Jeremia 43 - Iaai Bible 1901 (New Caledonia)

¹ KE a um dö Jeremia ha ka tavat hia thithö ta je hofuc ho Iehova Khongudrin, waleji a kunâ më kodra Iehova Khongudrin, wale ta je hofuc hia eling,

² me haba Azaria nöku Hosaia, me Johanana nöku Karea, me tavat bi gan hia, ödrin e ha kö Jeremia, ka habe, U me ha thoi: a ca kunö u Iehova Khonguta he ka ha, ka habe, Ca he öbun Aigupito ai he ka më laba eling:

³ anyin a haba Baruka nöku Neria, ame kunö u gahmun, he ka hnʼ ohmun ka hnyi hnyamen at Kaledaia, mʼ adre me he ka hlingʼ ohmun me hum ohmun a je bâ Babulona ai.

⁴ Me haba Johanana nöku Karea me je taben vat hia, me tavat hia, adre me ca long hofuc ho Iehova he ka laba bala bi hnyi hnyei Juda.

⁵ Ke haba Johanana nöku Karea, me je taben vat hia, adre me hom je kolon at Juda hia tavat adre me hmetu ûhedra hnyi je hnyei waleji adre obʼ ödra ka hnyin, mʼ adre me laba hnyi hnyei Juda;

⁶ wale obaga, me omomo, me ta je wanakat, me je hlu lakon than, me tavat hia waleji hnö Nebuzaradana taben tavat tue hna ip unyi Gedalia nöku Ahikama, nöku Safana, me Jeremia perofeta, me Baruka nöku Neria;

⁷ ke adre me o ka hnyi hnyei Aigupito; anyin adre me ca long bi hofuc ho Iehova: ke adre me o but hnyi Tapanesi.

⁸ Me ame o but hofuc ho Iehova kö Jeremia hnyi Tapanesi ame ha, ka habe,

⁹ Hom dö je veto ae gan ge hnyamâm, me konâm hnyi dröu adre dâ, hnyi veto kânâ ae hnyi hwanumen uma umö Farao hnyi Tapanesi, hnyi hnyimakan at Juda:

¹⁰ ke ha thö kodra, ka habe, Walang hna ha hnö Iehova tuhan sabaoth Khongu Isaraela, ka habe, Wâ bi, oge me he ka hum Nebukaneza than Babulona athnyabaik, ke oge me he ka otilâ anyin theron hon je veto e waleji oge konâm; ke e ame he ka ulolo anyin imanoiny than hon e.

¹¹ Ke e ame he ka o me kot hnyei Aigupito; ke haba at hobi kâu mok, me ame ka he bi ka mok, ke haba at hobi kâu bâ, me ame ka he bi ka bâ, ke haba at hobi kâu hele vat, me ame ka he bi ka hnyi hele vat.

¹² Ke oge me he ka hû meic hnyi je uma ûmen je Khongon Aigupito, ke e ame he ka thong degecâ me hum ödrin a je bâ: ke e ame he ka omecâ e bi ge hnyei Aigupito helâ me at tuö mamoe ame khavâ anyin je ûkhaû; ke e ame he ka he ûheny e me hnahic.

¹³ Ke ame he ka thö minya je veto ame tot hnyi Bethe-semes, a e hnyi hnyei Aigupito, ke e ame he ka thong degecâ je uma umen je khongon Aigupito ge meic.