Jeremia 40 - Iaai Bible 1901 (New Caledonia)

¹ WALANG hofuc ame o kö Jeremia ûnyi ga Iehova, hwaban hna thang e hnyi Rama ga Nebuzaradana taben tavat tue, waleji hnyi hna hom e adre ca ge tö fao tha e me je bâ hia ûheny Jerusalema me Juda, tavat adre hom Babulona ai.

² Haba taben tavat tue, ame hum Jeremia me ha kâu, ka habe, Haba Iehova a Khongom ame ha ûkongon ang ka hnyi dok ang;

³ ke a hia but Iehova oâ, me ânyâ helâji me hnen hna ha; anyin a öbun e hia but ânyâ hulo kö Iehova, me ca löng hoton; ifucin, anyin a wale ame o but köbun ûnyi eling.

⁴ Ke walang ang, wâ bi, oge me i thang je tö fao hnyi bong ang ae hon li hnyamâm, A ne so köu he ka tha he mönya Babulona ai, aiö u, ke oge me he ka ō u, ke a ne kong köu he ka tha he mönya Babulona ai, degecu, wâ bi, wale hnyei hia hnyi hnyimâkâm; haba dok ae so me ûcû köu he ka he ka hnyin, he thö ka hnyin.

⁵ Ke e ka tiga ca hmetu, haingen, ka habe, Hmetu ju kö Gedalia nöku Ahikama, nöku Safana, waleji hnen than Babulona hna otilâ hon je taun Juda, me tha laba më unyin tavat: ke ame ne ûcû u he ka he ka hnyi ke dok, be thö ka hnyin. Me haba taben tavat tue ame ha kamejin me bwihlany, me kunâ e.

⁶ Me haba Jeremia ame he kö Gedalia nöku Ahikama hnyi Mizepa, me tha laba më unyin je kolon hnyi hnyei.

⁷ Ke hnyi ûen ae khana but je taben vat hia hnyi hnyei, ödra me anyidra, tavat, a than Babulona ame otilö Gedalia nöku Ahikama hnân gavena hon hnyei, me hna but kâu obaga me omomo, me ta je wanakat, me ta je theduoc hnyi hnyei unyin tavat adre ca hom bâ Babulona ai;

⁸ me adre me o kö Gedalia hnyi Mizepa, jia Isamaela nöku Nethania, me Johanana me Jonathana li laku Karea, me Seraia nöku Tanumeth, me je laku Efai at Netofa, me Jezania nokon ke at Maaka, ödra me je atödra.

⁹ Ke haba Gedalia nöku Ahikama, nöku Safana ame khemanyin kodra, me je atödra me ha, ka habe, Ca ot öbun he ka bi athnyaba ka at Kaledaia: laba ju hnyi hnyei me bi athnyabainy than Babulona, me ame he ka hu so gabun.

¹⁰ Ke haba inya, wâ bi, oge me he ka laba hnyi Mizepa, he ka tot hnyi hnyimakan at Kaledaia tavat adre me he ka o köta: ke haba öbun, ûkhöûnâ thö waina me wan ae metu, me wakaco, ke hitangen ju hnyi tangöbun je tang, ke labā ju je taun öbun e hom.

¹¹ Ke hnyi ûen ame long ut at Juda hia hnyi Moaba, me unyin je laku Amona, me hnyi Edoma, me hnyi je hnyei hia a than Babulona ame ip biju je kolon at Juda, ke e ame hia but otilö Gedalia nöku Ahikama, nöku Safana hudrin,

¹² me ame hmetu at Juda hia ûnyi hnyi ta je dok waleji adre obʼ ödra ka hnyin, me o ka hnyi hnyei Juda, kö Gedalia hnyi Mizepa, me ûkhöûnâ waina, me je wan ae metu ae se hia hmonyin.

¹³ Ke haba Johanana nöku Karea, me ta je taben vat hia ae hnyi hnyei, adre me o kö Gedalia hnyi Mizepa,

¹⁴ me adre me ha kâu, ka habe, E khanö u a haba Baalisa thaniny je laku Amona ame kunö Isamaela nöku Nethania he ka hlingö u? Ke haba Gedalia nöku Ahikama ame ca kap hnödra hna ha.

¹⁵ Me haba Johanana nöku Karea ame ha duöngâ kö Gedalia hnyi Mizepa, ka habe, Ö u më hnö nya but, me oge me he ka hlingö Isamaela nöku Nethania, ke ba at ame he ka wâ: can ieû e ame he ka hlingö u? ke ame he ka vese but at Juda tavat adre me ûkhacaköu köu, me ame he ka hia je kolon at Juda?

¹⁶ Ke haba Gedalia nöku Ahikama ame ha kö Johanana nöku Karea, ka habe, U ma ca he ka ânyâ ûnyi e: anyin a u me thoi hnyi hnâm hna ha ga Isamaela.