Jeremia 38 - Iaai Bible 1901 (New Caledonia)

¹ KE haba Sefata nöku Matana, me Gedalia, nöku Pasur, me Jukala nöku Selemia, me Pasur, nöku Malekia, ödrin e tha long je hofuc waleji ame ha Jeremia ka tavat hia, ka habe,

² Walang hna ha hnö Iehova, ka habe. Haba at ama laba bala bi hnyi taun ang, ame he ka mok ge hele vet, me hmiâ, me mok ae cap: ke haba at ame he ka he ka at Kaledaia, e ame he ka mot biju, ke ame he bi ka jekhon anyin mot, ke e ame he bi ka mot.

³ Walang hna lia hnö Iehova, ka habe, E hnathu adre me he ka hna utbavat anyin than Babulona, ke e ame he ka hûgûnâ e.

⁴ Me ame ha je taben ka than, ka habe, E so adre me hlingâ but at ang; anyin a helâe e ame osenyinâ je hnyamen tavat vat a ta je kolon hnyi taun ang me tavat hia, hnyi hnen hna ha je hofuc helâe: anyin a haba at ang, e ame ca elâm he ka osoâ bi tavat ang, ke e ame okongoâ bi.

⁵ Ke haingö Zedekia than, ka habe, Wâ bi, e but e hnyi je hnyamöbun: anyin ae ca khana bi than he ka ve e möbun.

⁶ Me adre me hum Jeremia me khûâ ka hnyi hmonop anyi Malekia nokon than, ae hnyi hnyeuleny uma ceat: ke adre me hnöhnö Jeremia but ge je tö. Ke ba but köiö hnyi hmonop ke hmudra thiju, ke ame cilok ut Jeremia hnyi hmudra.

⁷ Ke e ka khanö Ebede-melek ut, a eunuka at Aithiop, ae hnyi hnyaban than, a gʼ adre me ip Jeremia hnyi hmonop; ke haba than ame laba hnyi homagouleny Beniamina;

⁸ Me haba Ebede-melek, ame he ûnyi hnyi uma umen than me ha ka than, ka habe,

⁹ Than a tuhok lö, e kong hia hwakecin tavat e waleji adre ânyâ kö Jeremia perofeta, wale adre khûâ ka hnyi hmonop; anyin a e ame he ka mok, la, eling ge mekihnânem: anyin ae ba hmetu bi areto hnyi taun.

¹⁰ Me haba than ame hûna kö Ebede-melek at Aithiop me ha, ka habe, Hom dö tavat a thote ûhedra ang, me öû Jeremia perofeta ûheny û hnyi hmonop, e me tiga ca mok.

¹¹ Me haba Ebedemelek ame hom tavat ka tha he më, me he ka hnyi uma umen than hnyi hmelen hna hip omjeû, me hom ûheny e je ecmano ae khekhe, me je ûkhaû ae bobot ut, me khûâ kö Jeremia eû hnyi hmonop ge je tö.

¹² Haba Ebede-melek at Aithiop ame ha kö Jeremia, ka habe, më ip ju ec mano ae khekhe me bobot ut hmelen li hnyabenyâm hnyi tö. Haba Jeremia ame ânyâ helâe.

¹³ Me adre me oû Jeremia ge je to, me hom e ûheny hnyi hmonop; ke Jeremia ame laba hnyi hnyeuleny uma ceat.

¹⁴ Me haba Zedekia than ame ûkhûnöng he ka hao Jeremia perofeta kâu, ka hnyi hwanuma a kuniny hnyi uma umö Iehova: ke haingen than kö Jeremia, ka habe, Oge me he ka hnei u ge ke hofuc; ca he ka ikhâlâ gak.

¹⁵ Ke haingö Jeremia kö Zedekia, ka habe, Oge ne thumetu u, hawa, u me ca he ka hlingö nya? ke oge ne he ka ha bongon köu, u me ca he ka ling nya.

¹⁶ Me Zedekia than ame khemanyin duöng kö Jeremia me ha, ka habe, Kia inya Iehova, at a up otu a oge me ca he ka hlingö u, me hnö u ka hnyi hnyamen tavat ang adre me elâm he ka hlingö u.

¹⁷ Ke haba Jeremia ame ha kö Zedekia, ka habe, Walang hna ha hnö Iehova Khongon sabaoth, Khongu Isaraela, ka habe, U je ne he ka je taben anyin than Babulona, u me he ka mot, ke adre me ca he ka thong taun ang ge meic; ke u me he ka mot me ânyâm lap;

¹⁸ ke u je ne ca he ka je taben anyin than Babulona, me adre me he ka hna taun ang ka hnyi hnyamen at Kaledaia, ke adre me he ka thong ge meic, ke u me ca he ka kec gadra.

¹⁹ Me Zedekia ame ha kö Jeremia, ka habe, Iny outen at Juda tavat adre hia but utut ka at Kaledaia, wâ adre nye he ka hnö nya ka hnyi je hnya-mödra mʼ adre me he ka hlumö nya.

²⁰ Ke haingö Jeremia, ka habe, Adre me ca he ka hnö u. Ö u löng ju walang ang hofuc ho Iehova, wale oge me ha köu, me me he ka hu so gam, ke u me he minya, ka mot.

²¹ Ke u je ne höcö he, walang hofuc ame omanenâ könya Iehova, ka habe,

²² Wâ bi, adre me he ka hom omomo hia a je kolon hnyi uma umen than Juda ka je taben anyin than Babulona, ke ame he je momo eling ka ha, ka habe, Haba je lawaem adre me iyawo u, ke ame tudra but: a didrut li cam hnyi hmudra, me adre me hmetu but.

²³ Ke adre me he ka hom je lââiâm me je lakom ka at Kaledaia: ke u me ca he ka kec gadra, anyin ame he ka kot u hnen than Babulona: ke u me he ka thong taun ang ge meic.

²⁴ Me haba Zedekia ame ha kö Jeremia, ka habe, Ca he ke at ka khana je hofuc ang, me u me ca he ka mok.

²⁵ Ke ame ne löng je taben a oge hia but ûhnenamö möu, me adre me he ka o köu me ha köu, ka habe, Më thumetu ohmun dö walang ang waleji ge hnâm hna ha ka than; ca ikhâlâ gahmun, ke ohmun e ca he ka hlingö u:

²⁶ awe, u me he ka ha ködra, ka habe, Oge me khöû ka than me me ca he ka ohmetu nya ka hnyi uma umö Jonathana, wâ oge nye mokcu eling.

²⁷ Me ame o but kö Jeremia je taben hia me hnö e: me e ame thumetu ödra helâ me je hofuc hia waleji a hûna than. Me adre me laba hnyibû but; anyin adre ca löng hna ûhnenamö.

²⁸ Ke haba Jeremia ame laba hnyi hnyeuleny uma ceat, ke ne o but hnyi bong adre me kot Jerusalema.