Jeremia 37 - Iaai Bible 1901 (New Caledonia)

¹ KE ame musi bi ju Zedekia than nöku Josea bwabö Konia nöku Jehoiakima, waleji hnö Nebukaneza than Babulona hna otilâ hnyi hnyei Juda.

² Ke e ame ca long bi, me lathnyabainy, me tavat aten hnyei, ta je hofuc ho Iehova, waleji e ame ha a deny Jeremia perofeta.

³ Haba Zedekia than ame kunö Jukala nöku Selemia, me Zefania, nöku Maseia at bihut, kö Jeremia perofeta me ha, ka habe, Ö u hic dö hobi kohmun kö Iehova Khonguta.

⁴ Ke ame didro Jeremia me didrut unyin tavat anyin a ödra tiga ca hia but ip e hnyi uma ceat.

⁵ Ke ame o but utbavat anyi Farao ûhedra Aigupito: ke hnyi ûen ame khana e hnen at Kaledaia tavat adre me igigilo Jerusalema, me adre me vese but ûhedra Jerusalema.

⁶ Me ame o but hofuc ho Iehova kö Jeremia perofeta, ka habe,

⁷ Walang hna ha hnö Iehova, Khongu Isaraela, ka habe, Ha thʼ öbu ka than Juda, at a kunʼ öbu könya ka hnei nya, ka habe, Wâ bi, haba utbavat anyi Farao tavat adre me o he ka hadruʼ öbun, adre me he ka hmetu Aigupito ai ka hnyi idra.

⁸ Ke ame he at Kaledaia ka hmetu me vat me taun ang, me hûgûnâ e, me thong ge meic.

⁹ Walang hna ha hnö Iehova, ka habe, Ca iyawöbun bi me ha, ka habe, E hnathu ame he but gata at Kaledaia: anyin adre me ca he ka he.

¹⁰ Anyin a eja ke ne öbun e ne hia but kot utbavat a at Kaledaia tavat adre me vat möbun, ke hu aat dö ge je kolon gadra, adre me he bi ka ve tot hnyi umödra je uma mano, me thong taun ang ge meic.

¹¹ Ke hnyi ûen ame he but utbavat a at Kaledaia ûhedra Jerusalema can utbavat anyi Farao,

¹² me haba Jeremia ame didrut ûheny Jerusalema he ka he hnyi hnyei Beniamina, me me hom jekhon eling unyin tavat.

¹³ Ke hnyi ûen e ame o hnyi homagouleny at Beniamina, e bi ling ke taben tavat tue, Iria ien, nöku Selemia, nöku Hanania; me e ame kuc Jeremia perofeta, me ha, ka habe, U me utut ka at Kaledaia.

¹⁴ Ke haingö Jeremia, ka habe, U me thoi; oge me ca utut ka at Kaledaia; ke e ame ca long kâu: me Iria ame kuc Jeremia me hom e ka je taben.

¹⁵ Ke haba je than adre me hmönyidra kö Jeremia, me kot e, me ca e hnyi uma umö Jonathana at sihnalimen: anyin adre me hia but ânyâ e me hnân uma ceat.

¹⁶ Ke ame didro Jeremia ka hnyi uma ceat, eû hmelen uma, ke se hia je bongu Jeremia ka laba eling;

¹⁷ me haba Zedekia than ame ûkhûnöng he ka hawâ e: ke than ame hnö duöngâ e hnyi umen uma me ha, ka habe, Hawa, e hu hofuc ûnyi ga Iehova? Ke haingö Jeremia ame ha, ka habe, E hu, Ke e ame ha minya, ka habe, Adre me he ka hnö u ka hnyi hnyamen than Babulona.

¹⁸ Ke haba Jeremia ame ha minya kö Zedekia than, ka habe, Ieû anyik monu köu, me je athnyabaem, me taun ang, mʼ öbun e cö nya?

¹⁹ Ke ewa anyibun je perofeta adre me perofeta köbun me ha, ka habe, Ame ca he than Babulona ka o köbun, me hnyei ang?

²⁰ Ke walang ang ö u na long ju könya than lö a tuhok: ö u na kap soâ ju hnok hna khöû hnyi hnyimâkâm; me u me ca kunö nya hmetu bi ka hnyi uma umö Jonathana at sihnalimen, wâ oge nye mokcu eling.

²¹ Me haba Zedekia than ame hûna, me adre me ip Jeremia hnyi hnyeuleny uma ceat, me ham kâu hnyi ke bong me ke bong khaca falawa ûnyi hnyi gethen anyin tavat up falawa, ke ne o but ame ba but areto hnyi taun. Helâe Jeremia ame laba hnyi hnyeuleny uma ceat.