Jeremia 52 - Iaai Bible 1901 (New Caledonia)

¹ TWENTE wan dut je hunai Zedekia hnyi ûen e ame hwân he ka musi; ke e ame musi eleven je huna hnyi Jerusalema: ke haba ien hinyen, me Hamutala a nöku Jeremia at Libena.

² Ke e ame ânyâ hulo hnyi hnyimakö Iehova, helâji me hna ânyâ hia ga Jehoiakima.

³ Anyin a can hmonyin anyi Iehova adre me ânyâ ka Jerusalema me Juda ke ne o but ame digic ödra hnyi hnyimakan: ke haba Zedekia ame ûkhin fuc ka than Babulona.

⁴ Ke haba hnyi huna a naininy anyin musi, hnyi tehi a teniny, hnyi bong a teniny tehi, haba Nebukaneza than Babulona ame o but hnyi Jerusalema, e me anyin utbavat hia, me hunuma cicö e; ke adre me otilâ je taben vat igigilo.

⁵ Ke adre me igigilo taun ke ne o but hnyi huna a eleveni Zedekia than.

⁶ Haba hnyi tehi a vakiny, hnyi bong a naininy tehi, e gan hmâ hmiâ hnyi taun, ke ba but an tavat.

⁷ Ke adre me kia taun, me ame kec tavat vat hia me he but hnyi hnyinghet unyi hnyi taun adre gethen hnyi homagöulen wanben li hak adre up veten, hnyi utkânâ anyin than; (ke e bi at Kaledaia igigilo taun:) ke adre me kec hnyi gethen ûheny hnyi dok ae tha hon.

⁸ Ke haba utbavat anyin at Kaledaia, me adre me hnu than, me khöû Zedekia hnyi je dok ae tha hon hnyi Jeriko; ke ame vese but anyin utbavat gan.

⁹ Me adre me kât than, me hom e ka than Babulona Ribela ai hnyi hnyei Hamath, me e ame owisa kâu.

¹⁰ Ke haba than Babulona ume hjingâ je laku Zedekia hnyi hnyimakan; ke e ame hlingâ minya je taben Juda hia hnyi Ribela.

¹¹ Ke e ame ûâ li emakö Zedekia; ke haba than Babulona me ame ca e ge fao, me hom e Babulona ai, me ip e hnyi uma ceat ke ne o but bong e ame mokcu hnyin.

¹² Ke haba hnyi tehi a thabûnginy hnyi bong a teniny tehi, wale huna a naintini Nebukaneza than Babulona, ame o but Nebuzaredana hnyi Jerusalema wale taben tavat tue, at ame tot hnyi hnyimakan than Babulona:

¹³ ke e ame thong degecâ uma umö Iehova, me uma umen than; ke e ame thong degecâ ge meic ta je uma hia hnyi Jerusalema, wale je uma ae gan hia.

¹⁴ Ke haba utbavat hia anyin at Kaledaia unyin taben tavat tue, me adre me kia degecâ hna up veto hnyi Jerusalema igigilo.

¹⁵ Me haba Nebuzaradana taben tavat tue ame hom bâ ke je hnyat ae theduoc me je kolon tavat a hnen biju hnyi taun, me tavat kec waleji adre me ut ka than Babulona, me ke je hnyat minya a je kolon.

¹⁶ Ke haba Nebuzaradana taben tavat tue ame ip biju keihen ae ti theduoc hnân tuö je hnyei vine me tavat belök.

¹⁷ Ke haba li hmolom bras hnyi uma umö Iehova, me je taben, me taben köiö a bras hnyi uma umö Iehova, at Kaledaia adre thö amamâ me hom brasiny hia Babulona ai.

¹⁸ Adre me hom minya je öt, me je soi, me je uthesiûn, me je kaia, me je spun, me je omjehen bras hia waleji adre me huliwa kâu.

¹⁹ Ke haba taben tavat tue ame hom je utkaia, me je taben meic, me je kaia me je öt, me je taben lamepa, me je spun, me je kaia; adre hom goliny je ûnyi ae gol, me silevainy je ûnyi ae sileva.

²⁰ Haba li hmolom, ke khaca taben köiö, me je bolok bras a twelv eû hnyi hmelen je taben, waleji hnö Solomona than hna ânyâ hobi kâu uma umo Iehova: e ca hnân tuluto ûhmakiny bras hnyi ta je ûnyi hia eling.

²¹ Ke haba li hmolom, me eitiny kubit ibeûen goranyai hmolom; ke a wâdrâ e ge tö a twelv kubit; ke haba ûhakiny me vak ta banyen; e moku hnyin.

²² Ke e hu ethö hon e ban a bras; ke faiv kubit ibeûen goranyai ban, tha e me boert me je rimona hon ban igigilo, bras hia: ke helâe hmolom a loiny ae hu e me je rimona.

²³ Ke usa nainte siks je rimona hnyi je baten; haba ta je rimona hia hnyi boert igigilo, me wan haded.

²⁴ Ke haba taben tavat tue ame hum Seraia at bihut ae beönua, me Zefania at bihut a loiny, me je hnyat a kun hnyat tuö hwanuma:

²⁵ ke e ame hom ûnyi Unyi taun ke eunuka at ame muso tavat vat; me tavat a seven tavat ödrin e wâ hnyimakan than, wale tavat adre wâ hnyi taun; me at sihnalimen anyin taben utbavat, at ame ûkhacakönâ tavat aten hnyei; me tavat a sikste adre wâ hnyi tauu unyin aten hnyei.

²⁶ Ke haba Nebuzaradana taben tavat tue ame hum ödra, me hum ödra ka tuhan Babulona Ribela ai.

²⁷ Ke haba than Babulona ame kot hlingʼ ödra hnyi Ribela hnyi hnyei Hamath. Me adre me hom hwenbâ at Juda ûnyi hnyi idra hnyei.

²⁸ Walang tavat a hom Nebukaneza a je bâ; haba hnyi huna a seveniny, me ödrin theri thauzan ke twente theri at Juda:

²⁹ haba hnyi huna a eitini Nebukaneza, me ödrin eit haded ke thote tu e ame hom bâ ûhedrin Jerusalema:

³⁰ ke haba hnyi huna a twente theri Nebukaneza, me Nebuzaradana taben tavat tue ame hom bâ at Juda, a ödrin seven haded ke fâte faiv: ke haba ûseiny tavat hia me foa thauzan ke siks haded.

³¹ Ke haba hnyi huna a thote seveniny bâ a Jehoiakin than Juda, hnyi tehi a twelviny, hnyi bong a twente faiviny tehi, me haba Evile-merodiak tuhan Babulona, hnyi huna a hwân hnyin anyin musi, me e ame ogöranyâ bö Jehoiakin than Juda, me hom e ûnyi hnyi uma ceat;

³² me e ame ha hofuc ae menyik kâu, me ogöranyâ anyin theron hon je theron anyin ta je than unyin hnyi Babulona.

³³ Ke e ame bi hnen anyin je ûkhaûen uma ceat, ke e ame hnyi han më hnyi ta je bongon hia anyin mot.

³⁴ Ke haba jekhon, me adre me labö khene jekhon unyin than Babulona, hnyi ke bong me ke bong ke ne o but hnyi bong e ame mokcu hnyin, a je bongon hia anyin möt.