Jeremia 51 - Iaai Bible 1901 (New Caledonia)

¹ WALANG hna ha hnö Iehova, ka habe, Wâ bi oge me oâ ûcon Babulona, me ûcon tavat adre me laba hnyi Leb-kamai, ang at ame ohia.

² Ke oge me he ka kunâ Babulona ai je atkanyua, tavat adre me he ka ulec e; ke adre me he ka öba onyen hnyei: anyin adre me he ka ve tot kâu igigilo hnyi bonginy vec.

³ E so ame ca he at hlic fana ka lau anyin cafana, ke so e ame ca he ka hobeluâ anyin ûkhaûen vat: ke ca he öbun ka omelo wahidröuiny; kot hia thö anyin utbavat.

⁴ Ke adre me he ka ta a ta je hna kot hnyi hnyei Kaledaia, me je hna dâoâ hnyi je getheniny.

⁵ Anyin a ca degec Isaraela me Juda hnen Khongon, a Iehova tuhan sabaoth; eja ke ne a ne unöngöt idra hnyei ge hulo ka Kabi Isaraela.

⁶ Kec ut ûnyi hnyi Babulona, ke ve omeli öbun dö; ca he öbun ka hnyi mok hnyi anyin bi hulo: anyin a ûen dut ang bi hwaban ga Iehova; e ame he ka ham kâu hwaban.

⁷ Babulona ehac, me helâji me kaia gol hnyi hnyamö Iehova, kʼ ame omono hmeledrany hia: kʼ ame hia but ijem wainainy ge ta je hnyei; anyin a wale ame monu thö ta je hnyei.

⁸ Ame ie ta but Babulona me aû but: kuku tenge thö gan; hok basama thö hnân eny anyin vec, kʼ ame ne he la ka mot.

⁹ Ate me beomeli Babulona, kʼ ame ca mot bi: hna but e, ke ate me he ka ve he ka hnyi ta je ita; anyin a haba hwaban bi, me ke ne o but ka hnyi drany, kʼ ame o but ka hnyi ta je ûlâ.

¹⁰ Haba Iehova ame hia but oâ hwakecita ae wisa: ai öbun mʼ ate me he ka ba gaga hnyi Ziona huliwa anyi Iehova Khonguta.

¹¹ Khet ju je fana; kât hma ju je bec: Iehova ame otilâ hanon je than Madai; anyin a haba hnen hna ûnykûme ge Babulona, he ka ohia e: anyin a wale hwaban ûnyi ga Iehova, a hwaban umen uma.

¹² Otilâ thö haten hon hna up veto hnyi Babulona, ohmâ ju tavat adre me hmâkâ, otilâ thö tavat tue, penapena thö he ka khöu mokut: anyin a Iehova ame ûnykûme me ânyâ, waleji hnen hna ha ge tavat adre me laba hnyi Babulona.

¹³ At ame laba hnyi je köiö ae se hia, me tren omjeû ae gan, ame o but obiny köu, tulutiny behnyekon a u.

¹⁴ Haba Iehova tuhan sabaoth ame khemanyin gan bi, ka habe, E hnathu oge me he ka ounöngöti u ge at helâ me je wahamon; ke adre me he ka hongot goranyai ûcom.

¹⁵ E ame hia but op drany ge maniny man, me otilâ hmâ ta je hnyei ge anyin metâ, me ulolo drany hnen anyin wâhmakhmeto:

¹⁶ e ame fuc me ame bwebwet bi ta je köiö hnyi drany, ke e ame oâ hai ûnyi hnyi je can hmeledrany; e ame op hucuce hobi kâu we, me oâ ang ûnyi hnyi tangen omjeû.

¹⁷ Ödra monu hia tavat, tavat ae ca khanʼ ödra; ame hmehma but tavat hia huliwa gol can anyidra bi hnatheat: anyin a thoi but anyin idola adre okoiâ, ke ba homenâ eû hnyidrin.

¹⁸ Ödra ta je ûnyi baû, huliwa hnân hlumâ: ame he ka hi ödra but hnyi ûen adre me senʼ ödra.

¹⁹ E ca helâe jekhoû Jekob; anyin a e at ame op hia; ke Isaraela tribuiny a wajekhon: Iehova tuhan sabaoth ien.

²⁰ U anyik utöhmu me anyik ûnyi hnân vat: oge me he ka hum u hnân he ka thö oamamâ je hnyei; me ohia je dokhu;

²¹ ke ûnyi gam oge me he ka thö oamamâ hors me at ame tabâ; me oamamâ kariota me at ame tabâ;

²² ke ûnyi gam oge me he ka oamamâ obaga me omomo, me oamamâ hingat me thoth; me oamamâ hidröu me hlu;

²³ ke oge me he ka oamamâ at tuö mamoe me hnahat meno unyin, ûnyi gam; me oamamâ at ame hwio kânâ me li bolok unyin, me oamamâ je gavena me je taben.

²⁴ Ke oge me he ka bi hwaban kö Babulona, ke tavat hia adre me laba hnyi Kaledaia ta je monu hia waleji adre ânyâ hnyi Ziona hnyi hnyimaköbun, haingö Iehova.

²⁵ Wâ bi, bucen lö at ame okongo, e ve inya but möu, haingö Iehova, u at ame okongo hia hmeledrany: ke oge me he ka lau hnyamök hom, me hagutö u ûnyi hnyi hon je kic, me wiö u hnân bucen adre thong.

²⁶ Ke adre me ca he ka hom unyâm veto hnân ban bahebet, me veto hnân taben; ke u me he ka ba wan nyiele balua, haingö Iehova.

²⁷ Otilâ thö boûdila hnyi hnyei, tûâ thö trutru hnyi je hnyei, penapena thö je hnyei kâu, hawâ ûkhaca-köuâ thö kâu ta je dökhuiny Ararata, me Mini, me Asekenaza: otilâ thö ke taben vat kâu; oâ thö je hors helâ me je wahamon ae ûjejong.

²⁸ Penapena thö je hnyei ûcon, wale je tuhan Madai, me anyin je gavena, me anyin je taben hia, me je hnyei hia e ame muso.

²⁹ Ke ame öbubuny hnyei me vec: anyin ame tethmâ je hna ûnykûme hnö Iehova ge Babulona, he ka öba wan hnyei Babulona, ke ba aten.

³⁰ Ame ca bevat hnen tavat hwege hnyi Babulona, adre me laba hnyi hnyin je hnabâ: e ba but tang hwegiödra; ödra ûcû me omomo: a thong ut je hnyabadra; ke a mou thö ta je ohmâiny.

³¹ Ame he ke at ame wadring ka iouny me ke at ame wadring, kʼ ame he ke ûthumetu ka iouny me ke ûthumetu, he ka thumeto than Babulona a gʼ adre hia but kot anyin taun hnyi je ke keihen hia:

³² ke adre me hûgûnâ je gethen, me thong je sahlowe ge meic, kʼ ame seon bi tavat vat.

³³ Anyin a walang hna ha hnö Iehova tuhan sabaoth, a Khongu Isaraela, ka habe, Haba hluiny Babulona, me helâ me hna huje hwit hnyi ûen adre me ututo e; ke meokhaca me ameʼ he ka o but kâu ûen menu.

³⁴ A hia but ön nya hnö Nebukaneza than Babulona, e ame hia but ohmöiöngi nya, e ame wiö nya me kaia ae ba onyen; e ame utö nya helâ me tanimo; e ame osekunâ e ge anyik ta je ûnyi ae ti senem; e ame obö nya kâû.

³⁵ Ame he ka ha hnen at ame laba hnyi Ziona, ka habe, E so ame he ka mokut hon Babulona hna okongu nya me je liamekeiny mönya; kʼ ame he Jerusalema ka ha, ka habe, Ame he drök ka mokut hon tavat adre me laba hnyi Kaledaia.

³⁶ Anyin a wale walang hna ha hnö; Iehova, ka habe, Wâ bi, oge me he ka ivino hobi köu, me bi hwaban hobi köu; ke oge me he ka ohmö anyin köiö, me ohmö anyin hna pupua.

³⁷ Ke ame he Babulona ka helâ me hna digic thatûnyi, ke hnyaban ta je luko, a hnân lâiâ, me ju, ke ba at ame he ka labā.

³⁸ Adre me he ka tha kuku helâ me je nokon liona.

³⁹ Ödra ka kahwa me oge me he ka bi jeu hobi kodra, me omonu ödra ge grâg, mʼ adre me he ka hobâ, me mokut nyiele balua, me ca hmak hmetu, haingö Iehova.

⁴⁰ Oge me he ka hum ödra helâ me lakon mamoe he ka hlingʼ ödra, helâ me je mamoe baga me je got baga.

⁴¹ Nakainy hna hûgûnâ Sesaka! kʼ ame ie utut hnen hna ogânâ hnen hmeledrany hia! Ekölö, e ba but wan Babulona unyin je hnyei hia!

⁴² Ame khibi thö köiö hon Babulona, ame khutu takoû e hnen je waköiöny ae se hia.

⁴³ A hnyot ut anyin je taun, hnyei ae hwahwacit, me hnyebuba, hnyei ae ba at ame he ka labā, kʼ ame ca he hnyin ke nokon at.

⁴⁴ Ke oge me he ka bi hwaban kö Bel hnyi Babulona, ke oge me he ka hom hmetu ûnyi hnyi hnyimen ûnyi e ame hia but utâ; ke ame ca he ka o kâu je hnyei: eke, ame he ka ta but hna up veto hnyi Babulona.

⁴⁵ Lakeik lö, he thʼ öbun ûnyi hnyi hnyin e, mʼ öbun e ve mot ûnyi ge hmonyin anyi Iehova ae gan hmâ.

⁴⁶ Ke ca sënyin bi je hnyekubun, me outen ûthumetu adre me be ka löng hnyi hnyei; anyin ame he ka o ûthumetu hnyi huna eang, ke hwaban huna ang ame he ka o ke ûthumetu me ûokonguny hnyi hnyei, ke taben ame ve e me ke taben.

⁴⁷ Anyin a wale, wâ bi, ame he ka o je bong ke oge me he ka bi hwaban ka je hnatheat anyin Babulona, ke ame he ka hmehma hnyeiny hia; ke ame he ka ta je hna kot hia hnyi wanben e.

⁴⁸ Ke ame he drany me hmeledrany me ta je ûnyi hnyin ka khumöng senyin hon Babulona; anyin ame he ka o kâu je tavat söh ûnyi hnyi hwadro, haingö Iehova.

⁴⁹ A hia but Babulona öta je hna hlingâ a at Isaraela, helâe ame he ka ta je hna hlingâ hnyi Babulona hnyi hnyei hia.

⁵⁰ Öbun tavat öbun e kec mot ge hele vat, hele thö, ca tot bi; ûnykûmi Iehova thö ûnyi hnyi dok ae sâkâû, e so e kû Jerusalema eû hnyi je hnyekubun.

⁵¹ Ohmun e hmehma but anyin a ohmun e löng hna ûhaikonguny; ame tube je hnyimaköhmun hmehma: anyin a haba je atkanyua adre me o but ka hnyi je dok a kabiny uma umö Iehova.

⁵² Anyin a wale, wâ bi, ame he ka o je bong, haingö Iehova, ke oge me he ka bi hwaban ka anyin je hnatheat; ke ame he tavat ae aat ka vec hnyi hnyeiny hia.

⁵³ Eja ke ne a ne ölö hnyi drany ai Babulona, ke eja ke ne a ne ohmâ je dok a göranyin ae hwege, ame he ka o kâu ûnyi gak tavat söh, haingö Iehova.

⁵⁴ Hwan kuku tenge ûnyi Babulona, me ûokonguny ae gan ûnyi hnyi hnyei Kaledaia!

⁵⁵ anyin a Iehova ame söh Babulona, me ohia ûnyi hnyin e hwan ae gan; ke ame mea je wa-köiöiny helâ me je köiö ae se hia, ame fuc ut hwan:

⁵⁶ anyin ame o but kâu, wale ka Babulona at söh, ke adre me hom but anyin tavat hwege, ame hmetru thö anyidra je cafana: anyin a Iehova Khong at ame bi hwaban, e ame he bi ka bi hwaban.

⁵⁷ Ke oge me he ka omono je tuhan me tavat unyin ae metâ, me je gavenainy me anyin je taben, me tavat unyin ae hwege; ke adre me he ka mokut nyiele balua, me ca hmak hmetu bi, haingen Than, Iehova tuhan sabaoth ien.

⁵⁸ Walang hna ha hnö Iehova tuhan sabaoth, ka habe, Adre me he ka thö degecâ je haginy ae lau adre op hnyi Babulona, kʼ adre me he ka thong ge meic je hlinginy homagouleny ae gorany; ke ame he tavat ka huliwa hnân ûnyi baû, me je hnyei hnân meic; ke adre me he ka sënyin.

⁵⁹ Walang hofuc ame hûna Jeremia perofeta kö Seraia, nöku Neria, nöku Maseia, waleji hnyi hnen hna tha he me Zedekia than Juda Babulona ai hnyi huna a vakiny anyin musi. Haba Seraia, me wale at muso hnyaban than.

⁶⁰ Ke haba Jeremia ame sihnalimen hnyi tusi ta je ûnyi ae kong ame he ka o kö Babulona, wale ta je hofuc eang hia waleji adre me sihnalimen ge Babulona.

⁶¹ Ke haba Jeremia ame ha kö Seraia, ka habe, U ka o but hnyi Babulona, me wâ ju, me aû ta je hofuc ang hia,

⁶² me ha, ka habe, Iehova lö, u je ha ge dok ang he ka ohia, me me ca he ke at ka labā, ame ne at, ame ne meno, ke ame he ka hnyot nyiele balua.

⁶³ Ke u ka um dö aû tusi ang, me u me he ka hûkölö veten me khûâ e ka hnyi wanben Euferate:

⁶⁴ ke u me he ka ha, ka habe, Ame he Babulona ka dit helâe, ke ame ca he bi ka höhöi can okongon oge me he ka oâ kâu: ke adre me he ka sënyin. A um dö je hofuc ho Jeremia.