Jeremia 44 - Iaai Bible 1901 (New Caledonia)

¹ WALANG hofuc ame o kö Jeremia ge at Juda hia, tavat adre me laba hnyi hnyei Aigupito, tavat adre me laba hnyi Migedola, me Tapanesi, me Nofi, me hnyei Patherusi ame ha, ka habe,

² Walang hna ha hnö Iehova tuhan sabaoth, Khongu Isaraela, ka habe, öbun e wâ but ta je okongon hia waleji oge oâ ka Jerusalema, me je tauniny Juda hia; ke wâ bi, e hnyot ut hnyi bong ang, ke ba but at ame labā;

³ can anyidra ta je hulo waleji adre me ânyâ me adre me ohmönyini nya, hnyi hnödra hna he ka leû utö ae bo so, me bi athnyaba ka ke je khong bi, waleji ae ca khanʼ ödra; ödra, möbun, me lakamöbun.

⁴ Ke so bi, oge me kunâ köbun je athnyabaik hia je perofeta, me vesâkong, me ûkhûnöng, me ha, ka habe, Öbun a ca ânyâ ûnyi ang ae ikiki wale a hmiök.

⁵ Ke adre me ca long bi, ke adre me ca tevehlöng bi he ka hmetu ju ûnyi hnyi anyidra ta je hulo, mʼ adre me ca he ka leû utö ae bo so ka ke je khong.

⁶ Anyin a wale oge me hingâlâ anyik wathethot me anyik hmonyin, ke ame ubâhlâ hnyi je tauniny Juda, me je gethen hnyi Jerusalema, ke ame ba wan gadra, ke hnyot dö helâ me hnyi bong ang.

⁷ Anyin a wale, walang hna ha hnö; Iehova, Khongon sabaoth, Khongu Isaraela, ka habe, Anyin a ieû öbun e ânyâ hulo ae gan hmâ eang me hnân jönibun bi, he ka subâ degeci öbun bi obaga me omomo, me je mendreng, me wanakat ame i, ûnyi hnyi wanben Juda, me me ba but kolon gabun;

⁸ me ame ohmönyini nya hnen ta je huliwa anyin li hnyamöbun, öbun e leû utö ae bo so ka ke je khong bi hnyi hnyei Aigupito, wale öbun e he ka hnyin he ka me labā; me adre me he ka subâ degeci öbun, me öbun e he ka hnân hangâ me haikongoâ unyin ta je hnyei hia thithö eang hmeledrany?

⁹ Hawa, öbun e hnying ut je hwakecin ae kong anyin lakamöbun, me hwakecin ae kong anyin je tuhan Juda, me hwakecin ae kong anyin je laöiödra, me hwakecibun ae kong, me hwakecin ae kong anyin je laöiöbun, waleji adre ânyâ hnyi hnyei Juda, me je getheniny Jerusalema?

¹⁰ Adre me ca vec ke ne o but hnyi bong ang, ke adre ca hia but ot, ke adre me ca vheno anyik hnanyibu, me hnok je hna hûna, waleji oge ip hnyi hnyimaköbun me lakamöbun.

¹¹ Anyin a wale walang hna ha hnö Iehova tuhan sabaoth, Khongu Isaraela, ka habe, Wâ bi, inya oge me he ka wâ hmʼ öbun me öbun e kong ut, me, subâ degecâ at Juda hia thithö.

¹² Ke oge me he ka hom je kolon at Juda, tavat adre me ohwegiâ je hnyimakodra he ka he Aigupito ai he ka me laba eling, ke adre me he ka oaûʼ ödra hia hnyi hnyei Aigupito, adre me he ka ta ge hele vat, me hmiâ, adre me he ka mok hwân ge tavat ae ûhnyûkong ke ne o but ge tavat ae gan, ge hele vat, me hmiâ; ke adre me he ka hnân oû, me kuko, me hangâ, me haikongo.

¹³ Anyin oge me he ka bi hwaban ka tavat adre laba hnyi Aigupito, helâji me hnok hna bi hwaban ka Jerusalema ge hele vat, me hmiâ, me mok ae cap:

¹⁴ me me! ca he ka kec mot ke at, a kolon at Juda adre me he Aigupito ai he ka labā, me hmetu ka hnyi hnyei Juda wale adre me weny he ka hmetu ka hnyin me laba: anyin adre me ca he bi ka hmetu, ke so thibi hnyat adre me kec mot.

¹⁵ Me ame thu kö Jeremia hnen ta je baga hia tavat ae khanʼ ödra a haba laöiödra adre me leû utö ae bo so ka ke je khong, me je momo hia adre me ûtitilen, a ûkhacaköu ae gan hmâ, me tavat hia adre me laba hnyi Aigupito, hnyi Patherusi me ha, ka habe,

¹⁶ Haba hofuc u je hia but ha kohmun hnyi iö Iehova, ohmun e ca he ka löng köu.

¹⁷ Ke e hnathu ohmun e he bi ka ânyâ ta je ûnyi hia ame o but hnyi je hnyimöhmun, he ka leû utö ae bo so ka momo thaniny drany, me hingâlâ je hudiny ic kâu, helâji me hnöhmun hna ânyâ, ohmun me je latuhöhmun me anyihmun je taben, hnyi je tauniny Juda, me je getheniny Jerusalema: anyin a hnyi ûen eling e gan hmâ ö ʼhmun, ke ohmun so, ke ba kong ohmun e wâ.

¹⁸ Ke hwân hnyi ûen ohmun e ca leû utö ae bo so ka momo thaniny drany, ke hingâlâ je hudiny ic kâu, me hia gahmun ta je ûnyi hia, ke adre oaû ohmun ge hele vat me hmiâ.

¹⁹ Ke hnyi ûen ohmun e leû utö ae bo so ka momo thaniny drany, me hingâlâ je hudiny ic kâu, hawa, ame hia but unyihmun je laöiöhmun, a je baga, waleji hnyi hnöhmun hna op je ong areto hobi kâu he ka khudrung kâu, me hingâlâ je hudiny ic kâu?

²⁰ Me haba Jeremia ame ha ka tavat hia, ka obaga me omomo, me tavat hia tavat adre me hia but thu kâu eling, ka habe,

²¹ Haba utö ae bo so öbun e le hnyi je tauniny Juda me je getheniny Jerusalema, öbun me lakamöbun, me latuhöbun, me anyibun je taben, me tavat aten hnyei, hawa, ame ca ûnykûme e Iehova, me ip hnyi hnyekon?

²² me me ca khanö Iehova hmetu bi he ka hokhnyokâ ûkongon anyibun ta je huliwa me ta je ûnyi ae ikiki öbun e ânyâ; anyin a wale a hnyot dö ibun hnyei, ke hnân lâiâ, me hnân hangâ, ke ba but at ame labā, helâ me hnyi bong ang.

²³ Can öbun e hia but leû utö ae bo so, me can öbun e hia but ânyâ hulo kö Iehova, me ca löng bi ifuci Iehova, me ca vheno anyin hnanyibu, me hnen je hna hûna, me hnen je hna ohnatho; anyin a wale ame o köbun okongon, helâ me hnyi bong ang.

²⁴ Ke haba Jeremia ame ha ka tavat hia me omomo hia, ka habe, Löng ju hofuc ho Iehova, öbun at Juda a öbun hnyi hnyei Aigupito.

²⁵ Walang hna ha hnö Iehova tuhan sabaoth, Khongu Isaraela, ka habe. Öbun e hia but me laöiöbun ha ge hnyimöbun, me ohwâdâ ge je hnyamöbnn, ka habe, Ohmun e he ka ohwâdâ anyihmun je khöbi waleji ohmun e bi khöbi, he ka leû utö ae bo so ka momo thaniny drany, me hingâlâ je hudiny ic kâu; awe, he thʼ öbun he ka ohwegiâ anyibun je khöbi, me ohwâdâ anyibun je khöbi.

²⁶ Anyin a wale, long ju öbun hofuc ho Iehova, at Juda hia tavat öbun e laba hnyi Aigupito, ka habe, Wâ bi inya oge hia but khemanyin hnyi iök ae gan hmâ, haingö Iehova, a gʼ ame ca he hmetu ka ha iök hnen hnyimen at Juda hnyi hnyei Aigupito hia, ka habe, Kia inya Than Iehova.

²⁷ Wâ bi, oge me hmakʼ ödra mʼ adre me kong, me ca so bi: ke adre me he ka aû but hia at Juda a ödra hnyi hnyei Aigupito ge hele vat me hmiâ, ke ne o but ame ba but.

²⁸ Ke haba tavat adre me kec mot ge hele vat, me adre me he ka hmetu ûnyi hnyi hnyei Aigupito ka hnyi hnyei Juda, a ödra wakhalet thiju; ke ame he ka khana je köluiny at Juda hia tavat adre me be ka hnyi hnyei Aigupito he ka më labā, a ho ia hofuc ame he ka ton, ame ne hok, ame ne hodra.

²⁹ Ke haingö Iehova, ka habe, Walang haten köbun a; oge me he ka bi hwaban köbun hnyi dok ang, me me khanʼ öbun a gʼ ame he ka ton hok hofuc köbun hnân okongon:

³⁰ walang hna ha hnö Iehova, ka habe, Wâ bi, oge me he ka hnö Farao Hofera than Aigupito ka hnyi hnyamen ta je iwahnaihmiony më, me ka hnyi hnyamen tavat adre me elâm he ka hlingâ e; helâ me hnok hna hnö Zedekia than Juda ka hnyi hnyamö Nebukaneza than Babulona, a iwahnaihmiony më, ke at ame elâm he ka hlingâ e.