Jeremia 6 - Iaai Bible 1901 (New Caledonia)

¹ TA je lakon Beniamina lö, kec bemöt dö ûnyi hnyi wanben Jerusalema, ke tûâ thö khoto hnyi Tekoa ke ogörânyâ thö haten hnyi hon Beth-akerem: anyin ame selâdrâ ûnyi ae kong ûheny hnyi hwadro, me hna ûhangö ae gan.

² Oge me he ka subâ degecâ hluiny Ziona ae hmanenang me menyik.

³ Ame he ka o kâu tavat tuö mamoe tha ödra me haledra ta je hnahat meno; adre me he ka otilâ umödra je uma mano igigilo e, adre me he ka ve ûhalin hnyi ta je hnödra.

⁴ Penapena thö he ka vat më; todrö, me ate me he ka ölö hnyi jebigo. E köiö gata! anyin ae haû but seuno, e beû but je hmenon sahac.

⁵ Todrö, mʼ ate me he ka ölö hnyi hnyinghet, me ate me he ka ohia je uma umen tuhan.

⁶ Anyin a hia but Iehova tuhan sabaoth ha, ka habe, Sö but ta je ûö, ke hlu thö goranyai kânâ cicö Jerusalema: wale taun adre me he ka bi hwaban; ae ti hu ûöveci eû hnyin e.

⁷ E ame hingâlâ hwakecin ae kong helâ me pupua ame hingölö hnyin köiö: adre me löng hnyin e ûokonguny me hna söh; e bala bi hnyi hnyimakök mok me je aat.

⁸ Jerusalema lö, kap ju hna ûnö, wâ e nye hwio hnyekuk gam; wâ oge nye he ka öba wânâm, me u me hnyei adre me ca labā.

⁹ Walang hna ha hnö Iehova tuhan sabaoth, ka habe, Adre me he ka hlo je kolon Isaraela helâ me hnyei vine: hmetu ju hnyamâm ka hnyi je tangen, helâ me at ame tau je wan vine.

¹⁰ Oge me he ka fuc me koû köia, me me löng? wâ bi, adre ca peritomonâ je hnyikönyödra, me me ca khanʼ ödra he ka tevehlöng: wâ bi, adre me wia hofuc ho Iehova me me hnân bi ûhiö; adre me ca senyinâ e.

¹¹ Anyin a wale, oge me unöngöt ge hmonyin anyi Iehova; iny sënyin dut ge hok hnyok: hingâlâ but e hon je thoth eû hnyi gethen, me hon wahidröu adre me tha ûkhacaköu: anyin adre me he ka tha hom baga me âiân momo, me hingat me at ae se hia hunainy.

¹² Ke ame he ka umen ke keihen umödra je uma, tha e me ta je hnyei me omomo: anyin oge me he ka hai hnyamok hon aten hnyei, haingö Iehova.!

¹³ Anyin a hwân ge tavat ae ûhnyûkong gadra, ke ne o but ge tavat ae gan gadra, ödra hia thithö adre me behnyekudra omjeû; ke hwân ge ta je perofeta ke ne o but ka tavat bihut adre me ânyâ thoi.

¹⁴ Ke adre hia but ometo ûhnyûkongoâ je aat hnân lakeik me ha, ka habe, E hnahic ut, e hnahic ut: ke ba bi hnahic.

¹⁵ Hawa, ödra hmehma can ta je ûnyi ae ikiki adre me ânyâ? e ba, ke ba ong hmehma gadra, ke ca khanʼ ödra hmehma: anyin a wale adre me he ka tha ta me tavat adre me ta: hnyi ûen oge me he ka senʼ ödra adre me he ka haû, haingö Iehova.

¹⁶ Walang hna ha hnö Iehova, ka habe, Todrʼ öbun hnyi je gethen, me wâ, me hnö je gethen kâû adrem, ewa gethen ae so, me vheno e, me öbun e he bi ka wâ hna menâ hobi kâu je hanubun: ke haingodra, ka habe, Ohmun e ca he ka vheno e.

¹⁷ Ke oge me otilâ tavat he ka tuʼ öbun he ka ha, ka habe, Löng ju ifucin trutru; ke haingodra, ka habe, Ohmun e ca he ka löng.

¹⁸ Anyin a wale löng ju öbun ta je hnyei, ke haba öbun tavat öbun e ûkhacaköu, khanʼ öbun dö ta je ûnyi gadra.

¹⁹ Hmeledrany lö, löng ju: wâ bi, oge me he ka hom ûnyi ae kong ka tavat ang, wale troban je ûnykûmenödra, anyin adre me ca hia but löng hok hofuc; ke haba anyik hnanyibu adre hia but hna degecâ e.

²⁰ Hnân eû könya libanu adre me oâ ûheny Sheba, me ûö ae hnebwia ûnyi hnyi hnyei ae sâkâu? oge me ca kap soâ je hudiny anyibun leû, ke oge me ca senyinâ anyibun ta je hut.

²¹ Anyin a wale walang hna ha hnö Iehova, ka habe, Wâ bi, oge me he ka ip ta je ûnyi hnân ohavâ hnyi hnyimakan tavat ang: ke ame he je kamen me je lakon ka tha haû hnyin e; ame he ka tha mok at me waeny.

²² Walang hna ha hnö Iehova, ka habe, Wâ bi, ame he ka o tavat ûhedra hnyi hnyei hnyi hwadro; ke adre me he ka obwebwelâ ke hnyei ae gan ûnyi hnyi je can hmeledrany.

²³ Adre me hok cafana me ö; ödra tavat beöveci, me ca betenge; ame û ifucidra helâ me köiö, ke adre me tabâ je hors; adre me ve tot metâ hia, helâ me tavat ka hnyi vat, ûcom, hluiny Ziona.

²⁴ Ate hia but long ûthumetu gadra; e sënyin dut ta je hnyamöta: ame hom tilʼ öta hnen hlöuhlöu me vec, helâ me momo ame he ka hnokoâ.

²⁵ Ca he but ka hnyi ta hnyei, ke ca vheno gethen; anyin ae hu hele vat eling anyin iwahnaihmiony, me hnân ootâ hnyi je ke keihen hia.

²⁶ Nokon ik hnyei a hlu lö, oweikö u ju ge mano ae gan nân, seset ju hnyi hnabadröu: tenge thungaû thö helâ me at ame tenge ge nokon a khaca, ame tenge thungaû hwege; anyin ame he ka ie o köta at sei.

²⁷ Oge hia but otilö hnân tap tue me hnabâ unyin lakeik; me ame he ka khanö u me cubec dedra gethen.

²⁸ Ödra tavat ûjöng hia, adre me tha ngenu me tavat ûhaiö: ödra bras me fao: ödra tavat iyawo hia thithö.

²⁹ Ame sâ hwege ûnyi hnân tûâ meic; ke haba meic ame an led; ame ânyâwia bâûâ hnen at ame leû fao; ke adre me ca oc degecâ tavat ae kong.

³⁰ Adre me he ka hwenyi iödra sileva adre degec, anyin a hia but Iehova digic ödra.