Jeremia 5 - Iaai Bible 1901 (New Caledonia)

¹ WADRINGÂ thö je gethen hnyi Jerusalema, me wâ walang ang, me khana, me elâm hnyi je dok ae nedrong, ame ne he ka wâ at, ame ne hu at ame ânyâ wisa me elâm hnathu; me oge me he ka hna anyin hulo.

² Ke adre me ne he ka ha, ka habe, Kia inya Iehova; e hnathu, adre me khemanyin thoi.

³ Iehova lö, hawa, ame ca wâ ûnyi ae hnathu hnen li emâkâm? u je kuc ödra ke adre me ca vec bi; u je öaûʼ ödra, kʼ ödra höcö bi he ka kap hna nâ: adre hia but onâkâ je hnyimakodra hon veto; ödra höcö bi he ka hmetu.

⁴ Me oge me ha, ka habe, Ame ne ta je theduoc ang: adre me hwen monu; anyin ae ca khanʼ ödra bi gethen de Iehova, me hna owisa hnen Khongudrin:

⁵ oge me he ka he ka tavat ae ûnyi hnathu, me fuc kodra; anyin ae khanʼ ödra gethen de Iehova, me hna owisa hnen Khongudrin. Ke haba tavat ang adre hia but tha thamuâ hnaûhûkâlâköuâ, me thu je wen.

⁶ Anyin a wale ame he liona ûnyi hnyi hnyot ka hlingʼ ödra, ame he lukoiny sahac ka sei ödra, ame he lepad ka tuö anyidra je taun, ame he ka oloû usukiʼ ödra tavat adre me didrut ûnyi hnyi hnyin: anyin a ödra ibi ose ûkhin fuc, ke ödra ose hia kolu.

⁷ Oge me he ka kâmâu he ka hnö u? haba je lakom adre hia but hna degeci nya, adre me khemanyin ge tavat a ca je khong bi: hnyi ûen oge me ha öʼdra sekuni ödra, adre me bi ûnyi monu, me ûkhacaköuâ je deö at hnyi je uma umen momo hnyi gethen.

⁸ Haba hnyi je hnyomakatu ödra ûcû me je hors adre me han so: adre me ve kuku ka ta je laâiân ke at.

⁹ Hawa, oge me ca he ka bi hwaban can ta je ûnyi e? haingö Iehova: ke ame ca he hanuk ka bi hwaban ka hnyi hnyei a helâe?

¹⁰ Öliâ thö je hna up haginy, me hlingâ; ke ca he bi ka ohia hia: hom but je anginy, anyin a ca je ûnyi e anyi Iehova.

¹¹ Anyin a hia but lap anyi Isaraela, me lap anyi Juda ânyâ hwakecin ae iyawo könya, haingö Iehova.

¹² Adre hia but ivino Iehova, me ha, ka habe, Ca e bi; ke ame ca he ka o köta ûnyi ae kong; ke ate me ca he ka wâ hele vat me hmiâ:

¹³ ke ame he bi je perofeta ka helâ me ang, ke ca eû bi hnyidrin hofuc hwan Khong: adre me he ka ânyâ helâe kodra bi.

¹⁴ Anyin a wale walang hna ha hnö Iehova Khongon sabaoth, ka habe, Anyin a öbun e ha hofuc e, wâ bi, oge me he ka wia hok hofuc hnyi hnyimâm me me meic bi, ke hnyei ang, me me utö, ke e ame he ka ön ödra.

¹⁵ Wâ bi, oge me he ka hom tavat ûnyi hnyi dok ae sâkâû köbun, lap anyi Isaraela, haingö Iehova: hnyei ae hwege, hnyei kâû adrem, hnyei ae ca khanö u hwan idra, ke u me ca wâhmakhmetoâ bi ifucidra.

¹⁶ Helâ me erkemok adre khong tangen anyidra je fana, ödra tavat hwege hia.

¹⁷ Ke adre me he ka an hnâm hna meno, me âm jeû, wale ae ûcû he ka han hnen lakom obaga me wahlu: adre me he ka an halem je mamoe, me kau; adre me he ka an halem je vine, me halem je meta: adre me he ka kot ge hele vat ânyâm je taun adre up haginy, waleji u je labageju kâu.

¹⁸ Ke so bi haba hnyi je bong eling, oge me ca he ka hlingʼ öbun hia, haingö Iehova.

¹⁹ Ke öbun e he ka ha, ka habe, Anyin a ieû Iehova Khonguta ame ânyâ köta ta je ûnyi hia eling? u me he ka thu kodra, ka habe, Anyin a öbun e digic nya me bi athnyaba: ka je khong kanyua hnyi ibun hnyei, awe helâe öbun e he ka bi athnyaba ka je atkanyua hnyi hnyei a ca ibun bi.

²⁰ Ha thö e ka lap anyi Jekob, me haimemenâ hnyi Juda me ha, ka habe,

²¹ Long ju hofuc walang ang tavat ae monu me ba hnyekudra: tavat ae hu li ecmak, kʼ adre me ca wâ bi; e hu li hnyiköny kʼ adre me ca long bi:

²² Hawa, öbun e ca outö nya? haingö Iehova: ke öbun e ca be ka öbubuny gak, at ame ip öny hnân hnyigöulen köiö, hoton hnanyibu ae tethmâ, mʼ adre me ca he bi ka hanyâûâ e.

²³ Ke haba tavat ang e hu gadra hnyok ae ûjöng, me ûkhin fuc; adre me thu musi me he but.

²⁴ Ke adre me ca ha eû hnyi je hnyekudra, ka habe, Ate me he walang ang ka outö Iehova Khonguta, at ame ham we, wale a bân, me beliny hnyi ûen e; at ame tuö hobi köta je wikiny menu adre thu.

²⁵ Hnen hwakecibun ae kong hna ohavâ bi ta je ûnyi eling ke hnen anyibun je hulo hna thelöng so.

²⁶ Anyin adre wâ tavat ae kong unyin lakeik: adre me tuö, helâ me ûyâûiny at ame töu hnewe: adre me hwa ofific me me hnok at.

²⁷ E unöngötö umödra je uma ge thoi, helâ me tangen ame unöngöt ge je meno ame gâ: anyin a wale ödra gan hmâ me tren omjeû.

²⁸ Ödra pipikhenya me habubut; eke, adre me beönua hnyi hulö: adre me ca ivinö, wale ivino hobi kâu at a mokcu kamen, mʼ adre me he ka sot; ke adre me ca owisa ge wisainy at ae theduoc.

²⁹ Hawa, oge me ca he ka bi hwaban can ta je ûnyi e? haingö Iehova: ke ame ca he bi hanuk ka bi hwaban ka hnyei a helâe?

³⁰ Adre hia but ânyâ hnyi hnyei ûnyi hnân lâiâ ke ikiki:

³¹ je perofeta adre me profeta thoi, ke haba tavat bihut me adre me musi ûnyi gadra bi; ke adre me weny helâe hnen lakeik: ke ieû öbun e he ka ânyâ hnyi obiny e?