Jeremia 42 - Iaai Bible 1901 (New Caledonia)

¹ KE haba je taben vat hia me Johanana nöku Karea, me Jezania nöku Hosaia, me tavat hia, hwân ge tavat ae ûhnyûkong ke ne o but ka tavat ae gan adre me hakekenyâ,

² me ha kö Jeremia perofeta, ka habe, Ö u kap ju hnöhmun hna khöû köu, ke u me he ka hic hobi kohmun kö Iehova a Khongom, ohmun je kolon ang; anyin a je wan biju ohmun ae wakhalet thibi, ke se hia ehac, ohmun manen köu:

³ me me he Iehova a Khongom ka omanenâ kohmun gethen ohmun e he ka vheno, me ûnyi ohmun e he ka ânyâ.

⁴ Ke Jeremia perofeta ame ha ködra, ka habe, Oge hia but ling öbun; wâ bi, oge me he ka hic kö Iehova Khongubun, hoton hnobun hna ha; ke haba ta je ûnyi hia ame he Iehova ka thu köbun, oge me he ka omanenâ köbun; oge me ca he ka ikhâlâ gabun ke ûnyi.

⁵ Ke ödrin e ha kö Jeremia, ka habe, Iehova at ame ohnathu öta me owisa kohmun, ohmun ka ca ânyâ bi hoton hofuc ame he Iehova a Khongom ka kunö u më kohmun.

⁶ A ne so, A ne kong, ohmun e he ka löng hoton ifuci Iehova Khonguta, wale ohmun e kunö u kâu; me ohmun e so ohmun ka löng hoton ifuci Iehova Khonguta.

⁷ Ke hwaban je bong a ten ame o but hofuc ho Iehova kö Jeremia.

⁸ Me e ame hao Johanana nöku Karea, me je taben vat hia unyin, me tavat hia hwân ge tavat ae ûhnyûkong ke ne o but ka tavat ae gan,

⁹ me ha kodra, ka habe, Walang hna ha hnö Iehova, Khongu Isaraela, waleji öbun e kunö nya kâu, he ka ip hnobun hna khöû hnyi hnyimakan, ka habe,

¹⁰ Öbunʼ e ne he ka laba bala bi hnyi hnyei ang, oge me he ka up öbun goranyai, me ca hagutʼ öbun, ke oge me he ka konim öbun, me ca oc degeci öbun: anyin oge me ietra ge ûnyi ae kong oge hia but ânyâ köbun.

¹¹ Ca he öbun ka outen than Babulona, wale at öbun e outen; haingö Iehova, ca he ka outen e, anyin a tha inya but möbun he ka omeli öbun, me hûgûnʼ öbun ûnyi hnyi hnyamen.

¹² Ke oge me be ka betenge gabun, me ohmetu öbun ka hnyi ibun hnyei.

¹³ Ke öbun e ne ha, ka habe, Ohmun e ca he ka laba hnyi hnyei ang, me ca löng hofuc ho Iehova Khongubun;

¹⁴ me ha, ka habe, Ohe, ohmun e he ka he ka hnyi hnyei Aigupito, me ohmun e ca he ka löng vat eling, me löng ifucin trutru, ke ame ca he bi ka hmiâ jeû; ke ohmun e he ka laba eling:

¹⁵ anyin a wale, löng ju walang ang hofuc ho Iehova öbun je kolon hnyi Juda: walang hna ha hnö Iehova tuhan sabaoth, Khongu Isaraela, ka habe, Öbun e ne ohwegiâ je hnyimaköbun be ka he Aigupito ai, me he me laba atkanyua eling;

¹⁶ awe, ame he ka khöû öbun eling hnyi hnyei Aigupito hele vat, wale öbun e outen, ke ame he hmiâ ka hnu öbun ka hnyi hnyei Aigupito, wale öbun e outen; ke öbun e he ka mok eling.

¹⁷ Ame he ka helâe ka tavat hia adre me ohwegiâ ta je hnyimakodra he ka he Aigupito ai me laba kanyua eling: adre me be ka mok ge hele vat, me hmiâ, me mok ae cap: ke ba at gadra ame he ka hnen biju me kec ge okongon wale oge me he ka oâ ködra.

¹⁸ Anyin a walang hna ha hnö Iehova tuhan sabaoth, Khongu Isaraela, ka habe, Oge hia but hingâlâ anyik hmonyin me anyik wathethot hon tavat adre me laba hnyi Jerusalema, helâe oge me he ka hingâlâ anyik wathethot hubun, öbun ka he ka he Aigupito ai; ke öbun e he ka hnân oû, me kuko, me hângâ, me haikongo; ke öbun e ca he hmetu ka wâ hnyei ang.

¹⁹ A hia but Iehova ha gabun, je kolon hnyi Juda, ka habe, Ca he öbun Aigupito ai: wâhmakhmeto ju a oge me ha hwegiâ köbun hnyi bong ang.

²⁰ Anyin öbun e hia but iyâwʼ öbun bi; anyin a öbun e kunö nya kö Iehova Khongubun me ha, ka habe, Hic dö hobi kohmun kö Iehova Khonguta; ke ohmun e be ka ânyâ hia hoton hofuc ame he Iehova Khonguta ka ha köu:

²¹ ke oge hia but thumetu öbun hnyi bong ang; ke öbun e ca löng ifuci Iehova Khongubun, me ke hofuc waleji e ame kunö nya më köbun.

²² Ke walang ang wâhmakhmeto thʼ öbun a öbun e he ka mok ge hele vat, me hmiâ, me mok ae cap, hnyi dok waleji öbun e weny he ka he kâu me laba atkanyua hnyin.