Jeremia 50 - Iaai Bible 1901 (New Caledonia)

¹ HOFUC ame ha Iehova ge Babulona me hnyei Kaledaia a deny Jeremia perofeta.

² Haimemenâ thö unyin ta je hnyei me omanena thö, me otilâ thö ke haten; omanenâ thö, ke ca ikhâlâ bi: ha thö, ka habe, Adre hûgûnâ Babulona, a hmehma but Bel, e hlohlo but Merodaka; e hmehma but anyin je hnatheat, e hlohlo but je idolainy.

³ Anyin ame o ke hnyei ûcon ûnyi hnyi hwadro, ame he ka öba wan iny hnyei, e ba at ame he ka labā e: adre kec ut, e hiʼ ödra, wale at me meno.

⁴ Hnyi je bong eling me ûen e, haingö Iehova, ame he ka o je lakon Isaraela, tha ödra me je lakon Juda, adre me he ka he me tenge tot, me elom Iehova Khongudrin.

⁵ Adre me he ka hnö ge Ziona me hnyimakodra kâe, me ha, ka habe, Ai öbun, ate me he ka ûkhacaköu unyi Iehova, hnyi ûhihinyköu a nyiele balua, ke ca hnân hnying.

⁶ Haba je lakeik a hia but helâ me je mamoe a hia, a omonu ödra hnen tavat tuʼ ödra, adre hia but hna degeci ödra hon je bucen: adre me he monu hon je bucen me je hut, adre hnying ut hnödra hna menâ.

⁷ Ame hia but ön ödra hnen tavat hia adre me ö ʼdra: ke haingen je iwahnaihmiony mödra, ka habe, Ohmun ca kong anyin adre hia but ânyâ hulo kö Iehova, a hnyaban wisa, wale Iehova hna gejon hnen lakamödra.

⁸ Kec dö ûnyi hnyi hnyin Babulona, ke he but ûnyi hnyi hnyei Kaledaia, ke helâ ju öbun me je got baga a hnyimakan hna hat meno.

⁹ Anyin a wâ bi oge me he ka bwebwet, me oâ ka Babulona ta je hnyei ae gan ke se hia ûheny hnyi hwadro: ke adre me he ka tot metâ kâu; adre me he ka hom e ûheny e; ame he anyidra je fana ka helâ me je fana anyin at ae hwege ae khenen vat; e ba at gadra ame he ka hmetu baû.

¹⁰ Ke adre me he ka söh Kaledaia: ke ame he ka sekudra hia tavat adre me söh e, haingö Iehova.

¹¹ Anyin a öbun e senyin me hobâ, tavat adre me soh ik, anyin a öbun e ututut helâ me nak kau at ame utö wan hwit, me kuku helâ me je hors ae hwege;

¹² ame he hinyöbun ka hmehma gan hmâ; ke ame he ka hlohlo at ame hnöku öbun: wâ bi, e ame he ka hnyei a biliny, hnyebuba, me atgec, ke hnyot ut.

¹³ Can hmonyin anyi Iehova adre me ca he ka labā e, ke e ame he hia ka ba wan: ke adre me he ka lâiâ tavat hia thithö tavat adre me he hnyi Babulona, me jû, can ta je okongon hia thithö.

¹⁴ Tot metâ thö ka Babulona igigilo, öbun hia thithö tavat hlöu cafana; hlec ut kâu, ca behânâ je fana: anyin a e ame hia but ânyâ hulo kö Iehova.

¹⁵ Hongot dö goranyai kâu igigilo; a ngâ but; a kolu but je hak, kʼ adre kia thö je hna up haginy: anyin a waleling hmonyin anyi Iehova; bi hwaban ju kâu; ânyâ thö kâu helâ me hnen hna ânyâ.

¹⁶ Suba degecâ but at ame tā ûheny Babulona, me at ame huliwa ge ûnyi hnân subö hwit hnyi ûen menu: adre me he ka ve hnyimakodra ka hnyi je idra, me ve kec ka hnyi idra je hnyei, can hele vatiny ûöveci.

¹⁷ Isaraela mamoe adre oveseâ; ame alen e hnen je liona: a bân than Asuria ka an e; ke a biliny Nebukaneza eang than Babulona ame thö je jeien.

¹⁸ Anyin a wale, walang hna ha hnö Iehova tuhan sabaoth, Khongu Isaraela, ka habe, Wâ bi, oge me he ka bi hwaban ka than Babulona me iny hnyei, helâji me hnok hna bi hwaban ka than Asuria.

¹⁹ Ke oge me he ka ohmetu Isaraela ka hnyi hnyaban; ke e ame he ka han tot hon Karemela me Basana, ke e ame he ka han me sekon hon je hut hnyi Eferaima me Gileada.

²⁰ Hnyi je bong eling me hnyi ûen e, haingö Iehova, adre me he ka elâm hulo anyin Isaraela, ke ba but: me je hulo anyin Juda, ke adre me ca be ka wâ: anyin oge me he ka thang je monu anyin tavat oge me hna me linân kolon.

²¹ He thö ka hnyi hnyei Merathaim, he ka vat më, me ûcon tavat adre me laba hnyi Pekoda: hlingâ ju me ti ohia hwa-bödra, haingö Iehova, ke ânyâ hia thö helâji me hnok hna hûna köu.

²² E hu hwan vat hnyi hnyei, me ûokonguny ae gan.

²³ Nakainy, hna thu hmetro hamainy hmeledrany hia! Nakainy Babulona a ba wan unyin je hnyei!

²⁴ Oge hia but töu hnewem, me u me hnok dö Babulona, ke e ca khanö u bi: adre me ō u me kot u minya, anyin a u je vat me Iehova.

²⁵ Haba Iehova ame hia but khong anyin je uma omjehen vat, me hom but ûnyi hnyin je ûnyi hnân vat hnyi anyin hmonyin: anyin ae hu huliwa anyin Than Iehova tuhan sabaoth, hnyi hnyei Kaledaia.

²⁶ Ai öbun kâu ûhebun hnyi je dok ae sâkâû, khong ut je omjehen; jien dö e goranyai helâ me hna digic thatûnyi, ke ti ohiâ e; me me ba but kolon.

²⁷ Hlingâ but haleny je bolok hia; e so adre me he ka hnyi hna hlingâ: ekölö gadra! anyin ame o but bongudra bong, ûen senâ e.

²⁸ Ifucin tavat adre me kec me tavat ae mot ûnyi hnyi hnyei Babulona, mʼ adre me haimemenâ hnyi Ziona hna bi hwaban hnö Iehova Khonguta, wale hwaban ge umen uma kap.

²⁹ Hawâ ûkhacaköuâ thö ka Babulona tavat hlic fana, tavat hia adre me hlöu cafana; hunuma ju igigilo e; ca hna ke at ka kec mot: ham dö kâu helâ me anyin huliwa; ânyâ hia thö kâu helâ hiaji me hnen hna ânyâ: anyin a e ame hia but hwege hnyimakan kö Iehova, Kabi Isaraela.

³⁰ Anyin a wale ame he ka ta hnyi ta je getheniny wahidröuiny, ke adre me he ka ohia anyin tavat vat hia hnyi bong eling haingö Iehova.

³¹ Wâ bi, iny iwahnaihmiony möu, u at bigan, haingen Than. Iehova tuhan sabaoth: anyin ame o but bongom bong, wale ûen oge me he ka senö u.

³² Ke ame he ka haû me ta at ae bigan, ke ba at ame he ka hai hmetu e: ke oge me he ka hû meic hnyi tauniny, kʼ ame he ka an e igigilo hia.

³³ Walang hna ha hnö Iehova tuhan sabaoth, ka habe, Adre me tha ovecâ lakon Isaraela, me lakon Juda: ke adre me köt ödra hnen tavat adre hwenbʼ ödra; adre me höcö ke ka hnʼ ödra.

³⁴ E hwege at ame ûcû melidra; Iehova tuhan sabaoth ien: e ame he ka ti ivino hobi ködra, me me he ka omenâ hmeledrany, me oöbubunyâ tavat adre me laba hnyi Babulona.

³⁵ Ke haingö Iehova, ka habe, E hu hele vat hon at Kaledaia, ke hon tavat adre me laba hnyi Babulona, ke hon anyin je taben, ke hon anyin tavat ae metâ.

³⁶ E hu hele vat hon tavat bigan thoi, ke adre me he ka monu: e hu hele vat hon anyin tavat ae hwege, ke adre me he ka hlohlo.

³⁷ E hu hele vat hon haledra je hors, ke hon anyidra je kariota, ke hon tavat hia ae ve bongon hnyi wanben, kʼ adre me he ka helâ me omomo: e hu hele vat hon tangen tang omjeû, ke adre me he ka hûgûnâ.

³⁸ E hu bongon ihmeiny hon köien je köihnam, kʼ ame he ka hwahwacit: anyin a e hnyeiny ta je hnatheat, kʼ adre me ti hobâ je idola.

³⁹ Anyin a wale ame he je menoiny hnyot me je luko ka tha labā e, kʼ ame he ta je iaena ka laba eling: ke ca hnâu hmetu bi hnyaba nyiele balua; ke adre me ca he ka labā hnyi ke dö me ke dö.

⁴⁰ Helâji me hnen Khong hna ohia Sodoma me Gomora me je taun ae hakekenyâ, haingö Iehova; helâe minya ame ca he hmetu ke at ka laba eling, ke ame ca he ke nokon at ka me labā e.

⁴¹ Wâ bi, ame o but tavat ûhedra hnyi hwadrö; ke hnyei ae gan, me je than ae se hia ame he ka bwebwet ûnyi hnyi je can hmeledrany.

⁴² Adre me hok cafana me ö; ödra tavat beovecâ, ke ca tren ibetengiö; ame mea ifucidra helâ me köiö, ke adre me tabö hors; adre me ve tot metâ, helâ me ûtilen at hnyi vat, he ka vat möu hlu nokon Babulona.

⁴³ A löng ut than Babulona ge ûlungidra, me ame sënyin li hnyamen; ame khaû ju e hnen hlöuhlöu, me vec helâ me momo ame vec hnyekon.

⁴⁴ Wâ bi, e ame he ka ölö helâ me liona ûnyi hnyi hmanenanginy Joridano ka taun ae hwege: ke oge me he ka ie okeci ödra gan; ke oge me he ka otilâ hon, at adre ûca: anyin a ie at ae ûcû mönyaî ke ie at ame he ka thu ûen könya? ke ie at tuö mamoe ame he ka tot hnyi hnyimakök?

⁴⁵ Anyin a wale löng ju öbun hna ûnykûme hnö Iehova, waleji e ame ûnykûme ge Babulona; me hnen je hna ûnykûme he ka ânyâ waleji e ame ip hmâ he ka ânyâ ka hnyei Kaledaia, ka habe, E hnathu adre me he ka lili ödra, wale tavat ae ûhnyûkong hnyi hna hat meno; e hnathu e ame he ka öba wan hnyabadra mödra.

⁴⁶ Hnyi hwan hna kot Babulona ame öbubuny hme ledrany, ke adre me löng ûtengien hnyi ta je hnyei.