöbun helâ me hnok hna ânyâ ka Silo.

¹⁵ Ke oge me he ka digic öbun ûnyi hnyi hnyimakök, helâji me hnok hna degec je liamekeiny möbun hia, je mâtrâni Eferaima hia.

¹⁶ Anyin a wale u me ca he ka hije tavat ang, ke ca ogöranyâ tenge me hic hobi kodra, ke ca khöu bi könya: anyin oge me ca he ka ling u.

¹⁷ Hawa, u me ca wâ hnödra je hna ânyâ hnyi je tauniny Juda me je gethen hnyi Jerusalema!

¹⁸ Ta je wanakat adre me thigö utö, ke haba je kamen adre me hû meic, ke haba je momo adre me up falawa, me adre me ânyâ je ong areto hobi kâu momo thaniny drany, me hingâlâ ka ke je khong je hudiny ic, me adre me ohmönyini nya.

¹⁹ Hawa, adre me ohmönyini nya? haingö Iehova; ke ca ödra bi, me ame hmehma ta je hnyimakodra?

²⁰ Anyin a wale, walang hna ha hnen Than Iehova, ka habe, Wâ bi, ame he ka hingölö, but anyik hmonyin me anyik wathethot hon dok ang; hnyi hon at me hon meno, me hon je ûöiny hnyot, me hon wan kânâ; ke ame he ka ubâhlâ, kʼ ame ca he bi ka mok.

²¹ Walang hna ha hnö Iehova tuhan sabaoth Khongu Isaraela, ka habe, Tha hom dʼöbun je hudiny leû me anyibun ta je hut, ke an dʼ öbun ta je utiö.

²² Anyin oge ca fuc ka je lakamöbun me hûna kodra hnyi ûen oge hum ödra ûnyi hnyi hnyei Aigupito, ge ta je hudiny leû me ta je hut:

²³ ke wale bi ang ûnyi oge hûna kodra, ka habe, Long ju öbun hok hofuc, ke oge me he ka Khongubun, ke Öbun e he ka lakeik: ke tha vheno thʼ öbun gethen oge hûna, mʼ öbun e so.

²⁴ Ke adre me ca long bi, me tevehlöng, ke adre me vheno hnödra bi hna ûhnenamö hoton ihwegien hnyekudra ae kong; me he nulötudra, ke ca hnyimakodra bi.

²⁵ Hwân hnyi bong a he but hnyin je lakamöbun ûnyi hnyi hnyei Aigupito ke ne o but hnyi bong ang, oge hia but kunâ köbun je athnyabaik hia a je perofeta, me vesâkong hnyi je bong me ûkhûnöng:

²⁶ ke so bi adre me ca ling nya bi, me tevehlöng, ke adre me ohwegiâ je nyidra: me ânyâ hwakecin ae kong hmonyin hon je lakamödra.

²⁷ Ke u me he ka ha hia ta je hofuc ang kodra: ke adre me ca he ka ling u: u me he ka hawʼ ödra ke adre me ca he ka ieû köu.

²⁸ Ke u me he ka ha kodra, ka habe, Walang hnyei adre me ca long bi ifuci Iehova Khongudrin, me ca kap hna ûnö: a mokcu hnathu, adre subâ degecâ thö ûnyi hnyi ta je hnyimödra.

²⁹ Jerusalema lö, subâ luâ but leûnen bâm, me degec e, ke tenge thungaû thö hnyi dok ae gorany; anyin a hia but Iehova degec me hna but dö e ame hmonyin kâu.

³⁰ Anyin a ânyâ ûnyi ae kong hnen lakon Juda hnyi hnyimakök, haingö Iehova: adre hia but ip anyidra ta je ûnyi ae ikiki hnyi hnyin uma waleji oge ip iök hon, mʼ adre me okongoâ e.

³¹ Ke adre me op ta je dok ae göranyin Tofet, ae hnyin hnyigöulen bucen anyin je laku Hinom, me adre me thong je lakudra baga me hlu hnyi meic; waleji oge ca ûkhûnöng, ke oge ca ûnykûme.

³² Anyin a wale, wâ bi, ame he ka o je bong haingö Iehova, ke adre me ca he hmetu ka haiö Tofet, me hnyigöulen bucen anyin je laku Hinom, ke so bi hnyigöulen bucen hnân hlingâ at: anyin adre me he ka khon komok hnyi Tofet ke ne o but ame ba but hnen.

³³ Ke ame he je unyin tavat ang ka hnân an je meno ame gâ ethö, me je menoiny hnyot; ke ba at ame he ka bwebwelâ.

³⁴ Ke oge me he ka obuhlumo hnyi je tauniny Juda, me je gethen minya hnyi Jerusalema, hwan senyin, me hwan hobâ, me hwan li at ödre tep faipoipo: anyin ame he ka ba aten hnyei.